ՄՇԵՑՈՒ ԹՈՌ ԱԶԱՏԱՄԱՐՏԻԿԸ…
Սիրվարդ ՄԱՐԳԱՐՅԱՆ
Կարինե Աղեկյան անուն-ազգանունը քաջածանոթ է ոչ միայն արցախցիներիս։ Նա այն քաջազունների փաղանգից է, ովքեր ծանրակշիռ ներդրում են ունեցել արցախյան ազգային-ազատագրական պատերազմում… Եվ ինչպես ինքն է վկայում, հոգնել է պատերազմական օրերի մասին անվերջ պատմելուց։ Ինչ խոսք, ծանր է հիշել-վերհիշելը, առավել ևս, երբ դառն ու դաժան են եղել օրերդ, տարիներդ, երբ գրեթե ամեն օր մարտական ընկեր ես կորցրել։ Միտինգների ժամանակներից մինչև 1996 թվականը ծառայության մեջ էր։ Մի քանի անգամ վիրավորվել է` գլխից, ողնաշարից` հրազենային, բեկորային և այլն, սահմանի որ հատվածում էլ որ եղել է, երեք դուստրերը միշտ կողքին են եղել։ Այժմ նա նաև յոթ թոռների երջանիկ տատիկ է։
Արդեն 26 տարի է` Կ. Աղեկյանն ապրում է Քաշաթաղի շրջանի Աղավնո համայնքում։ Իմ այն հարցին, թե պատերազմի ավարտից հետո ինչ է փոխվել իր կյանքում, Կարինեն անկեղծանում է. ՙԵս պահանջատեր չեմ իմ երկրից, երկրիս օգնում եմ ուժերիս ներածին չափով, և աչքիս լույսն է նա, ով օգնում է հայրենիքիս հզորանալուն, ով սատարում է բանակիս վերազինմանը, հզորացմանն ու արդիականացմանը՚։
Պատերազմական դժնդակ տարիներն անվերջ հետապնդում են նրան, նրա աչքերի առջևով հաճախ են անցնում դաժան տարիների շղթայական պատկերները: Ամեն անգամ, երբ նայում է ՙՆվիրյալները՚ հաղորդաշարը, ծանոթ դեպքերն ու դեմքերը տակնուվրա են անում հոգին, ու նա ամեն անգամ, ինչպես առաջին անգամ, ցավում է վիրավոր տղաների համար, նորից ու կրկին ընկածների կորուստն է սգում: Կյանքի յոթերորդ տասնամյակը թևակոխած հայուհին, երբ առաջին անգամ Գորիսի երկրապահների հետ հայտնվեց Ղոչազում, սիրահարվեց տեղանքին, հրաշք բնությանը ու որոշեց երեխաների հետ միասին բնակություն հաստատել հենց այդտեղ։ Եկել էր վիրավորներին օգնելու… Մեկ-երկու օրով եկավ ու մնաց։ Ներկայում նրա երկու դուստրերն իրենց ընտանիքներով բնակվում են Աղավնո գյուղում, իսկ երրորդն ընտանիքով ապրում է Մատաղիսում։ Երրորդ կարգի հաշմանդամ Կ. Աղեկյանը մեկ տասնյակից ավելի պետական ու գերատեսչական պարգևների է արժանացել, ու, սխալված չենք լինի, եթե ասենք, որ իր անունը ոսկե տառերով է գրվել Արցախյան ազգային-ազատագրական պայքարի մատյանում։ Զավակներն ու թոռները կարող են գլուխները բարձր քայլել ու արարել նաև իրենց մոր ու տատի մասնակցությամբ ազատագրված հողում։
Ղոչազ, Ղուբաթլու, Հորադիզ… որտեղ էլ եղել է Կարինեն, միշտ ծառայել է նվիրվածությամբ, օգնել է մարտնչող տղաներին` ինչով և ինչպես կարող էր, և երբ տարիների հեռվից հայացք է ձգում, անցած օրերին, երանի է տալիս։ Չնայած սուղ էին պայմանները, ամեն օր զոհ ու վիրավոր էին ունենում, բայց միասնական ու կուռ էին նրանց շարքերը: Ընկերն ընկերոջ համար պատրաստ էր կյանքը զոհաբերելու, և զոհաբերում էր: Կարինեն բարձրաձայնում է Սպարապետի խոսքը. ՙԵս այս պատերազմին տվել եմ ինչ կարող էի և ձեռք եմ բերել հպարտություն,-ասում է Կարինեն և վերահաստատում:-Ես էլ ինչ կարող էի արեցի ու ձեռք բերեցի անանց հպարտություն։ Ես հիմա ապրում եմ պատերազմական հիշողություններով։ Գիշերները մեկ-մեկ վեր եմ թռչում ու փնտրում վիրավորներիս։ Ե՜վ բուժքույր էի, և՜ նռնականետորդ ու կապավոր՚։ Նա տիրապետում էր մի քանի զինատեսակների, այլ կերպ հնարավոր էլ չէր, ցանկացած պահի պիտի պատրաստ լինես մարտական ընկերոջդ փոխարինելու: Պաշտպանության բանակի կազմավորումից հետո Կարինեն շարունակել է ծառայել Գորիսի 3-րդ մոտոհրաձգային գումարտակներից մեկում, ու մինչև զորացրվելը ծառայել է նույն ստորաբաժանման կազմում։ Ազատամարտիկ Կարինե Աղեկյանն այսօր էլ իրեն շարքում է զգում, նա իր երկրի սահմանների անխոնջ ու արթուն պահապանն է։ Եվ Աստված չանի` թշնամին կրկին պատերազմ սանձազերծի, նա այսօր էլ առաջամարտիկների շարքում է:
Ապրիլյան պատերազմի օրերին, երբ Կարինեն առավ լուրը, իսկույն զանգեց Տեղ գյուղ` Գորիսի երկրապահի իր մարտական ընկերներին ու անվարան միացավ նրանց։ Մարդկանց թևերի տակ փափուկ բարձ դնող քաղաքագետներին Կարինեն չի հասկանում, երբ հակառակորդն ամեն օր կրակում է, ի՞նչ երկխոսելու մասին է խոսքը։ Ագրեսորը մինչև իր արժանի պատասխանը չստանա, չի լռելու… ՙՄենք հաղթել ենք, և այսօր պաշտպանում ու ապրում ենք մեր պապերի հողում, նրանցից ոչինչ չենք ուզում, ցավոք, մեր բախտը հարևանների հարցում այդպես էլ չբերեց,-բարձրաձայն մտորում է ազատամարտիկը։ Մշեցու թոռ Կարինե Աղեկյանն ասում է. ՙԻմ չորս հորեղբայրներն Անդրանիկի զինվորներն են եղել, այդ արյունն իմ մեջ եռում է։ Մեծ հորեղբայրս հազարապետ էր, երբ թուրքերը նրա ոտքը սղոցել ու իրեն ձորն են նետել, նա փաթաթել է ոտքը, ապրել ի հեճուկս, ու ավելի կատաղի է մարտնչել թուրքի դեմ։ Ես ոնց կարող եմ այդ ամենը մոռացության տալ, ու քանի շունչս ու հոգիս տեղն են, ես միշտ շարքում եմ լինելու, թող ոչ ոք չկասկածի՚։
Ներկայում Կ. Աղեկյանն Աղավնո գյուղի դպրոցում որպես զինղեկ է աշխատում։ Երկու տասնամյակից ավելի է, ինչ նա իր փորձն ու գիտելիքներն է փոխանցում մատաղ սերնդին, փոխանցում է մարտադաշտում սերտածը, պատերազմական թոհուբոհում սովորածը, ու եթե մի օր, այնուամենայնիվ, իր աշակերտները ստիպված լինեն կանգնել խրամատում, ապա Կարինե Աղեկյանի տեղը հաստատ իր սաների կողքին է։
;