ԽԱՉՔԱՐ ԳՅՈՒՂԻ ՎԵՐԱԾՆՆԴԻ և ԶՈՀՎԱԾ ԱԶԱՏԱՄԱՐՏԻԿՆԵՐԻ ՀԻՇԱՏԱԿԻՆ
Էդիկ ԴԱՎԹՅԱՆ
ք. Հադրութ
Արևշատը Հադրութի շրջանի հարավային սահմանամերձ գյուղերից է, որի պատմությունը սկսվում է 14-րդ դարից։ Իր գոյության տարիներին երեք անգամ ենթարկվել է բռնագաղթի։ 1991 թվականի մայիսի 14-ին գյուղը բռնագաղթի հետևանքով հիմնահատակ ավերվել էր։ Այդ տարիներին գյուղում առկա էր 108 տնտեսություն, բնակչության թիվը` 310 մարդ։ Բռնագաղթի հետևանքով ավերվեց 108 բնակելի տուն, տասնյակ գյուղատնտեսական և հասարակական նշանակության օբյեկտներ։
Երկու տարուց ավելի գյուղը մնաց ազերների ձեռքին և հիմնահատակ ավերվեց։1994 թվականի հրադադարից հետո գյուղը նորից է վերականգնվում և շենանում։ Պետության և հովանավորների միջոցներով գյուղում կառուցվել են տասնյակ բնակելի տներ, բուժկետի, գյուղապետարանի, դպրոցի նոր շենքեր։ Գյուղը լրիվությամբ էլեկտրաֆիկցված է, կառուցվել է գյուղի ջրամատակարարման ներքին ցանցը, փորվել է արտեզյան ջրհոր, կառուցվել է ջրամբար։ Բնակչությունը օգտվում է ինտերնետ կապից։ Աշխատանքներ են իրականացվել գյուղամիջյան և լուսավորության ուղղությամբ։ Այժմ համայնքում առկա է 53 տնտեսություն, բնակչության թիվը` 202 մարդ։ Նորակառույց դպրոցական շենք են հաճախում 36 աշակերտներ, որոնց ուսուցմամբ զբաղված են 16 ուսուցիչներ։ Բուժական մանկաբարձական կետը ապահովում է բնակչության առաջնահերթ բուժսպասարկումը։
Գյուղի վերածննդի և զոհված ազատամարտիկների հիշատակը հավերժացնելու նպատակով, համագյուղացի, ռուսաստանաբնակ Վաչագան Ամիրջանյանի նախաձեռնությամբ, Մեծ Հայրենականում զոհված Արևշատցիների հուշարձանի հարևանությամբ կանգնեցվեց խաչքար- հուշարձան։
Հուշարձանի բացմանը ներկա էր գյուղի ողջ բնակչությունը, հեռուներում ապրող համագյուղացիններ, բարերար Վաչագան Ամիրջանյանը, Հադրութի վարչակազմի ղեկավար Կամո Պետրոսյանը, ԱՀ պետական նախարարի աշխատակազմի տարածքային կառավարման վարչության պետի տեղակալ Մարատ Հասրաթյանը, պաշտոնատար այլ անձինք։ Հադրութի Սուրբ Հարություն եկեղեցու հոգևոր հովիվ Տեր Մաթևոս քահանա Դրավանցի կողմից կատարվեց խաչքարի օծման արարողություն։ Միջոցառմանն իրենց սրտի խոսքն ասացին համայնքի ղեկավար Արթուր Հայրապետյանը, Հադրութի վարչակազմի ղեկավար Կամո Պետրոսյանը, համագյուղացի Աբրիկ Հակոբյանը և ուրիշները։ Նրանք շնորհակալություն հայտնեցին բարերարին դրվատանքի արժանի նախաձեռնության համար և հույս հայտնեցին, որ այդ նախաձեռնությամբ գյուղում կյանքի կկոչվեն այլ ծրագրեր ևս։ Բարերար Վաչիկ Ամիրջանյանը հավաստիացրեց, որ գյուղի շենացման և զարգացման գործում կձեռնարկի հնարավոր բոլոր միջոցները, որպեսզի այն վերականգնի նախկին համբավը թե՜ տնտեսական և թե՜ ժողովրդագրական առումով վերականգնելու համար։