ԿՅԱՆՔԸ ՀԵՔԻԱԹ Է, ՀԵՔԻԱԹՆ ԷԼ` ՄԻ ԿՅԱՆՔ
Թամար ՂԱՐԱԽԱՆՅԱՆ
Ինչպես հայտնի է, ամենայն հայոց բանաստեղծ Հովհաննես Թումանյանի ծննդյան օրը` փետրվարի 19-ը, 2008-ից ի վեր ՀՀ գրողների միության նախկին նախագահ, երջանկահիշատակ Լևոն Անանյանի նախաձեռնությամբ և ՀՀ կառավարության որոշմամբ նշվում է որպես գիրք նվիրելու օր:
Օրերս Ստեփանակերտի Խաչատուր Աբովյանի անվան թիվ 1 հիմնական դպրոցի ՙԾիածան՚ խմբում տեղի ունեցավ դաս-պարապմունք` նվիրված Հովհաննես Թումանյանի ծննդյան և գիրք նվիրելու օրվան: Բաց դասը նախադպրոցական խմբի սաների հետ կազմակերպել էր նույն դպրոցի ուսուցչուհի Մարինե Աղաջանյանը:
Երեք փուլից բաղկացած դասի առաջին փուլում երեխաները նկարների միջոցով գուշակեցին Թումանյանի հեքիաթները: Երկրորդ փուլում ուսուցչուհին հեքիաթների վերնագրեր ասաց, իսկ փոքրերն այդ հեքիաթներից արտասանեցին հատվածներ, որից հետո կատարեցին ՙԿաքավի երգը՚:
Վերջին` երրորդ փուլում նախադպրոցականները փազլի միջոցով գուշակեցին հեքիաթը` նշելով վերջինիս վերնագիրը: Դաս-պարապմունքի վերջում կայացավ Թումանյանի հեքիաթներով գրքերի փոխանակում. տղաները գրքեր նվիրեցին աղջիկներին, աղջիկներն էլ` տղաներին:
Ամբողջ դասի ընթացքում զգացվում էր թումանյանական շունչը և անհնար էր թաքցնել փոքրիկների ոգևորությունը: Պարզ էր մի բան. նրանց մանկական աշխարհում, անշուշտ, կյանքը հեքիաթ է, հեքիաթը` կյանք: Ամեն մի հեքիաթ օժտված է դաստիարակչական, բարոյախրատական բովանդակությամբ և, ի վերջո, հեքիաթի վերջում միշտ բարին է հաղթում, ինչին երեխաներն ամենաշատն են հավատում ու սպասում: Այս և այլ հարցերի շուրջ ճեպազրույց ունեցանք դասվար տիկին Աղաջանյանի հետ.
-Տիկի՜ն Աղաջանյան, շատ հեքիաթագիրներ ունենք, ինչու՞ հենց Թումանյան ընտրեցիք:
-Ճիշտ է, հեքաթագիրներ շատ ունենք, բայց Թումանյանը, կոնկրետ ինձ համար, առանձնահատուկ է: Ինքս սովորել եմ Թումանյանի անվան թիվ 9 դպրոցում: Դա ինձ համար մեծ պատիվ է: Թումանյանը նաև մանկագիր է: Նրա բոլոր գործերն էլ հեշտ ըմբռնելի են և հասու թե՜ մեծերին, թե՜ փոքրերին:
-Հաճա՞խ եք հեքիաթներ ընթերցում երեխաների համար:
-Պարտադիր ընթերցում եմ, և ոչ միայն. ձայնասկավառակներ ենք միացնում, մեծ էկրանին հաճույքով են դիտում: Երբեմն էլ հեքիաթներ ենք բեմականացնում:
-Իսկ ի՞նչ պետք է անել, որ երեխաները հետագայում չկորցնեն իրենց սերն ու հետաքրքրությունը գրքի հանդեպ, նամանավանդ որ դարի թելադրանքով այսօր գիրքն ու համացանցը գտնվում են նույն հորիզոնականում:
-Անձամբ ես նախապատվությունը տալիս եմ գրքին, ոչ մի ջանք չեմ խնայում, որ նրանք սիրեն գիրքն ու կարողանան օգտվել նրանից: Սակայն ծնողները ևս պետք է հետամուտ լինեն, եթե մի անգամ խաղալիք են գնում, ապա հաջորդ անգամ ձգտեն գիրք նվիրել իրենց փոքրիկին: Դա պետք է սկսել երեխայի փոքր տարիքից, որպեսզի նրա մեջ սեր արթնանա գրքի հանդեպ:
Անշուշտ, գիրք նվիրելու տոնը բազմախորհուրդ է: Որքան հաճելի կլիներ, որ հասարակության յուրաքանչյուր անհատ ճանաչի և գնահատի գրքի արժեքը: Նույնչափ գեղեցիկ կլիներ, եթե ոչ հաճախակի, ապա գոնե երբեմն մտերիմները միմյանց մեկական գիրք նվիրեն, ինչպես արեցին նախադպրոցական խմբի մեր փոքրիկները:
;