ՀԱՄԱԳՈՐԾԱԿՑՈՒԹՅԱՆ ՇԱՐՈՒՆԱԿԱԿԱՆՈՒԹՅԱՆ ՕԳՏԻՆ
Հոկտեմբերի 22-ին Շուշիում ուշագրավ իրադարձություն տեղի ունեցավ. ԼՂՀ մշակույթի և երիտասարդության հարցերի նախարարությունում ստորագրվեց արձանագրություն ՙՀայաստանի Հանրապետության մշակույթի նախարարության և Լեռնային Ղարաբաղի Հանրապետության մշակույթի և երիտասարդության հարցերի նախարարության միջև մշակույթի բնագավառում համագործակցության մասին՚ համաձայնագրում լրացում կատարելու մասին:
Երբ 2009 թվականին այս կառույցների միջև համանուն համաձայնագիր ստորագրվեց, մեկնաբանեց ԼՂՀ մշակույթի և երիտասարդության հարցերի նախարար Նարինե Աղաբալյանը, թանգարանները գտնվում էին մեկ այլ ոլորտի ենթակայության ներքո: Եվ քանի որ 2013թ. հունվարի 1-ից դրանք փոխանցվեցին Մշակույթի և երիտասարդության հարցերի նախարարությանը, անհրաժեշտություն առաջացավ համաձայնագրի մեջ մտցնել նաև այդ ոլորտում համագործակցության դրույթները, ինչպես նաև վավերացնել համաձայնագրից բխող` 2014-2015 թթ. իրականացվելիք միջոցառումների գործնական ծրագիր` դրանով իսկ փաստելով երկու կողմերի հետագա համագործակցությունը շարունակելու պատրաստակամությունն ու վճռականությունը։
ՀՀ մշակույթի նախարար Հասմիկ Պողոսյանն իրազեկեց, որ աշխատանքն այդ փաստաթղթերի վրա տևել է երկար ու հանգամանալից և իր մեջ ներառում է մշակույթի բոլոր ոլորտները: ՙՈրպես ՀՀ մշակույթի նախարար` ես գոհ եմ փաստաթղթի բովանդակությունից,- ասաց նա:- Եվ եթե կարողանանք ամբողջական այս ծրագիրն իրականացնել, կարծում եմ, մենք շատ լուրջ ձեռքբերումներ կունենանք երկու տարվա կտրվածքով՚:
Այս փաստաթղթերի ստորագրությամբ, եզրափակեց Նարինե Աղաբալյանը, երկու նախարարությունների ղեկավարներն էլ ստանձնում են պատասխանատվություն թե՜ Արցախում և թե՜ Հայաստանում իրականացվող մշակութային քաղաքանության համար:
Համառոտ անդրադառնալով գործնական ծրագրին` նշենք, որ այն մշակվեց համաձայնագրի դրույթները լավագույնս իրականացնելու նպատակով: Ծրագիրն իր մեջ ներառում է մշակութային ժառանգության պահպանությանը և հանրահռչակմանը, ժամանակակից արվեստի, մշակութային կրթության զարգացմանը, միջազգային նախագծերի, փորձի փոխանակման միջոցառումների իրականացմանն ուղղված գործնական քայլեր: Այսպես, նախատեսվում են գիտական աշխատությունների, ժողովածուների հրատարակություն, հայկական երկու հանրապետությունների գրադարանների, պատկերասրահների, թանգարանների ֆոնդերի, մշակութային արժեքների պահպանություն և հանրահռչակում, կադրերի վերապատրաստում, ինչպես նաև ԼՂՀ գրադարանների գրքային ֆոնդի համալրում, ոչ նյութական մշակութային ժառանգության պահպանություն և հանրահռչակում, ՀՀ և ԼՂՀ թատրոնների միջև անմիջական համագործակցություն, գեղարվեստական կրթության ոլորտի կադրերի վերապատրաստում, ՀՀ մարզերի և ԼՂՀ շրջանների միջև փոխադարձ կապերի հաստատում, արտերկրում կազմակերպվող միջոցառումներին ԼՂՀ մասնակցության ապահովում, մշակույթի և արվեստի բնագավառների ներկայացուցիչների խորհրդակցությունների կազմակերպում և այլն։
Սուսաննա ԲԱԼԱՅԱՆ