ԱՐԵՎՄՈՒՏՔԸ ՍԼԱՔՆ ՈՒՂՂՈՒՄ Է ՄԵՐՁԱՎՈՐ ԱՐԵՎԵԼՔԻ ԿՈՂՄԸ
Ռուզան ԻՇԽԱՆՅԱՆ
Իսկ շփման գծում դիպուկահարներն են ակտիվացել
Մերձավոր Արևելքում իրավիճակի սրացման նախապայմաններն ակնառու են։ Արդեն հայտնի է Սպիտակ տան՝ այդ ուղղությամբ զորքեր տեղափոխելու մտադրությունը. ԱՄՆ զինված ուժերի կենտրոնական հրամանատարության ղեկավար Քենեթ Մաքկենզին խոսեց Մերձավոր Արևելքում Վաշինգտոնի ռազմական ներկայության մեծացման նպատակահարմարության մասին։ Հայկական աղբյուրներն այս նորությունը տարածեցին՝ հղում անելով ամերիկյան Wall Street Journal-ին։ Մաքկենզին նաև նշել է, որ ռազմական ներկայության մեծացումն զգալի ռեսուրսներ կպահանջի, բայց հստակ չի ասել, թե Պենտագոնից քանի զինծառայող պիտի խնդրի։
Վաշինգտոնը միաժամանակ Իրանի դեմ նոր պատժամիջոցների լայն փաթեթ նախապատրաստելու մասին իրազեկեց։ ԱՄՆ ֆինանսների նախարարության կողմից հունիսի 7-ին տարածված պաշտոնական հաղորդագրությունում նշված էր, որ փաթեթն իրանական նավթավերամշակող բիզնեսի դեմ է ուղղված։ Վերջինս Իսլամական հեղափոխության պահապանների կորպուսի՝ իրանական իշխանությունների հենարանի, ֆինանսավորման հիմնական աղբյուրներից մեկն է։ Պատժամիջոցների ցանկում է Persian Gulf Petrochemical Industry Co-? ընկերությունը, որը պատասխանատու է Իրանի նավթաքիմիական արդյունաբերության արտադրանքի կեսի արտահանման համար և այս ոլորտի իրանական ձեռնարկությունների շուրջ 40%-ի սեփականատերն է։ Վերոնշյալ աղբյուրի տեղեկություններով՝ այս ընկերության գործունեության շնորհիվ իրանական ղեկավարությունն ու Իսլամական հեղափոխության պահապանների կորպուսը միլիարդավոր դոլարներ են ստացել։
ԱՄՆ վարչակազմից բաց տեքստով հասկանալ են տվել, որ սահմանափակումներն Իրանի դեմ ձեռնարկված արշավի բաղկացուցիչն են, որի նպատակը երկրի մեկուսացումն է միջազգային շուկաներում։
Իրանի Իսլամական Հանրապետության գերագույն առաջնորդ Ալի Խամենեին, ամերիկյան ազդակներին ի պատասխան, հանրայնացրեց Թեհրանի մտադրությունը՝ հակված չեն պատերազմել, բայց շարունակելու են դիմակայել Վաշինգտոնին։
Ուշագրավ զարգացում է ԱՄՆ կենտրոնական հետախուզական վարչության նախկին տնօրեն Ջոն Բրենանի՝ նախագահ Թրամփին հասցեագրված քննադատությունը։ Բրենանը տարածաշրջանում Իրանի ակտիվացման փաստն է արձանագրում՝ ընդգծելով, որ ԱՄՆ-ն Իրանի վարչակարգի վրա ճնշում է գործադրում կեղծ հավատ տածելով, թե այն կփոխվի։ Նրա խոսքով՝ դա տեղի չի ունենա իրանական ՙհակազդեցության մշակույթի՚ պատճառով։ Իրանի հետ միջուկային գործարքից հրաժարվելով, Իսլամական հեղափոխության պահապանների կորպուսը հռչակելով ահաբեկչական կազմակերպություն, Իրանի դեմ պատժամիջոցները խստացնելով և եվրոպական կողմերին ստիպելով հրաժարվել իրենց ստանձնած պարտավորություններից` Թրամփի վարչակազմը տպավորություն է ստեղծում, որ վերջնարդյունքում ցանկանում է տապալել Իրանում գործող ռեժիմը,
համոզմունք է հայտնել ԿՀՎ նախկին տնօրենը։
Մերձավոր Արևելքում Թրամփի քաղաքականությունն աջակցության արժանացավ Պարսից ծոցի արաբական պետությունների կողմից, որոնց շարքում առաջատարը Սաուդյան Արաբիան է։ Մայիսի վերջին Մեքքայում այդ երկրների ներկայացուցիչների գագաթնաժողով է տեղի ունեցել, որի արդյունքում ընդունվել է հակաիրանական բանաձև։ Նրանում կոչ էր արվում Իրանի դեմ վճռական միջոցներ ձեռնարկել միջուկային ներուժի ստեղծում թույլ չտալու նպատակով։
Զուգահեռաբար Վաշինգտոնը ճնշումներ է գործադրում ՆԱՏՕ-ի իր դաշնակցի՝ Թուրքիայի վրա։ Ներկայացուցիչների պալատն, ի վերջո, ընդունեց մայիս ամսին Կոնգրեսում շրջանառության մեջ դրված բանաձևը, որը Թուրքիային կոչ է անում հրաժարվել C-400 համակարգեր գնելու գործարքից, հակառակ դեպքում սպառնալով պատժամիջոցներ կիրառել Անկարայի նկատմամբ։ ՙՌոյթերզ՚ գործակալության փոխանցմամբ՝ այս համակարգերը ձեռք բերելը կխարխլի ԱՄՆ-ի գլխավորած Հյուսիսատլանտյան դաշինքը։
Ներկայացուցիչների պալատի արտաքին հարաբերությունների հանձնաժողովի նախագահ Էլիոթ Էնգելն իր ելույթում ընդգծել է, որ արտաքին հարաբերություններում սա հազվադեպ երևույթ է, բայց սա սև-սպիտակի հարց է։ Երրորդ տարբերակ չկա։ Թուրքիան չի կարող միաժամանակ ռուսական սպառազինություն և ամերիկյան F-35 ունենալ։
Մերձավորարևելյան տարածաշրջանի քաղաքական զարգացումները, որպես կանոն, իրենց ազդեցությունն են ունենում մեր տարածաշրջանի, մասնավորապես թուրք-ադրբեջանական տանդեմի գործողությունների վրա։ Վերջինս նախիջևանյան ուղղությունում շարունակում է զարգացնել պատերազմի քարոզչությունը. ՙԱնխախտ եղբայրություն-2019՚ զորավարժությունների ավարտին՝ հունիսի 11-ին, Նախիջևանում հանդիպեցին Ադրբեջանի և Թուրքիայի պաշտպանության նախարարներ Զաքիր Հասանովն ու Հուլուսի Աքարը։ Հրապարակված տեղեկատվության համաձայն՝ նրանք քննարկել են տարածաշրջանում իրավիճակի զարգացման հնարավոր բեմագրերը։
Աշխարհաքաղաքական այս զարգացումների ֆոնին անսպասելի չէր ԵԱՀԿ գործող նախագահի անձնական ներկայացուցիչ Անջեյ Կասպշիկի այցը։ Հունիսի 11-ին Երևանում նրան ընդունել է ՀՀ վարչապետ Նիկոլ Փաշինյանը։ Պաշտոնական հաղորդագրության համաձայն՝ հանդիպմանը քննարկվել են հակամարտության կարգավորման գործընթացին և խաղաղությանը նպաստող մթնոլորտի ձևավորմանը վերաբերող հարցեր։
Անդրադառնանք վերջին շաբաթների ընթացքում շփման գծում արձանագրված` հրադադարի ռեժիմի խախտումներին։ ԱՀ նախագահի խորհրդական Տիգրան Աբրահամյանն օրերս հայկական լրատվամիջոցին տված հարցազրույցում նշել է, որ եթե ավելի վաղ փուլում Ադրբեջանի ակտիվությունն արտահայտվում էր հիմնականում ամրաշինական աշխատանքներով, ապա ներկայումս զուգահեռվում է հրադադարի ռեժիմի համեմատաբար մեծ խախտումներով։ Հատկապես վերջին 10 օրվա ընթացքում իրավիճակի սրացում է արձանագրվում։ Գործի են դրվել ականանետներ, հաստոցային ավտոմատ նռնականետներ, առավել ինտենսիվ են դարձել խոշոր տրամաչափի զինատեսակներից արձակված կրակահերթերը։ Ըստ խորհրդականի վերլուծության՝ ակտիվ են հատուկ նշանակության ստորաբաժանումները և նրանց կազմում գործող դիպուկահարների խմբերը։
Արցախի և Ադրբեջանի զինված ուժերի շփման գծում տեղի ունեցող զարգացումներից կարող ենք հետևություն անել, որ Բաքուն վերադառնում է իր անփոփոխ մարտավարությանը, այսինքն՝ Դուշանբեի պայմանավորվածությունից հետքայլ է անում։ Այս հանգամանքը, ըստ երևույթին, մտահոգել է Ռուսաստանին, ինչը երևում է ՌԴ արտաքին քաղաքական գերատեսչության ներկայացուցիչ Մարիա Զախարովայի կողմից մայիսի վերջին արված հայտարարությունից։ Նրանում ընդգծված էր, որ ղարաբաղյան խաղաղ կարգավորումը ՌԴ արտաքին քաղաքականության գերակա ուղղություններից է։ ՙՌուսաստանն աջակցողի դեր է կատարում այդ գործընթացում և կարծում եմ, առավելագույն նվիրումով է դա անում։ Ինչ-որ բան ստացվում է, ինչ-որ բան չի ստացվում՚,-ասել է Զախարովան։
Մոսկվան խոսում է իր արտաքին քաղաքական գերակայության մասին, իսկ ամերիկյան կողմի ուշադրությունը, ինչպես վերը նշեցինք, սևեռված է մերձավորարևելյան տարածաշրջանին։
Հավելենք, որ ԵԱՀԿ Մինսկի խմբի համանախագահների տարածաշրջանային վերջին այցի ժամանակ պայմանավորվածություն է եղել Հայաստանի և Ադրբեջանի արտգործնախարարների հերթական հանդիպում նախապատրաստելու մասին։ Առայժմ հայտնի չէ, թե որտեղ կհանդիպեն Զոհրաբ Մնացականյանն ու Էլմար Մամեդյարովը։ Այս պարագայում դա այնքան էլ էական չէ. նախարարների հանդիպմանը, որտեղ էլ միջնորդները կազմակերպեն, խաղաղության պահպանման ուղղությամբ ջանքերի գործադրումը դիտարկվելու է որպես առաջնային կարևորության խնդիր։