ՍՏԵՓԱՆԱԿԵՐՏԻ ՀԱՄԱՅՆՔԻ ԱՎԱԳԱՆՈՒ 2020թ. ԱՌԱՋԻՆ ՆԻՍՏԸ
Էմմա ԲԱԼԱՅԱՆ
Հունվարի 23-ին քաղաքապետարանի նիստերի դահլիճում տեղի ունեցավ Ստեփանակերտի համայնքի ավագանու 2020թ. առաջին նիստը:
Օրակարգի կարևոր հարցերից էին համայնքի 2019թ. բյուջեի կատարման տարեկան հաշվետվությունը և 2020թ. բյուջեի հաստատումը: Զեկուցողի հաշվետվությամբ՝ 2019թ. համայնքի տարեկան ընդհանուր մուտքերը կազմել են 1637835 հազ. դրամ՝ պլանավորված 1805617.5 հազ. դրամի դիմաց, կատարողականը կազմում է 90,7 %: Ընդհանուր մուտքերի 30,4%-ը կազմել են սեփական եկամուտները, որոնց գծով պլանավորված 488984.0 հազ. դրամի դիմաց հավաքագրվել է 498535.0 հազ. դրամ: Կատարողականը կազմում է 102 %: Նախորդ տարվա համեմատ սեփական եկամուտներն աճել են 64313.8 հազ. դրամով:
Ըստ Ստեփանակերտի քաղաքապետ Դավիթ Սարգսյանի՝ 2020թ. մայրաքաղաքի զարգացման հիմնական ուղղությունները միտված են լինելու բնակչության կենսապայմանների բարելավման ու հարմարավետ միջավայրի ձևավորմանը, քաղաքի կառուցապատմանը, ենթակառուցվածքների զարգացմանը և քաղաքաշինական ծրագրերի իրականացմանը: Առաջնահերթ ծրագրերի թվում կլինեն ջրամատակարարման, ջրահեռացման, աղբահանության, սանմաքրման, բարեկարգման և կանաչապատման ծրագրերի արդյունավետ իրականացումը, բազմաբնակարան շենքերի բակերի բարեկարգումը, խաղահրապարակների շինարարությունը, ինչպես նաև հենապատերի և աստիճանների վերանորոգումն ու կառուցումը: Քաղաքի ենթակառուցվածքների բարելավումը և զարգացումը, քաղաքի տարածքի համաչափ զարգացման ապահովումը, բազմաբնակարան շենքերի մուտքերի և տանիքների վերանորոգումը, ինչպես նաև բնակարանային կոմունալ պայմանների բարելավումը: Առաջնահերթ ծրագրերի թվում կլինի նաև սոցիալապես անապահով ընտանիքների բնակարանային պայմանների բարելավումը:
Հիմք ընդունելով ԱՀ 2020թ. պետական բյուջեն, 2020 թ. նախագծով ծրագրվել է 1410581.2 հազ. դրամի չափով պաշտոնական դրամաշնորհ, ինչը 93947.7 հազ. դրամով ավելի է 2019թ. հաստատված ցուցանիշից։
2020-ի ծրագրերի իրականացման համար բյուջեով նախատեսվում է եկամուտների գծով՝ 1950481.2 հազ. դրամ, ծախսերի գծով՝ 1962088.2 հազ. դրամ, դեֆիցիտը՝ 11607 հազ. դրամ: Ըստ զեկուցողի՝ դեֆիցիտը կլրացվի 2019-ի պրոֆիցիտի հաշվին:
Այլ հարցերի շրջանակներում բարձրացվեց համայնքի մի շարք արվարձաններում՝ Աջափնյակ և Արեշ թաղամասերում, բնական գազի ցանցի անցկացման խնդիրը: Քաղաքապետ Դավիթ Սարգսյանի տեղեկատվությամբ՝ 2020-ի ծրագրով նախատեսված է ապահովել այդ թաղամասերը բնական գազով: Բարձրացրած կարևոր խնդիրներից էր նաև վերելակներն անխափան աշխատելու, դրանք նորով փոխարինելու, ինչպես և դրանց վերահսկողության, վերանորոգման հարցերը: Մասնավորապես, ընդգծվեց Հեքիմյան 14ա շենքի վերելակի հատակի վթարային վիճակը, որի համար անհրաժեշտ է արագ արձագանքում: Քաղաքապետն իրազեկեց, որ վերելակների փոխարինման համար գումարներ նախատեսված չեն, վերանորոգման համար էլ նախատեսված է 15 մլն դրամ: Նա ընդգծեց, որ վերը նշված վթարային դեպքերի համար մեծ ծախսեր չեն պահանջվում, և նման իրավիճակներում, անշուշտ, պետք է արագ արձագանքել: Նրա հանձնարարությամբ` հարց բարձրացնողը և համապատասխան բաժինը շտապ կզբաղվեն հարցի լուծմամբ:
Քննարկման առարկա դարձավ շինարարության թերի վերահսկողության հարցը, որի լուծման համար, ըստ քաղաքապետի, կխստացվի պարտադիր թույլտվության օղակը հենց շինարարության նախագիծը հաստատելու ընթացքում, ինչը հնարավորություն կտա սկզբից մինչև վերջ պատշաճ կերպով իրականացնել վերահսկողությունը:
Հաջորդ պատշաճ վերահսկողության պակասի մասին հարցը վերաբերում էր Հաղթանակի հրապարակից դեպի ՙԿարս՚ սրահը տանող աստիճանների անմխիթար վիճակին: Պարզվեց, որ դրանք վերանորոգել են 2-3 տարի առաջ, բայց արդեն նորոգման պահանջ է զգացվում:
Քննարկման հարց դարձավ նաև Թումանյան16 շենքի բարելավման վիճակը, որի համար իշխանության բոլոր ճյուղերը պետք է գան ընդհանուր հայտարարի. պահպանե՞լ որպես պատմական շենք՝ բարեկարգելով ներսի պայմանները, թե՞ քանդել: Հարցը լուծման փուլում է:
Հնչեցին նաև մի շարք հարցեր՝ կապված բակերի բարեկարգման, թղթաբանական քաշքշուկների նվազեցման, քաղաքացիների խնդիրներին արագ արձագանքման հետ:
;