ՈՐՔԱՆՈՎ Է ԱՆՀՐԱԺԵՇՏ ԻՆՔՆԱԳՆԱՀԱՏԱԿԱՆԸ
Սոֆի ԲԱԲԱՅԱՆ
Հոգեբան
Հաջողակ լինել և հասնել որոշակի ձեռքբերումների ցանկանում են շատ-շատերը, ինչը բնական է: Մինչդեռ ցավով պետք է արձանագրել, որ քիչ չեն թույլ ու կամազուրկ մարդիկ, ովքեր ոչ միայն չեն հասնում իրենց նպատակներին, այլև իրենց անհաջողությունների մեջ մեղադրում են ուրիշներին, արտաքին հանգամանքները, նույնիսկ ճակատագրին:
Այս մարդիկ համոզված են, որ իրենց մշտական ընկճվածությունն անհաջողությունների հետևանք է, մինչդեռ իրականում հակառակն է: Անհաջողությունների համար պատճառ են հանդիսանում տվյալ անձնավորության մշտական բացասական հույզերը, ուրիշներին քննադատելն ու դատելը, հակասական մտքերը: Այսօրինակ տրամադրվածություններից խուսափելու կամ դրանցից ազատվելու համար նախևառաջ մարդ պետք է սիրի ու հարգի և՜ ինքն իրեն, և՜ մերձավորին: Նա, ով չի սիրում մարդկանց, այլ միայն ինքն իրեն, իրականում զուրկ է ճշմարիտ սիրուց: Ամբողջ կյանքում ինքն իրեն մեղադրել անցյալի վրիպումների համար առնվազն անմտություն է: Պետք է ուղղակի դասեր քաղել անցյալից, հնարավորինս ճիշտ գնահատել ներկան, նույնիսկ ամենավատթար իրավիճակում փորձել տեսնել դրականն ու կենտրոնանալ դրա վրա: Քանզի հասնել հաջողությունների հնարավոր չէ` ուսերին կրելով մեղքի զգացումն ու անհաջողակ մարդու պատրանքը:
Մարդու ինքնագնահատականը ժամանակ առ ժամանակ փոփոխության է ենթարկվում, ինչի ուղղությամբ պետք է անընդմեջ աշխատել, փորձել վեր կանգնել ոչ ցանկալի իրավիճակներից ու իրադարձություններից: Նկատելի է, որ որոշ անձինք, ունենալով և՜ տաղանդ, և՜ գիտելիքներ, և՜ այլ հնարավորություններ, երբեմն հաջողությունների հասնելու համար զգալի ջանքեր են գործադրում: Որոշներն էլ, չունենալով առաջինների պոտենցիալ հնարավորությունները, շատ արագ մեծ հաջողությունների են հասնում: Բանն այն է, որ վերջիններս ինքնավստահ են, կարողանում են ճիշտ ներկայացնել իրենց: Պարզվում է` գործատուներն այդպիսիներին վստահում են: Ինքնավստահ մարդիկ, ըստ իս, ավելի հավասարակշռված են, նրանց հետ հետաքրքիր է հաղորդակցվելը, ունեն հումորի զգացում ու սուր միտք, ամեն մանրուքի համար չեն վիրավորվում, ձգտում են իրավիճակից դուրս գալ առանց վերբալ (խոսքի միջոցով) ընդհարումների: Եվ հակառակը, նա, ով անընդհատ պատճառ է փնտրում վեճի մեջ մտնելու, ցանկացած առիթով ձայնը բարձրացնում է, այդպիսին թերարժեք է, երբեմն նաև վախկոտ: Նմանները վանում են մարդկանց, հետևաբար նաև զրկվում են ցանկալի կարիերայի հասնելու հնարավորությունից:
Ինքնագնահատականի համար շատ կարևոր է ոչ միայն համապատասխան հոգեբանական տրամադրվածությունը, այլև ֆիզիկականի հանդեպ ուշադրությունը: Անհրաժեշտ է կոփել մարմինը, զբաղվել մարմնամարզությամբ, վազել, պարել, կարողանալ տիրապետել ուղիղ քայլվածքին: Նրանք, ովքեր կորացած են քայլում, վախվորած դեմք ունեն, չեն կարող ուշադրություն գրավել, հետևաբար նաև չեն համարվի հաջողակ: Հոգեբաններն ապացուցել են, որ ուղիղ պահելով իրանը` զգալիորեն մեծանում է ինքնագնահատականը: Նրանք, ովքեր ինչ-ինչ պատճառներով ճնշված են զգում իրենց, կամ` անվստահ, կարող են փորձել ուղղվել և միանգամից կզգան տարբերությունը: Այստեղ գործում է հոգեսոմատիկ (հոգեֆիզիկական) յուրահատուկ մի ֆենոմեն. մարմնի ճիշտ դիրքն անմիջականորեն դրական ներգործություն է ունենում հոգեկանի վրա. ուղիղ իրան ունեցող մարդիկ շատ ավելի ինքնավստահ ու գրավիչ են զգում իրենց: Իսկ նման դրական հոգեվիճակներ ունենալով, մարդ չի կարող իրեն թույլ ու տկար զգալ:
Կարևոր է նաև հիշել, որ պետք է դիմակայել չար տրամադրվածություն ունեցողների ճնշումներին: Գաղտնիք չէ, որ կան մարդիկ, ովքեր հակված են քննադատելու, տեղի-անտեղի դիտողություններ անելու: Նրանց ՙզոհը՚ չդառնալու համար, չպետք է տրվել սադրանքներին: Այսինքն, անհիմն քննադատողը, ինքն էլ չունենալով բարձր ինքնագնահատական, իր հոգեկանի դատարկությունը փորձում է լրացնել մութ ու կասկածելի միջոցներով. խաղում է իր զոհի հետ, փորձում ամեն կերպ ստորացնել նրան (խոսքն առողջ դիտողության մասին չէ), ուստի պետք չէ ստեղծված ՙսարդոստայնի՚ մեջ ընկնել: Այստեղ անհրաժեշտ է սովորել տիրապետել սեփական հույզերին, ինչը նույնպես մարդու հատկանշական գծերից է: Նման քննադատություններից պաշտպանվելու համար կարելի է ուղղակի լսել, ժպտալ, ոչ մի պարագայում հակահարված չտալ, հնարավորության սահմաններում փոխել խոսակցության թեման;
Ավելին, շատ ազդեցիկ, արդյունավետ ու ՙզինաթափող՚ մարտավարություն է նաև բարի վերաբերմունքն այդպիսիների նկատմամբ: