ՀԱՄԱՃԱՐԱԿԱԲԱՆԱԿԱՆ ՎԻՃԱԿԸ ՇՐՋԱՆՈՒՄ ՎԵՐԱՀՍԿՎՈՒՄ Է
Էդիկ ԴԱՎԹՅԱՆ
ք. Հադրութ
Վերջին շրջանում հանրապետությունում մի շարք գերատեսչությունների ներգրավմամբ շարունակվում են իրականացվել համալիր միջոցառումներ` սուր շնչառական վարակների տարածումը կանխելու և հանրապետությունում համաճարակային վիճակը կայուն պահելու համար։ Հրատապ թեմայի շուրջ կիսվեցինք ՙՀադրուրի շրջանի համաճարակաբանության և հիգիենայի բաժին՚ ՊՈԱԿ տնորեն Արևիկ ԲԱԼԱՅԱՆԻ հետ։
- Տիկին Բալայան, ինչպիսի՞ն է համաճարակաբանական վիճակը շրջանում` կապված գրիպի և վերին շնչուղինների սուր վարակիչ հիվանդությունների հետ:
- Սուր շնչառական վարակները, այդ թվում գրիպը, ունեն սեզոնային բնույթ, գրանցվում են հիմնականում ուշ աշնանը և վաղ գարնանը։ Արցախում, ինչպես նաև Հադրութի շրջանում, գրանցվեց երկու պիկ` 2019 թվականի նոյեմբերին և 2020 թվականի փետրվարին։ 2020 թվականի մոնիտորինգի արդյունքներով գրանցվել է 1150 հիվանդ, որից 30-ը հոսպիտացվել է, հիմնականում` երեխաներ։ 2019 թվականին գրանցվել էր 604 դեպք։ Քանի որ երեխաները մեր ամենախոցելի խավն են, ԱՀ ԱՆ հրամանագրով 2019 թվականի նոյեմբերից դպրոցներում և նախադպրոցական հիմհարկներում իրականացվել է ամենօրյա մշտադիտարկում, ճշտվել է բացակաների ու հիվանդների քանակը, ինչն էլ հնարավորություն է տվել հսկելու համաճարաբանական իրավրճակը, իրչպես նաև իրականացվելիք աշխատանքների ծավալը։ Հաշվի առնելով գրանցված վերին շնչառական սուր վարակիչ հիվադությունների քանակն Արցախում, նախ մասնակի, այնուհետև բոլոր դպրոցներում և նախադպրոցական հիմնարկներում դադարեցվել են պարապմունքները։ Հադրութի համաճարակաբանության և հիգենայի բաժնի կողմից կազմակերպվել են այդ հաստատությունների ախտահանման աշխատանքներ։
Ուսումնական պարապմունքները շրջանի դպրոցներում մարտի 7-ից վերսկսվել է և մեր կողմից հորդորվել է ուսուցիչներին հետևողական լինել սանիտարահիգենիկ կանոնների պահպանման գործում, հիվանդ երեխաներին և ուսուցիչներին արգելել հաճախել դպրոց։
- Կա՞ արդյոք նոր կորոնավիրուսով հիվանդության հավանականություն շրջանում։ Ի՞նչ միջոցներ է ձեռնարկվում։
- Նոր կորոնավիրուսով վարակման հավանականությունը առկա է թե՜ մեր շրջանում և թե՜ տարածաշրջանում, քանի որ Իրանի Իսլամական Հանրապետության հետ շփումը ակտիվ է։ Շրջանից մի քանի վարորդներ մինչև 2020 թվականի մարտի 3-ը պարբերաբար այցելել են հարևան երկիր։ Նրանց նկատմամբ ՙՀադրութի շրջանային բուժմիավորումում՚ ՓԲԸ կողմից ամենօրյա հսկողություն է իրականացվում, ինչը շարունակվելու է մինչև 2020 թվականի մարտի 17-ը։
- Ինչպիսի՞ն է բուժհաստատությունների դեղորայքային և ախտահանման ապահովվածությունը։
- Ինչպես Հադրութի շրջանային հիվանդանոցը, այնպես էլ գյուղական բուժամբուլատորիաները և բուժական մանկաբարձական կետերը ապահովված են անհրաժեշտ դեղորայքով և ախտահանիչ նյութերով, սակայն դեռևս համալրելու անհրաժեշտություն կա, որպեսի պատրաստ լինեք ցանկացած զարգացման։ Այդ ուղղությամբ պատկան մարմինների կողմից տարված աշխատանքները տեսանելի են։ Հաշվի առնելով գրիպի և այլ շնչառական վարակների, կորոնովիրուսով փոխանցման օդակաթիլային մեխանիզմը, խորհուրդ եմ տալիս հետևել տարրական հիգենայի կաննոներին, ինչպես նաև հաճախակի օդափոխել փակ տարածքները, ու եթե շրջապատում կա գրիպով հիվանդ, պահպանել առնվազն 2 մետր տարածք, հագնվել եղանակին համապատասխան, սնվել, քնել լիարժեք, և, ամենից կարևորը` խուճապի չմատնվել։