ԱՐՑԱԽՑԻ ԳՐՈՂՆԵՐՆ ԱՐԺԱՆԱՑԵԼ ԵՆ ՀՀ ՊԱՇՏՊԱՆՈՒԹՅԱՆ ՆԱԽԱՐԱՐՈՒԹՅԱՆ ԵՎ ԳՐՈՂՆԵՐԻ ՄԻՈՒԹՅԱՆ ՄՐՑԱՆԱԿՆԵՐԻ
Վան ՆՈՎԻԿՈՎ
Հայաստանի գրողների միության և ՀՀ պաշտպանության նախարարության համատեղ մրցանակաբաշխությունն արդեն վեցերորդ տարին է անցկացվում։ Բանակի օրվան նվիրված մրցանակաբաշխությունն այս տարի կայացել է Հայաստանի գրողների միության դահլիճում։
Հայաստանի գրողների միությունը և ՀՀ պաշտպանության նախարարությունը տարբեր անվանակարգերում մրցանակներ են հանձնել մի խումբ գրողների, ինչպես նաև Երկրապահ կամավորականների միության անդամների, Հայոց բանակին ծառայություններ մատուցած անձանց։
Բացման խոսքում Գրողների միության նախագահ Էդվարդ Միլիտոնյանը նկատեց, որ մրցանակաբաշխության մասնակիցների թիվը տարեցտարի ավելանում է։
ՙՈւրախությամբ պետք է նշեմ, որ մասնակիցներ ենք ունենում նաև Արցախից, Սփյուռքից՚,-ընդգծել է Էդ. Միլիտոնյանը։
ՀԳՄ նախագահը կարևորեց նաև գրող և բանակ համագործակցությունը, որի համատեքստում գրողները բազմաթիվ հանդիպումներ են ունենում զորամասերում, իսկ գրական միջոցառումներին հրավիրվում են զինվորականներ։
ՙ Այսօրվա մեր ստեղծագործող մրցանակակիրների շարքում ունենք գրողներ, ովքեր հարկ եղած պարագայում նաև զենքով են մարտնչել Հայոց բանակի շարքերում՝ ինչպես Արցախյան ազատամարտի տարիներին, այնպես էլ Ապրիլյան քառօրյա պատերազմի օրերին՚- նշեց գրական ընտանիքի ղեկավարը՝ արդյունավետ գնահատելով Պաշտպանության նախարարության հետ համագործակցությունը։
Այնուհետև տեղի է ունեցել մրցանակների հանձնումը։
Արցախից Հայաստանի գրողների միության և ՀՀ պաշտպանության նախարարության համատեղ մրցանակաբաշխության հանձնաժողովի հատուկ մրցանակներին են արժանացել Մաքսիմ Հովհաննիսյանը և Սոկրատ Խանյանը։
ՙՀայոց բանակում և մարտական դիրքերում մարտնչած ստեղծագործող՚ անվանակարգում գրական մրցանակները տրվել են Վան Նովիկովին՝ ՙԿամավորի օրագիր՚ պատմվածաշարի, և Պաշտպանության բանակի սահմանապահ զորամասի սպա Արմեն Բարխուդարյանին՝ ՙԶինվորի սերը՚ պոեմի համար։
ՙՊոեզիա՚ անվանակարգում առաջին մրցանակին արժանացավ Արևշատ Ավագյանը, երկրորդ մրցանակին՝ Գագիկ Խաչատրյանը, երրորդ մրցանակին՝ Սուսաննա Հովհաննիսյանը և Ժաննա Աբրահամյանը։
ՙԳեղարվեստական արձակ՚ անվանակարգում առաջին մրցանակը հանձնվեց Ժաննա Հակոբյանին, երկրորդ մրցանակը՝ Դավիթ Ավետիսյանին, իսկ երրորդ մրցանակը` Նանեին։
Վազգեն Սարգսյանի անվան մրցանակին արժանացավ Սամվել Բեգլարյանը։ Հրապարակագրության, գրաքննադատության ժանրի մրցանակը տրվեց Գայանե Պողոսյանին։
Հայոց բանակին նվիրված գրական անթոլոգիաների, գրական-տեսական աշխատությունների մրցանակը հանձնվեց Արմեն Ավանեսյանին։
Մրցանակների հանձնման արարողությունն ավարտվել է Հայոց բանակին նվիրված գրական-երաժշտական հանդիսությամբ, որն ուղեկցվել է ՀՀ ՊՆ ՙԶորական՚ համույթի կատարմամբ ռազմահայրենասիրական և զինվորական երգերով։