ԹԱԼԻՇԻ ՎԵՐԱԾՆՆԴԻ ՄԵԿՆԱՐԿԸ ՏՐՎԵԼ Է
Նորայր Հովսեփյան
Հին Թալիշի հիմքի վրա բարձրանում է նոր Թալիշը: Տասնյակ ընտանիքներ արդեն վերադարձել են հայրենի գյուղ: Թալիշը վերադառնում է կյանքի հին ռիթմին: Տասնյակ երդիկներից նորից ծուխ է բարձրանում: Այս դեպքում ասվածն ավելի շատ փոխաբերական իմաստ ունի: Գյուղի նորակառույց շենք-շինություններն ու առանձնատներն արդեն բոլորովին այլ հարմարություններով են ապահովված:
Թալիշի նախկին համայնքապետը գնահատում է. գյուղի վերածննդի մեկնարկը տրվել է բավական շահեկան դիրքերից: Վերածնվող գյուղն ապահովված է համայնքի կենսագործունեությունն ապահովելու համար անհրաժեշտ բոլոր կառույցներով ու ենթակառուցվածքներով: ՙՍկսած դպրոցից, մանկապարտեզից, բուժկետից, հանդիսությունների սրահից՝ ամեն ինչ նորակառույց է, ապահովված ժամանակակից բոլոր հարմարություններով: Ընդ որում, բոլոր այդ շենք-շինություննեը կառուցված են գյուղի համեմատաբար ապահով հատվածում, այն հատվածում, որն անմիջապես չի դիտարկվում հակառակորդի կողմից,- ընդգծում է Մարտակերտի շրջվարչակազմի ղեկավարի տեղակալ Վիլեն Պետրոսյանը:- Նաեւ ենթակառուցվածքներն են կարգավորված: Էլեկտրաէներգիայի մատակարարման ցանցը լիովին վերականգնված է: Ջրամատակարարման ցանցը՝ եւս: Թալիշն այսօր անգամ ջրահեռացման համակարգ ու կոյուղի ունի, ինչը շատ քիչ գյուղական բնակավայրեր ունեն՚:
Հանրային նշանակության նորակառույցների մեծ մասը կենտոնական հրապարակի շուրջբոլորն են: Դպրոց, մանկապարտեզ, հանդիսությունների տուն: ՙՍրանք բոլորը նոր շենքեր են,- պատմում եւ ցույց է տալիս Թալիշի համայնքի նորընտիր ղեկավար Վարուժան Օհանյանը:- Անգամ այս ծառերն են նոր: Տնկվել են շինարարության ավարտին՚: Եվ քայլերը ճեմուղուց դեպի աստիճանաշարն է ուղղում: Աստիճանները դեպի Թալիշի համայնքապետարանն են տանում: Հիմնանորոգումից հետո այստեղ ոչ միայն աշխատանքային պայմաններն են բարելավվել, այլեւ ժամանցի հնարավորություններ են ստեղծվել:
Ներքեւի հարկում աշխատանքային հատվածն է. համայնքապետարանի գրասենյակը, հանդիպումների համար նախատեսված մեծ դահլիճը: ՙԵրկու սենյակ էլ ժամանցին է հատկացված: Մեկը` շաշկու, նարդու, շախմատի, մյուսն էլ` բիլիարդի համար: Հույս ունենք՝ շուտով դա էլ կլինի, որ երիտասարդները երեկոյան ևս ժամանցի հնարավորություն ունենան՚,- լավատեսությունը չի թաքցնում Վարուժան Օհանյանը: Վերածնվող համայնքում երիտասարդների թիվն աճում է: Մի քանի տասնյակ ընտանիքներ արդեն վերադարձել են հայրենի գյուղ: ՙԱյս պահին Թալիշում կա 46 ընտանիք, որ Ալաշանից են տեղափոխվել: Մի քանի ընտանիքի տեղափոխում էլ ընթացքի մեջ է՚,- մանրամասնում է մեր զրուցակիցը: Վերադարձող բոլոր ընտանիքներն ապահովված են բնակարաններով: Առանձնատների մի մասը նոր է կառուցվել, մի մասն էլ հիմնանորոգվել է: ՙ Հիմքից 10 առանձնատուն է կառուցվել: Եվս 44-ը հիմնանորոգվել է: Առանձնատները հանձնվում են բոլոր կոմունալ հարմարություններով՝ խոհանոցներով, սանհանգույցներով,- ընդգծում է Մարտակերտի շրջվարչակազմի ղեկավարի տեղակալ Վիլեն Պետրոսյանը:- Ընդ որում, բոլոր առանձնատներն էլ հանձնվում են ամբողջությամբ կահավորված՚:
Այս օրերին Թալիշում ՙԱրցախկապ՚-ի ներկայացուցիչներն են աշխատում: Կապով ապահովում են առաջնահերթ այն առանձնատները, որոնք արդեն բնակեցված են: ՙԱրդեն երկու օր է՝ աշխատում ենք: Ալեհավաքներ ենք տեղադրում: Առաջին հերթին աշխատանքներն իրականացնում ենք այն առանձնատներում, որոնց բնակիչներն արդեն ժամանել են: Աշխատանքների մի մասն արդեն ավարտել ենք, բայց դեռ էլի առանձնատներ ունենք, որոնք հերթի են սպասում՚,- կարճատեւ ընդմիջման ժամանակ պատմում է ՙԱրցախկապ՚-ի աշխատակիցներից Արտյոմ Հայրապետյանը:
Սահմանապահ համայնքն այսուհետ էլ կշարունակի մնալ ուշադրության կենտրոնում: Հիմնական ճանապարհները խճապատած են եւ կանոնավոր սպասարկվում են: Առաջիկայում հարցին հիմնավոր լուծում կտրվի թե՜ ճանապարհների, թե՜ ջրամատակարարման խնդրին: Հաջորդ տարվա ծրագրով նախատեսվում է նաեւ Մատաղիս-Թալիշ ճանապարհահատվածի ասֆալտապատման ծրագիրը: Նաեւ նախատեսվում է ջրի լրացուցիչ պաշարներ ուղղել դեպի Թալիշ, ինչը թույլ կտա լրիվությամբ լուծել գյուղի շուրջօրյա ջրամատակարարման հարցը:
Թալիշեցիներն էլ ձեռքները ծալած չեն նստում: ՙՄի մասը զիվորական ծառայության են անցել, ոմանք դպրոցում են աշխատում, ոմանք՝ համայնքապետարանում: Կարելի է ասել՝ զբաղվածության խնդիր չունենք՚,- գոհունակությունը չի թաքցնում երիտասարդ համայնքապետը: Մի փոքր ուշացումով, բայց հասցրել են աշնանացանի աշխատանքներն սկսել: ՙԱրդեն մոտ 500 հեկտար հերկ ենք կատարել, ավելի քան 250 հեկտարն արդեն ցանված է: Ճիշտն ասած՝ չորային եղանակներն են աշխատանքները հետաձգում՚,- օպերատիվ ցուցանիշներն է ի մի բերում Վարուժան Օհանյանը:
Մոտեցող ձմռանն ընդառաջ? շտապում են ավարտին հասցնել վարուցանքը: Հաջորդ տարվա ծրագրերն ավելի հավակնոտ են:
Նորայր ՀՈՎՍԵՓՅԱՆ