ՎԱՆԱԿԱՆԻ ՀՐԵՇՏԱԿՆԵՐԸ
Համլետ ՄԱՐՏԻՐՈՍՅԱՆ
Վաղմիջնադարյան կերպարվեստում որմնանկարչության զարգացումը, մեր կարծիքով, պետք չէ կապել ժանրի ունեցած առանձնահատկության կամ վրձնելու տեխնիկայի հետ։ Բանն այն է, որ ամենուր կառուցվող եկեղեցիների, վանքերի առկայությունը դեռևս չէր նշանակում, որ հասարակության հոգևոր կյանքում վանականությունն արդեն գերիշխող, առանցքային դերակատարություն ուներ։
Հասարակությունն ընդհանուր առմամբ անգրագետ էր, սակավ էին տառաճանաչ մարդիկ։ Հավելենք և այն, որ գրքերը, որոնք ձեռագիր մատյաններ էին, հասու չէին հանրության մեծ մասին։ Ու թեպետ ՙի սկզբանե բանն էր՚, սակայն Աստծո խոսքը, որը հիմնականում քարոզվում էր եկեղեցիներում ու վանքերում, չուներ և չէր կարող ունենալ այն ազդեցությունը, որ ուներ վրձնված պատկերն առհասարակ։ Ահա թե ինչու եկեղեցու, վանքի ինտերիերը
(մերկ, սառը պատեր) որմնանկարներով հարդարելու անհրաժեշտություն էր զգացվում, ինչը միջավայրը դարձնում էր հանդիսավոր, խորհրդավոր, ազդեցիկ, միևնույն ժամանակ մասսայականացվում էին Աստվածաշնչի հիմնական դրույթները։ Մեր այս տեսակետի օգտին է խոսում այն փաստը, որ եկեղեցիներում առավելապես որմնանկարվել են Նոր կտակարանի սյուժեները։
Այնպես որ, ժամանակի անհրաժեշտությամբ պայմանավորված, որմնանկարչությունը մեծապես նպաստեց հոգևորականության դիրքի, նաև մարդկանց մեջ հավատքի ամրապնդմանն ու Սուրբ գրքի պատմության տարածմանը, փոխադարձաբար ինքն էլ ստացվող պատվերների հաշվին արագ զարգանալու լայն հնարավորություն ստացավ։
Ֆլորենցիայում հովանավորչական մեծ գործունեություն ծավալած հանրահայտ Մեդիչիների տոհմից Կոզիմո Մեդիչի Ավագի նախաձեռնությամբ կառուցվեց Սան Մարկո վանական համալիրը։ Դոմինիկյան վանականների համար կառուցված վանքի ոչ միայն ինտերիերը, այլև վանականների խցերի պատերը, Կոզիմո Մեդիչիի ցանկությամբ, նկարազարդվեց։ Ըստ որում` այդ գործն իրականացնելու համար նա ընտրեց նույն միաբանության վանականներից Գվիդո դի Պիետրո անունով մեկին, ով աբբայությունում հայտնի էր որպես Ջիովաննի Ֆիյեզոլի կամ ուղղակի եղբայր Ջիովաննի, և վանքի գրադարանի գրքերի նկարազարդողն էր։ Մինչդեռ գեղանկարչության պատմության մեջ այդ վանականը մնաց որպես անվանի գեղանկարիչ Ֆրա Բեատո Անժելիկո։ Ֆրա` նշանակում է եղբայր (վանականների՝ միմյանց դիմելու ձև, անժելիկո¬անգել, հրեշտակ` իր վրձնած անզուգական հրեշտակների շնորհիվ, իսկ Բեատո` աստվածային, ինչպես որ Դանթեի ՙԿատակերգությունը՚ ժամանակակիցները կոչեցին աստվածային)։
Մեր նպատակից դուրս է այստեղ խոսել Ֆրա Անժելիկոյի ստեղծագործությունների մասին, բայց չենք կարող մեր նկատառումները չարտահայտել նրա կտավներից մեկի վերաբերյալ։ Հատկապես որ շատ արվեստաբանների, այդ թվում` եվրոպացի, տվյալ ստեղծագործության մեկնաբանություններում ակնհայտ սխալներ ենք նկատել։ Խոսքը Ֆրա Անժելիկոյի ՙՀուստինիանոսի բժշկումը՚ փոքրադիր կտավի մասին է։
Նախ ճշտենք վերնագիրը. ինչո՞ւ է գեղանկարիչը ընտրել հենց Հուստինիանոսին և ոչ թե մեկ ուրիշ պատմական անձնավորության։ Չէ՞ որ, մեծ հաշվով, նկարը կարող էր կոչվել ցանկացած մեկի անունով, և դրանից ոչինչ չէր փոխվի, քանի որ կտավում մերձավորի նկատմամբ տածվող սիրո, կարեկցանքի, հոգատարության գովքն է արվում։
Մեր խորին համոզմամբ` գեղանկարիչը որպես իր կտավի գլխավոր գործող անձ ընտրել է Հուստինիանոսին այն պատճառով, որ մարդկության պատմության մեջ ժանտախտի առաջին համաճարակը բռնկվել է հենց Հուստինիանոս կայսեր գահակալության ժամանակ ու տևել է երկուհարյուր, գուցե մի փոքր էլ ավել տարի, տարածվել Եվրոպայում, Ասիայում` խլելով մեկ միլիոն մարդու կյանք։ Ահա թե ինչու այդ համաճարակը պատմական փաստաթղթերում հիշատակվում է նաև որպես Հուստինիանոսի ժանտախտ։
Ուստի Ֆրա Անժելիկոն՝ իր կտավում պատկերելով Հուստինիանոս կայսրին, ցանկացել է ընդգծել Աստծո` վերերկրային ուժերի զորությունը։ Չէ՞ որ Հուստինիանոսը որպես կայսր անկարող եղավ բռնկված համաճարակի դեմն առնելու, մինչդեռ երբ ինքը` կայսրը, հիվանդացավ, հրեշտակները ապաքինեցին նրան (ըստ Ֆրա Անժելիկոյի նկարի)։
Արվեստաբաններից շատերը, ինչպես, օրինակ, անգլիացի Վենդի Բեքետը, ով Բի¬Բի¬Սի¬ի հետ համատեղ թողարկել է ՙԳեղանկարչության համաշխարհային պատմություն՚ խորագրով տասմասանոց տեսասկավառակ, որտեղ հիշյալ կտավը վերլուծելիս ասում է.
ՙ...Այս պատմությունը Հուստինիանոսի մասին է, ում ոտքի վրա ուռուցք կար, և մի գիշեր նա երազ տեսավ, որ պատուհանից ներս մտան Կոզման և Դամիանոսը (հրեշտակներ, ովքեր կոչվում են նաև անարծաթ (անհատույց) բժիշկներ-հեղ.) անդամահատեցին իր ոտքը և փոխարինեցին այն մահացած եթովպիացու առողջ ոտքով։ Երբ նա արթնացավ, իրեն գտավ երկգույն, սակայն բժշկված՚։
Այսպիսին է հիմնականում արվեստաբանների մեկնաբանությունը։ Իսկ վեցերորդ դարում ապրած Հուստինիանոս կայսեր ժամանակների բժշկությունն ի զորու՞ էր լուծելու այնպիսի բարդ խնդիր, ինչպիսին տրանսպլանտացիան է։ Իհարկե` ոչ։ Եվ հետո` երբ արվեստաբանն է ասում, որ ՙ...կայսեր հիվանդ ոտքը փոխարինեցին սևամորթի առողջ ոտքով՚, այն տպավորությունն է ստեղծվում, որ վաղ միջնադարում արդեն գոյություն ուներ ռասսայական հավասարություն, ինչը, հասկանալի է, լինել չէր կարող։ Այստեղ էլ հարց հնչեցնենք. եթե վեցերորդ դարում ռասսայական հավասարությունը հասարակական մտածողությունից դուրս էր, հնարավո՞ր է, արդյոք, որ այդ գաղափարը առաջ քաշեր տասնհինգերորդ դարում ապրած հոգևորական Ֆրա Անժելիկոն։ Հնարավոր չէ։ Այն մարդը, ով վանական էր և ում արվեստի անկյունաքարը Աստծո և Միածին որդու արարքների փառաբանումն է, այն մարդը, ով աշխարհը, կյանքը, մահը, առհասարակ ամեն բան մեկնաբանում էր ոչ թե գիտականորեն, այլ կրոնավորի դիտանկյունից (վկան` թեկուզ հենց իր անունը` Անժելիկո), անհավանական է, որ իր կտավում այդպիսի գաղափար արծարծեր, անկախ նրանից, որ ուսյալ, տաղանդավոր մարդ էր։ Ուրեմն հնչեցնենք հարցերի հարցը. ինչու՞ կտավում հրեշտակները Հուստինյանոսի անդամահատված ոտքը փոխարինել են սևամորթի ոտքով։
Սկզբից ևեթ ասենք, որ Ֆրա Անժելիկոն այդպիսի բան չի նկարել, դա ընդամենը ժամանակակից արվեստաբանների թյուր մեկնաբանությունն է։
Որ Ֆրա Անժելիկոն Հուստինիանոսին պատկերել է ժանտախտով հիվանդացած, մեզ հուշում են նաև մահճակալի գլխամասում վրձնված դեղորայքի սրվակը, գիշերանոթը, ուրիշ խոսքով` անկողնային հիվանդին անհրաժեշտ պարագաները, և չկա կտավում որևէ առարկա կամ դետալ, ինչը մեզ կուղորդեր այն մտքին, որ կայսեր առողջական խնդիրն իրոք կապված է ոտքի հետ, օրինակ, ձեռնափայտ, հենակ կամ մեկ այլ բան։
Նմանապես սխալ է այն մեկնաբանությունը, իբր Հուստինիանոսը երազի մեջ է տեսնում, որ հրեշտակները եկել ու բժշկում են իրեն։ Ֆրա Անժելիկոն այդպիսի գաղափար չի դրել իր կտավում։ Նա կայսերը վրձնել է պարզապես քնած վիճակում, և քանի դեռ հիվանդ կայսրը քնած է, հրեշտակները բժշկում են նրան։ Առավոտյան, երբ Հուստինիանոսն արթնանա, իրեն գտնելու է միանգամայն ապաքինված։ Եվ դա կայսեր համար լինելու է իսկական հրաշք։ Մինչդեռ, եթե նա իր երազի մեջ տեսներ իր բժշկվելը, դա արդեն հրաշք չէ, քանի որ իրադարձությունը զուրկ է անակնկալից, չկա անսպասելի տարրը։ Հետևաբար, Ֆրա Անժելիկոն, ում գերխնդիրն այս կտավում երկնայինի զորության փառաբանումն է, ինչը ուղղակի կապ ունի հրաշքի հետ, կարո՞ղ էր արդյոք աստվածային զորությունը զրկել հրաշք կոչվածից։ Ոչ, իհարկե։ Ուրեմն Հուստինիանոսի երազի մասին խոսք լինել չի կարող։
Այսպիսով, Ֆրա Անժելիկոն իր այս կտավում փառաբանելով Աստծո զորությունը, միևնույն ժամանակ քարոզում է Տիրոջ պատվիրանը` սիրիր մերձավորիդ, հոգ տար նրա մասին։
Հ. Գ. – Ֆրա Անժելիկոն իր մահից հինգհարյուր տարի հետո միայն Վատիկանի կողմից դասվեց սրբերի շարքը և 1984 թվականից համարվում է գեղանկարիչների երկնային հովանավորը։