ԱՀ ԱՇԽԱՏԱՆՔԻ, ՍՈՑԻԱԼԱԿԱՆ ՀԱՐՑԵՐԻ ԵՎ ՎԵՐԱԲՆԱԿԵՑՄԱՆ ՆԱԽԱՐԱՐ ՍԱՄՎԵԼ ԱՎԱՆԵՍՅԱՆԻ ՄԱՄՈՒԼԻ ԱՍՈՒԼԻՍԸ
Զարինե ՄԱՅԻԼՅԱՆ
Փետրվարի 11-ին ԱՀ աշխատանքի, սոցիալական հարցերի և վերաբնակեցման նախարար Սամվել Ավանեսյանը ԶԼՄ-ներին ներկայացրեց ոլորտի 2019թ. կատարված աշխատանքները։ Նախարարի պարզաբանմամբ` 2019թ. սոցիալական պաշտպանության և վերաբնակեցման ոլորտում ապահովվել է պետական քաղաքականությունը, կարևորվել սոցիալական իրավունքի լիարժեք պայմանների ստեղծումը, կատարելագործվել կենսաթոշակային և զբաղվածության համակարգերը, հաշմանդամների, տարեցների, կանանց ու երեխաների հիմնահարցերը, շարունակվել ոլորտի կարևորագույն ծրագրերը։
ԱՀ սոցիալական պաշտպանության ճշտված բյուջեն կազմել է 22 մլրդ 747,4 մլն դրամ, կատարողականը` 21 մլրդ 959,9 մլն դրամ։ Տարվա ընթացքում իրականացվել է ավելի քան 50 ծրագիր։ Աշխատանքներն ուղղված են եղել Արցախում ծնելիության աճի խթանմանը, երեխաների իրավունքների պաշտպանության համակարգի աստիճանական զարգացմանը, առանց ծնողական խնամքի մնացած երեխաների կենցաղային պայմանների բարելավմանը, բազմազավակ ընտանիքների բնակարանային խնդիրների լուծմանը, միգրացիոն և մի շարք գործընթացների կարգավորմանը։
Դիտարկվող ժամանակահատվածում շարունակվել է տրամադրվել երեխայի ծննդյան կապակցությամբ տրվող միանվագ նպաստը՝ ելնելով ընտանիքում ծնված հերթական երեխայի թվից. 1-ին երեխայի ծննդյան դեպքում՝ 100 հազ. դրամ, 2-րդ երեխայի՝ 200 հազ., 3-րդի՝ 500 հազ., իսկ 4-րդ և յուրաքանչյուր հաջորդ երեխայի դեպքում հատկացվում է 700 հազ. դրամ։ Ընդհանուր առմամբ՝ 2019թ. երեխայի ծննդյան կապակցությամբ միանվագ նպաստ է տրամադրվել 2405 հոգու. այդ կապակցությամբ պետբյուջեից հատկացվել է 721,7 մլն դրամ։ 2018թ. համեմատ նպաստառուների թիվը նվազել է 445-ով, իսկ ծախսերը՝ 110 մլն դրամով։ 2019թ. հունվարի 1-ից փոփոխություններ են կատարվել ծնելիության և բազմազավակության խթանման ծրագրում, այսինքն` դադարեցվել է ընտանիքներում ծնված 3-րդ և հաջորդ երեխաների ծննդյան դեպքում ժամկետային ավանդների բացումը և փոխարենը սահմանվել չափահասության նպաստ։ Արդյունքում` ընտանիքում ծնված 3-րդ երեխայի համար տրամադրվում է 500 հազ. դրամ, 4-րդ և յուրաքանչյուր հաջորդ երեխայի դեպքում՝ 700 հազ. դրամ։ Նշյալ գումարները տրամադրվում են արդեն 18 տարին լրացածներին։ Ս. Ավանեսյանի տեղեկատվությամբ՝ շարունակվել է 5 և ավելի անչափահաս երեխա ունեցող ընտանիքների համար նոր բնակելի տների հատկացման աշխատանքները, որոնք իրականացվում են կապիտալ ներդրումների ծրագրով։ 2020թ. հունվարի տվյալներով՝ հաշվառված է 449 ընտանիք։ Նախարարի պարզաբանմամբ՝ բնակարանները հատկացվում են սահմանված կարգով՝ 3 տարվա ընթացքում։ Բացառություն են կազմում ծրագրում ներառված 2016-2017թթ. ընթացքում 5 երեխա ունեցողները, որոնց ևս կհատկացվեն բնակարաններ և, հավանական է, բնակարանի հատկացման գործընթացը երկարաձգվի 3-5 տարով։ Ծրագիրը գործում է 2018թ. հունվարի 1-ից։ Այս տարի ևս պետբյուջեի միջոցների հաշվին հատկացվել է համապատասխան գումար` նշյալ ընտանիքների բնակարանային խնդիրները լուծելու համար։
Պետական նպաստների մասով 2019թ. ծախսվել է շուրջ 2363,6 մլն դրամ: Ծախսված գումարը 2018-ի համեմատ աճել է 33,3 մլն դրամով։ Այս նպաստների հասցեականության և վերահսկելիության բարձրացման համար ոլորտում ներդրվել է ՙՆպաստ՚ համակարգչային տեղեկատվավերլուծական համակարգը։ Նպատակն է` վերստուգել նպաստառուներին տրամադրվող գումարները, ինչպես նաև ճշտել վերջիններիս բնակության վայրերը, ու եթե նրանք հանրապետության սահմաններից դուրս են բնակվում, ապա սահմանված կարգով ցուցաբերել այլ մոտեցում։ Երիտասարդ ընտանիքների աջակցության ծրագրով շարունակվել է տրամադրվել ամուսնության միանվագ նպաստը՝ 150 հազ. դրամի չափով։ 2019թ. ծրագրից օգտվել է 1481 անձ, 2018-ի՝ 1587-ի դիմաց։ Նպաստառուների թիվը 2018թ. համեմատ նվազել է 106-ով։
Նախարարն անդրադարձավ նաև Երեխաների խնամքի և պաշտպանության գիշերօթիկ երկու հաստատություններին, որտեղ ընդգրկված է առանց ծնողական խնամքի մնացած, ինչպես նաև սոցիալապես անապահով ընտանիքների շուրջ 40 երեխա։ Կարևորվեց նրանց բարեկեցության և համապատասխան ընտանեկան պայմանների ստեղծումը, առողջության, կրթության և այլ հարցեր։ 2019-ին մշակվել է ԱՀ պետական ժողովրդագրական քաղաքականության հայեցակարգի իրականացումն ապահովող 2020-2022թթ. ծրագիրը։ Տարվա ընթացքում վերաբնակչի կարգավիճակ է տրվել Արցախում մշտական բնակություն հաստատած 25 ընտանիքի։ Նրանց տրվել է 8,8 մլն դրամի ֆինանսական արտոնություն։ Վերաբնակիչների և փախստականների սոցիալական խնդիրների լուծման նպատակով վերակառուցվում են բնակարաններ, հատկացվում է նաև շինանյութ` բնակարանային պայմանների բարելավման համար:
2019թ. Արցախում հաշվառվել է աշխատանք փնտրող 1630 մարդ, որոնցից 1518-ը ստացել է գործազուրկի կարգավիճակ։ Զբաղվածության բնագավառում շարունակվում են իրականացվել մի շարք ծրագրեր, որոնց շնորհիվ որոշ գործազուրկներ ապահովվում են աշխատանքով։ Նախարարության նախաձեռնությամբ գործազուրկների համար կազմակերպվում են մասնագիտական ուսուցման դասընթացներ, որոնց ավարտին տրվում են համապատասխան վկայականներ, ինչպես նաև առաջարկվում է աշխատանք։ 2017թ.-ից գործում է ՙՎարձատրվող հասարակական աշխատանքների կազմակերպման միջոցով գործազուրկների ժամանակավոր զբաղվածության ապահովման՚ ծրագիրը: Ս. Ավանեսյանի խոսքով՝ 3 տարվա ընթացքում իրականացվել է 29 ծրագիր, ծախսվել 14 մլն 300 հազ. դրամ։ Սակայն նախարարությունն ի վիճակի էր ֆինանսավորել մինչև 60 մլն դրամի աշխատանքներ։ Նա կոչ արեց համայնքներին ընդգրկվել այս ծրագրում, որպեսզի տեղերում լուծվեն առկա խնդիրները, իսկ գործազուրկներն էլ ապահովվեն գոնե ժամանակավոր աշխատանքով։
Խոսելով կենսաթոշակային ապահովության մասով, Ս. Ավանեսյանը նշեց, որ ներդրվել է նոր գործիք՝ նվազագույն կենսաթոշակ։ Շարքային զինծառայողների, սոցիալական և աշխատանքային կենսաթոշակների համար նվազագույն կենսաթոշակի չափը սահմանվել է 25 հազ. 500 դրամ։ Կրկնապատկվել է Հայրենական մեծ պատերազմի մասնակիցների ամենամսյա պատվովճարի չափը. այն սահմանվել է 100 հազ. դրամ։ Դիտարկվող ժամանակաընթացքում կենսաթոշակ է նշանակվել 1426 հոգու, վերահաշվարկվել` 3277 կենսաթոշակային գործ, մայրության նպաստ՝ 1554 չաշխատող կանանց համար։ 2020թ. հունվարի 1-ի դրությամբ՝ աշխատանքային, զինվորական (շարքային) և սոցիալական կենսաթոշակ ստացողների թիվը կազմել է 22123։ 2020թ. հունվարի 1-ի դրությամբ ԱՀ-ում հաշվառված է 8730 հաշմանդամ, որոնցից 384-ը` երեխա։ Ս. Ավանեսյանի պարզաբանմամբ՝ հաշմանդամների թիվը նվազել է. 2019թ. հունվարի 1-ի դրությամբ գրանցված էր 8854 հաշմանդամ։ Անցած տարի բժշկասոցիալական փորձաքննության է ենթարկվել 1576 քաղաքացի, որոնցից 345-ն` առաջին անգամ։ Նրանցից 1337 հաշմանդամի համար կազմվել են անհատական վերականգնման ծրագրեր։
Արցախի շուրջ 170 միայնակ տարեցներ և հաշմանդամներ տնային պայմաններում ստանում են սոցիալական սպասարկում, իսկ Ստեփանակերտի տուն-ինտերնատում խնամվող 75 միայնակ տարեցներն ու հաշմանդամները գտնվում են պետության լրիվ խնամքի ներքո։ Նախարարն անդրադարձավ հաշմանդամների պրոթեզաօրթոպեդիկ պարագաների հատկացման գործընթացին։ Սահմանափակ կարողություններով անձանց հատկացվել են նաև թիկնասայլակներ, լսողական սարքեր և այլ պարագաներ։ Սոցիալական խմբերին պատկանող շուրջ 454 քաղաքացի ստացել է առողջարանային բուժման և հանգստյան ուղեգրեր։ Նրանցից 17-ը մանկական ուղեղային կաթված ախտորոշմամբ հաշմանդամ երեխաներ են։
Տարվա ընթացքում նախարարությունը շարունակել է իրականացնել սոցիալական մի շարք ծրագրեր, որոնք վերաբերում են զոհված ազատամարտիկների ընտանիքներին տրամադրվող դրամական և այլ նյութական աջակցությանը, Հայրենական մեծ պատերազմի հաշմանդամներին, նույն պատերազմի մասնակիցներին և նրանց ընտանիքներին հատկացվող պարգևավճարներին և այլ օժանդակություններին։ Ս. Ավանեսյանը, ներկայացնելով բոլոր գործող և շարունակելի ծրագրերը, հավաստիացրեց, որ 2020թ. ևս կշարունակվեն իրականացվել այս նախագծերը, շարունակական կլինեն ժողովրդագրական իրավիճակի բարելավմանն ուղղված նպատակային ծրագրերը, դրանց դիտարկումներն ու գնահատումը, ոլորտի գերակա մյուս ուղղությունները։ Վերաբնակեցման և միգրացիոն քաղաքականության բնագավառում նախատեսվում է վերաբնակեցման պետական քաղաքականության նոր սկզբունքների մշակում, վերաբնակեցման կազմակերպման և իրականացման կարգի ու պայմանների փոփոխությունների իրավական ամրագրում։ Կակտիվացվի հայրենադարձության գործընթացը, և կգորձեն Ադրբեջանից բռնագաղթած ու Արցախում ապաստանած, որպես փախստական հաշվառված անձանց սոցիալական խնդիրների լուծմանն ուղղված ծրագրերը։ Նախատեսվում է ձևավորել սոցիալական բնակարանային ֆոնդ, որը կկարգավորի կյանքի դժվարին իրավիճակներով պայմանավորված անօթևան մնացած ընտանիքների բնակարանային պայմանների ժամանակավոր բարելավումը։
Վերջում Ս. Ավանեսյանը պատասխանեց լրագրողների բազմապիսի հարցերին, որոնք վերաբերում էին կուտակային կենսաթոշակներին, փախստականների բնակարանային պայմանների բարելավման խնդիրներին, բժշկասոցիալական փորձաքննության կենտրոնի կողմից իրականացվող գործառույթներին, աշխատանքային օրենսգրքին, աշխատաշուկային, գործազրկության և սոցիալական ոլորտի մի շարք այլ հարցերի։