ԱԼԻԵՒԻ ԴԱՎՈՍԸ ՉՍՏԱՑՎԵՑ
Վահրամ ԱԹԱՆԵՍՅԱՆ
Հունվարի 20-ին, արարողակարգային ներկայությամբ պատվելով 30-ամյա վաղեմության դեպքերի ՙանմեղ զոհերի՚ հիշատակը եւ որեւէ քաղաքական հայտարարություն չանելով այդ կապակցությամբ՝ Իլհամ Ալիեւն ուղեւորվել է Դավոս՝ մասնակցելու տնտեսական համաժողովին։ Ադրբեջանի նախագահի համար մի քանի տարի առաջ Դավոսը պետք է դառնար մեծ քաղաքականություն մտնելու հարթակ։ Բենեֆիսը կազմակերպվել էր բավական ճոխ, Ալիեւն իր վրա էր վերցրել համաժողովի բոլոր մասնակիցների, այդ թվում՝ լրագրողների եւ անվտանգության աշխատակիցների սննդի կազմակերպման հոգսը։ Նրան ուղեկցում էին կինը՝ Մեհրիբան Ալիեւան, երկու դուստրը, կառավարության անդամներ, գործարարներ։ Նպատակ էր դրված Ադրբեջանը ներկայացնել որպես արդիական եւ համամարդկային քաղաքակրթության արժեքներ դավանող երկիր։
Արեւմուտքը, սակայն, բավարարվեց նրանով, որ մամուլում մի քանի հրապարակումներ եղան ադրբեջանական ազգային խոհանոցի, ավանդական հյուրասիրության մասին։ Համաշխարհային քաղաքական եւ գործարար վերնախավն Ալիեւին այդպես էլ չընդունեց իր ՙակումբի՚ անդամ։ Այդուհանդերձ, Ադրբեջանի նախագահը շարունակում է մասնակցել Դավոսի համաժողովին։ Պատճառը պարզ է։ Ազգային ինքնության եւ քաղաքակրթական որոնումների մեջ գտնվող Ադրբեջանը չի կարող որեւէ հնարավորություն բաց թողնել՝ եւս մեկ անգամ հիշեցնելու իր մասին։ Թեեւ այս անգամ էլ գործնականում ոչինչ չստացվեց։ Ամենաբարձր մակարդակի հանդիպումը, որ լոբբիստներին հաջողվել էր կազմակերպել Ալիեւի համար, կարճատեւ շփումն էր Լեհաստանի նախագահի հետ։ Ոչինչ չասող եւ, մանավանդ, չխոստացող երկխոսություն, որովհետեւ Լեհաստանը եւ Ադրբեջանը քաղաքակրթական բոլորովին տարբեր բեւեռներում են։ Ալիեւին մնում էր Դավոսում անոնսավորել մոտ ապագայում Ռուսաստանի նախագահի հետ հանդիպումը եւ որոշ ակնարկներ անել Բելառուսին նավթ վաճառելու հնարավորության թեմայով։
Տարեսկզբից, ինչպես հայտնի է, Ռուսաստանը Բելառուսին նավթ չի վաճառում։ Կողմերին չի հաջողվել գնի շուրջ պայմանավորվել։ Թե ինչու է Ռուսաստանը հետխորհրդային տարածքի արեւմտյան ռազմավարական ուղղությամբ միակ դաշնակից երկրի նկատմամբ տնտեսական ՙահաբեկչություն՚ իրականացնում՝ բոլորովին այլ թեմա է։ Բայց որ Ռուսաստանը Ղազախստանին խոչընդոտում է Բելառուսին նավթ վաճառելու հարցում՝ հայտնի է դարձել հենց ռուսական մամուլի հրապարակումներից։ Նման իրավիճակում խոսել Բելառուսին ադրբեջանական նավթ վաճառելու հեռանկարից՝ նշանակում է, ինչպես ասում են, տրորել Ռուսաստանի կոշտուկները։ Ունի՞ նման համարձակություն Իլհամ Ալիեւը։ Հազիվ թե, որովհետեւ նախ գնում է արտահերթ խորհրդարանական ընտրությունների, որոնց արդյունքները մի զգալի մասով կախված են ռուսական կողմից, երկրորդ՝ Դավոսում նրա մոտ ոչինչ չի ստացվել։
Քաղաքական ընդունելության մակարդակը գրեթե զրոյական է, տնտեսական պայմանավորվածությունների հիմնական գործընկերներն էլ ռուսական ընկերություններն ու բանկերն են։ Այս համատեքստում Բելառուսին ադրբեջանական նավթ վաճառելու հնարավորության մասին տեղեկատվական արտանետումներն, ինչպես կարելի է հասկանալ տոնայնությունից, հետապնդում են Պուտին-Լուկաշենկո բանավեճում որպես միջնորդ ներգրավվելու՝ Ադրբեջանի նախագահի ցանկությունը կողմերին փոխանցելու նպատակ։ Ստացվում է արտառոց դասավորություն՝ սլավոնական երկու երկրներ, որ նույն մշակույթի, լեզվի, ավանդույթների կրողն են, չեն կարողանում ընդհանուր հայտարարի գալ, եւ մուսուլմանական Ադրբեջանը փորձում է հաշտեցնել նրանց։
Փաստ է, որ Ադրբեջանի եւ Բելառուսի նախագահներին շատ բան է կապում։ Իլհամ Ալիեւը նաեւ անձնական լավ հարաբերություններ ունի Ռուսաստանի նախագահի հետ։ Բայց արդյոք դա բավարա՞ր ռեսուրս է, որպեսզի նա Պուտին-Լուկաշենկո բանավեճում ստանձնի հաշտարարի դերակատարություն։ Փորձագետները միաձայն պնդում են, որ ռուս-բելառուսական տնտեսական հակասություններն իրականում ածանցվում են քաղաքականից։ Խոսքն այսպես կոչված՝ միութենական պետության մասին է։ Կա տպավորություն, որ Ռուսաստանում սահմանադրական փոփոխություններ նախաձեռնվել են, քանի որ Լուկաշենկոն չի համաձայնել Ռուսաստան-Բելառուս միավորմանը եւ միասնական պետության նախագահի պաշտոնում Պուտինի ընտրությանը։
Այս դեպքում ի՞նչ է փորձում առաջարկել Ալիեւը, որի արեւմտյան բենեֆիսն, ինչպես ասվեց, ձախողվել է մի քանի տարի առաջ։ Ադրբեջանական փորձագիտական հանրությունը տագնապած է։ Մամուլի հրապարակումներն ավելի ու ավելի նյարդային են դառնում։ Կա՞ զգացողություն, որ հանուն սեփական իշխանության երկարաձգման՝ Ալիեւը կարող է միանալ հետխորհրդային տարածքը միավորելու պուտինյան նախագծին։ Այս հարցին դժվար է միանշանակ պատասխանել։ Առայժմ իրողություն է Ադրբեջանի արմատական ընդդիմության առաջնորդ Ալի Քերիմլիի ձեւակերպումը. ՙՆույնիսկ Պուտինն է գնում բարեփոխումների, իսկ Իլհամ Ալիեւը Հյուսիսային Կորեա է կառուցում՚։
Ալիեւի Դավոսը ձախողվել է հիմնավորապես։ Ո՞րն է լինելու նրա հաջորդ փորձը։
;