100 ՄԻԼԻՈՆ ԴՈԼԱՐԻ ՆԵՐԴՐՈՒՄ ԵՎ 10 ՀԱԶԱՐ ՀԵԿՏԱՐ ԿԱՅՈՒՆ ՈՌՈԳՄԱՆ ԴԱՇՏԵՐ
Նարեկ Սահակյան
Մեկնարկում է Արցախի ամենախոշոր տնտեսական ծրագիրը, որի շնորհիվ Սարսանգի աջափնյա ջրանցքով կոռոգվի ավելի քան 10 հազար հեկտար հողատարածք՝ Մարտակերտի, Ասկերանի և Մարտունու շրջաններում։ 100 միլիոն դոլար արժողությամբ նախագիծը կյանքի են կոչում ՙԱրցախ ՀԷԿ՚ բաց բաժնետիրական ընկերության հիմնադիրները՝ Թարթառ գետի վրա կառուցելով ևս 4 հիդրոէլեկտրակայան ու 2 ջրամբար։
Ընկերության տնօրենների խորհրդի նախագահի նման կարգի խոշորամասշտաբ ծրագիր Արցախում առայժմ չի իրականացվել, ընդ որում` սա կյանքի կկոչվի վերականգնվող ռեսուրսով. ՙՄի ջրամբարի ջրընդունիչը կծառայի մեր ամենախոշոր նախագծի՝ Թարթառի ջրերի տեղափոխմանը, որը թույլ կտա մեր երկրում ունենալ ավելի քան 10 հազար հեկտար կայուն ոռոգման տարածք։ Այսինքն, սրանք մեծ, իրար հետ փոխկապակցված նախագծեր են՚,-նշել է նա։
5-րդ ՀԷԿ-ը կկառուցվի նախատեսվող ջրանցքի վրա՝ ընդհանուր առմամբ Արցախի էներգետիկ հնարավորություններն ավելացնելով 200 միլիոն կիլովատ ժամով։ Ջրանցքը կհասնի Թարթառի աջափնյա հատված՝ կայուն ոռոգում ապահովելով Մարտակերտի, Ասկերանի և Մարտունու շրջաններում։ Ջուրը կհասնի այնտեղ, որտեղ դրան ավելի շատ են սպասում. ՙՊետք է ասել, որ գրեթե ամենուր ոռոգման ջրի կարիքն զգում են, բայց կառանձնացնեմ Մարտակերտի շրջանն ու Ակնայի թաղամասը, որտեղ ունենք մեր ամենամեծ հողային ռեսուրսները, սակայն տարվա կտրվածքով՝ ամենաքիչ տեղումների քանակը։ Համոզված եմ, որ սկիզբ է դրվում մեր մյուս ամենախոշոր նախագծին՝ այգեգործությանը, և երազանքս է, որ առաջիկա 5-7 տարում ավելի քան 10 հազար հեկտար այգի տնկվի Արցախում, որը թույլ կտա արտադրել ավելի քան 200 հազար տոննա համախառն միրգ, ինչն առանց այս պրոյեկտի հնարավոր չէ՚։
Հիդրոէլեկտրակայանների շինարարությունը սկսում է ՙՄ էներգո Լ՚ ընկերությունը՝ Թարթառ գետի վրա սկսելով ՙԹառ-Թառ 4՚ կայանի շինարարությունը։ Ի դեպ, ՀԷԿ-ի հիմնարկեքի արարողությանը մասնակցել են ՙԱրցախ ՀԷԿ՚ ԲԲԸ տնօրենների խորհրդի անդամները։ Կապալառու ընկերության ղեկավար Ալեքսանդր Մամունցը կարծում է, որ ջրանցքի կառուցումը շատ դժվար, բայց երկար սպասված աշխատանք է լինելու. ՙԵրկրորդ փուլում պետք կառուցենք ջրանցք, ինչը կլինի ոռոգման համակարգի սկիզբ։ Ռելիեֆային դժվարություններ կան, որովհետև մենք շրջապատված ենք սարերով, որտեղով պետք է անցկացնենք ջրանցքը։ Այս պահին դժվարանում եմ ասել ջրանցքի երկարությունը, քանի որ մասնագետները դեռ աշխատում են նախագծի վրա՚,-մեզ հետ զրույցում նշել է Ա. Մամունցը։Ըստ ներդրողների, 2,5 տարի հետո ջրանցքը պատրաստ կլինի, իսկ համալիր ծրագրի իրագործումը կտևի առնվազն 4 տարի։ Մեր հարցին, թե ոռոգվելիք հողատարածքները ու՞մ են պատկանում, ՙԱրցախ ՀԷԿ՚ ԲԲԸ տնօրենների խորհրդի նախագահ Արայիկ Հարությունյանը պատասխանեց, որ խոսքը սեփականաշնորհված հողերի մասին է, որտեղ մենաշնորհային դիրքեր ունեցողներ չկան. ՙԱյս նախագծով վերջ է տրվում այն հարցին, թե ջուրը ու՞մ կհասնի, որովհետև ջուրը կհասնի բոլորին անխտիր։ Ավելին ասեմ, որ ավելի շատ ջուր կունենանք, քան հնարավոր է օգտագործել այդ տարածքներում։ Ի դեպ, Մարտակերտի շրջանում և Ակնա թաղամասում հազարավոր հեկտարներ չեն մշակվում ոռոգման պատճառով։ Մյուս կողմից, եթե Մարտակերտի շրջանը, Ակնայի թաղամասը և Մարտունու շրջանի Բերդաշեն գյուղին պատկանող հողատարածքները մենք կարողանանք ապահովել այս ջրերով, ապա Կարկառ գետի հնարավորությունն ամբողջությամբ կարող ենք ուղղել դեպի Նախիջևանիկ և Վարդաձոր գյուղերի դաշտերը։
Ստացվում է այնպես, որ խոշորամասշտաբ ծրագրով օտարերկրա ներդրողները վերջակետ են դնում Սարսանգի ջրերի օգտագործման հարցով Ադրբեջանին ուղղված Արցախի մարդասիրական առաջարկներին։ Բաքուն տարիներ շարունակ հրաժարվել է Ստեփանակերտի հետ համագործակցելուց, իսկ արցախցի հողագործներն այդ ջրերի կարիքն ունեն:
Առաջ անցնելով՝ խորհրդի նախագահը հայտարարում է, որ 4 տարի անց Մարտակերտի, Ասկերանի և Մարտունու շրջաններում աշխատուժի խնդիր կունենան։ Կոռոգվեն Արցախում ներկայումս մշակվող հողերի շուրջ 10 տոկոսին հասնող դաշտեր։