ԵՐԿՐԻ ՍՈՑԻԱԼ-ՏՆՏԵՍԱԿԱՆ ՎԻՃԱԿԸ՝ ԱՌԱՋԻՆ ԿԻՍԱՄՅԱԿՈՒՄ
Լաուրա ԳՐԻԳՈՐՅԱՆ
Արցախի Հանրապետության ազգային վիճակագրական ծառայությունում ամփոփվել է 2019թ. հունվար-հունիս ամիսներին արձանագրված երկրի սոցիալ-տնտեսական վիճակը։ Օգոստոսի 13-ին հրավիրված մամուլի ասուլիսի ժամանակ վիճակագրական ցուցանիշները լրագրողներին է ներկայացրել ԱՀ ԱՎԾ նախագահ Մանուշ Մինասյանը։
Ընթացիկ տարվա առաջին կիսամյակում տնտեսական ակտիվության ցուցանիշը, նախորդ տարվա նույն ժամանակահատվածի համեմատ, կազմել է 111.1%։
ԱՀ համախառն ներքին արդյունքը կազմել է 132.7 մլրդ դրամ` 2018թ. հունվար-հունիսի 120.9 մլրդ դրամի դիմաց: ՀՆԱ-ի հավելաճի տեմպը կազմել է 109.6 %, ինդեքս-դեֆլյատորը` 100.1%: Մեկ շնչին ընկնող ՀՆԱ-ն, ընթացիկ գներով, կազմել է 897.4 հազ. դրամ, 1853.5 ԱՄՆ դոլար կամ 1640.3 եվրո:
Մ. Մինասյանի խոսքով՝ նախորդ տարվա նույն ժամանակաշրջանի համեմատ նվազել են տնտեսական աճի ցուցանիշները. հիմնական շարժիչն այն ժամանակ արդյունաբերությունն էր, որն էլ ապահովել էր 16,4% աճ։ Այս տարի տնտեսական աճի հիմնական լոկոմոտիվը առևտրի և ծառայությունների ոլորտներն են, որոնց բաժին է ընկել 6.3 տոկոսային կետը։ ՀՆԱ-ի արձանագրած 9.6% հավելաճի շուրջ 4.4 տոկոսային կետն ապահովել է արդյունաբերությունը՝ ներառյալ էներգետիկան, 1.5 տոկոսային կետը` շինարարությունը:
Հաշվետու ժամանակաշրջանում՝ արդյունաբերության բնագավառում հանրապետությունում փաստացի գներով թողարկվել է 73.9 մլրդ դրամի արդյունաբերական արտադրանք, իրացվել է 73.5 մլրդ դրամի պատրաստի արտադրանք:
Ըստ ԱՎԾ նախագահի՝ նախորդ տարվա նույն ժամանակահատվածի համեմատ 15.8%-ով նվազել է հանքագործական արդյունաբերության և բացահանքերի շահագործման ոլորտի, 17.9%-ով` աճել մշակող արդյունաբերության տեսակարար կշիռը:
Ստեփանակերտ քաղաքի արդյունաբերական կազմակերպությունների կողմից թողարկվել է ընդհանուր արդյունաբերական արտադրանքի 42.6%-ը, իսկ շրջաններից ամենամեծ մասնաբաժինն ունի Մարտակերտի շրջանը` 45.6%։
Գյուղատնտեսության և ձկնորսության համախառն արտադրանքը 2019թ. հունվար-հունիսին փաստացի գներով կազմել է 27.3 մլրդ դրամ: Ընթացիկ տարում, նախորդի համեմատ, համադրելի գներով այն նվազել է 0.3%-ով:
Շինարարության ոլորտում՝ ընթացիկ տարվա առաջին կիսամյակում արձանագրված ցուցանիշը դրական է. իրականացվել է 27.5 մլրդ դրամի շինարարություն, ինչը նախորդ տարվա համեմատ աճել է 23.1%-ով:
Ըստ ֆինանսավորման աղբյուրների՝ նախորդ տարվա նույն ժամանակաշրջանի համեմատ 34,1%-ով աճել է պետական բյուջեի, 28.5%-ով` կազմակերպությունների, 12.9%-ով` արտաբյուջետային միջոցների, 4.8%-ով՝ մարդասիրական օգնության հաշվին կատարված շինարարությունը և, հակառակը, 18.1%-ով նվազել է համայնքների, 2.7%-ով? բնակչության, 60.4 %-ով՝ այլ միջոցների հաշվին կատարված շինարարությունը:
Տրանսպորտի բնագավառում 2019թ. հունվար-հունիսին ընդհանուր օգտագործման ավտոմոբիլային տրանսպորտի բեռնափոխադրումների ծավալը կազմել է 439.8 հազ. տոննա, ինչը նախորդ տարվա նույն ժամանակաշրջանի համեմատ աճել է 3.3 %-ով:
Ընդհանուր օգտագործման տրանսպորտի բեռնաշրջանառությունը կազմել է 14.5 մլն տոննա-կմ, որը նախորդ տարվա նույն ժամանակաշրջանի համեմատ աճել է 6.8%-ով:
Ինչ վերաբերում է ուղևորափոխադրումներին՝ հանրապետությունում ընդհանուր օգտագործման ավտոմոբիլային տրանսպորտի ուղևորափոխադրումների ծավալը կազմել է 10.7 մլն մարդ` նախորդ տարվա համեմատ աճելով 8.3%-ով:
Մ. Մինասյանը ցավով փաստեց, որ համաձայն լիազոր մարմնի տեղեկատվության՝ նախորդ տարվա նույն ժամանակաշրջանի համեմատ ՃՏՊ-ի թիվն աճել է 32.3%-ով? կազմելով 41 դեպք, ինչի հետևանքով 80%-ով աճել է զոհերի ու վիրավորների թիվը:
Հանրապետությունում աճ է արձանագրվել կապի ծառայություններից ստացված եկամուտների ընդհանուր ծավալում. փաստացի գներով այն կազմել է 4.0 մլրդ. դրամ, ինչը նշանակում է, որ համադրելի գներով այն աճել է 12.1 %-ով:
2019թ. հուլիսի 1-ին՝ նախորդ տարվա նույն ժամանակաշրջանի համեմատ, աշխատանք փնտրող անձանց քանակն աճել է 6.4, գրանցված գործազուրկների քանակը՝ 5.3%-ով: Հաշվառված աշխատանք փնտրողների շուրջ 80%-ը կանայք են: Նրանց 2.1%-ը զբաղվածներ են, 3%-ը՝ տարիքային կենսաթոշակառու, յուրաքանչյուր չորրորդ գրանցված գործազուրկն ունի բարձրագույն կրթություն, պաշտոնապես գրանցված գործազուրկների 65%-ից ավելին 3տարուց ավել է, ինչ աշխատանք է փնտրում:
2019թ. հունվար-հունիսին տնտեսությունում զբաղվածների միջին ամսական անվանական աշխատավարձը կազմել է 168.6հազ.դրամ, ինչը նախորդ տարվա հունվար-հունիսի համեմատ աճել է 6.9%-ով: Ընդ որում՝ պետական հատվածում զբաղվածների միջին ամսական անվանական աշխատավարձը կազմել է 160.6հազ.դրամ, որը նախորդ տարվա առաջին կիսամյակի համեմատ աճել է 1.6%-ով, իսկ ոչ պետական հատվածում՝ համապատասխանաբար 184.3հազ.դրամ` աճելով 17.4%-ով: Ինչպես և նախորդ ժամանակաշրջաններում՝ աշխատավարձի մակարդակը բարձր է օտարերկրյա կապիտալով կազմակերպություններում. որպես տնտեսական գործունեության ոլորտներ առանձնանում են հանքագործությունը, ֆինանսական և ապահովագրական գործունեությունը, շինարարությունը: Բարձր է նաև պետական կառավարման և պաշտպանության ոլորտում, իսկ սոցիալական ոլորտում այն կազմել է միջին ցուցանիշի 64%-ը:
2019թ. հունվար-հունիսին շահույթով աշխատած բանկերի շահույթը կազմել է 5645.5 մլն դրամ, իսկ վնասով աշխատած բանկերի վնասը՝ 1166.8 մլն դրամ:
Հանրապետությունում ոչ բանկային կազմակերպությունների կողմից իրականացված փոխառությունները 2019թ. հունվար-հունիսին կազմել է 10.8մլրդ դրամ՝ 2018թ. 18.5 մլրդ դրամի փոխարեն:
Խոսելով ժողովրդագրության վիճակի մասին, Մ. Մինասյանը նշեց, որ նախորդ տարվա համեմատ 146-ով կամ 13%-ով նվազել է ծնունդների թիվը. առաջին կիսամյակում ԱՀ-ում ծնվածների թիվը կազմել է 973 մարդ, մահացածների թիվը` 573 մարդ, բնական հավելաճը` 400 մարդ: Մոր միջին տարիքը երեխայի ծննդյան ժամանակ կազմել է 27.8 տարեկան, ընդ որում առաջնեկ ունեցող մոր միջին տարիքը` 24.8 տարեկան:Հաշվետու ժամանակահատվածում հանրապետությունում գրանցվել է 327 ամուսնություն և 96 ամուսնալուծություն: Ըստ ԱՎԾ նախագահի՝ 100 նոր կազմավորվող ամուսնական զույգին բաժին է ընկնել 29 ամուսնալուծություն` նախորդ տարվա 30-ի փոխարեն:
Գնաճ է արձանագրվել ԱՀ սպառողական շուկայում։ Սպառողական գների ընդհանուր մակարդակի փոփոխությունը պայմանավորված է պարենային ապրանքների գների փոփոխությամբ՝ կապված պարենային որոշ ապրանքատեսակների գների սեզոնայնության, սպառման կառուցվածքի, պահանջարկի և առաջարկի հարաբերակցության փոփոխության հետ: ԱՀ-ում 2019թ. հունիսին 2018թ. դեկտեմբերի համեմատ սպառողական գների ինդեքսը կազմել է 100.1%: 2019թ. հունիսին 2018թ. դեկտեմբերի համեմատ՝ սպառողական գների 0.1 տոկոս գնաճի պայմաններում գրանցվել է ԱՄՆ դոլարի նկատմամբ հայկական դրամի հաշվարկային փոխարժեքի 1.3% գնանկում:
ԱՀ արտաքին առևտրաշրջանառության ծավալը 2019թ. հունվար-հունիսին, փաստացի գներով, կազմել է 148.6մլրդ դրամ կամ 307.3մլն ԱՄՆ դոլար, այդ թվում՝ ապրանքների արտահանումը՝ 63.1մլրդ դրամ (130.6մլն ԱՄՆ դոլար), իսկ ներմուծումը՝ 85.5մլրդ դրամ (176.6 մլն ԱՄՆ դոլար): Առևտրային հաշվեկշիռը բացասական է 22.4մլրդ դրամով (46.0մլն ԱՄՆ դոլարով): 2018թ. նույն ժամանակաշրջանի համեմատ՝ արտաքին առևտրաշրջանառության ծավալն աճել է 13.5 %-ով, ընդ որում` արտահանումը՝ 32%-ով, իսկ ներմուծումը`2.8%-ով:
ԱՀ ԱՎԾ նախագահն անդրադարձավ նաև ծառայության կողմից իրականացվող գործառույթներին և առաջին կիսամյակում կատարված աշխատանքներին, ինչպես նաև պատասխանեց լրագրողների հարցերին։