ՖԻՆԱՆՍԱԿԱՆ ՕԺԱՆԴԱԿՈՒԹՅԱՆ ՃԿՈՒՆ ՀԱՄԱԿԱՐԳ
Վան ՆՈՎԻԿՈՎ
ՙԱմերիկյան համալսարանը գալիս է Արցախ՚. օրերս ֆեյսբուքյան այս հայտարարությունը նախնական, թյուր տպավորություն էր ստեղծել այն առումով, թե բուհն արցախյան մասնաճյուղ է բացում։ Մինչդեռ համալսարանի ներկայացուցիչները Արցախ էին ժամանել դիմորդներին հետաքրքրող հարցերի և մասնագիտական կողմնորոշման վերաբերյալ տեղեկատվություն և պարզաբանումներ ներկայացնելու նպատակով։ Հայաստանի Ամերիկյան համալսարանի բակալավրիատի կամ մագիստրատուրայի տարբեր բաժիններում ուսանելու համար արցախցի դիմորդներն ուսման վարձավճարի օժանդակության դիմելու հավելյալ հնարավորություն ունեն։
Դիմորդների ամենամյա հավաքագրման և համապատասխան տեղեկատվության տրամադրման ամենամյա գործընթացի շրջանակում օրերս Արցախում էին համալսարանի ընդունելության բաժնի տնօրեն Արինա Զոհրաբյանը, ինչպես նաև ընդունելության և ֆինանսական օժանդակության գրասենյակի ներկայացուցիչները։ Արցախի պետական համալսարանում, այնուհետև` նաև Ստեփանակերտի համար 3 դպրոցում, հետաքրքրվողների հետ կայացած հանդիպումների շրջանակում, Ամերիկյան համալսարանի ներկայացուցիչները պարզաբանել և մանրամասնել են ընդունելության համար դիմելու պայմանների ու կարգի, ժամանակակից աշխատաշուկայի պահանջներին համահունչ մասնագիտությունների ցանկի, ուսման վարձավճարների և այդ առումով առաջարկվող ֆինանսական օժանդակությունների բուհում առկա լայն հնարավորությունները։ Պատասխանելով Հայաստանի բուհական համակարգում Ամերկյան համալսարանի առանձնահատկությունների վերաբերյալ հարցին` Արինա Զոհրաբյանը տեղեկացրեց, որ բացի ամերիկյան կրթական ծրագրերով ու հավատարմագրմամբ ուսուցումը, իրենց բակալավրիական և մագիստրոսական մասնագիտությունների ցանկը ձևավորվում է աշխատաշուկայի պահանջների հիման վրա` հիմք ընդունելով հաստատության հետազոտական բաժինների համապատասխան ուսումնասիրությունների արդյունքը։ Ըստ այդմ, Հայաստանի Ամերիկյան համալսարանն առաջարկում է մասնագիտանալ աշխատաշուկայում ամենամեծ պահանջարկ ունեցող մի շարք մասնագիտություններով ? մասնավորապես բիզնեսի կառավարում, տվյալագիտություն, համակարգչային գիտություններ, ինժեներիա և այլն։ Մեր զրուցակցի հավաստմամբ, բակալավրիատի իրենց նախորդ շրջանավարտների ավելի քան 90 տոկոսը ներկայումս կամ աշխատում է կրթությանը համապատասխան ոլորտներում կամ` շարունակում ուսումը, համատեղելով աշխատանքն ու ուսումը։
ՙՄեր համալսարանում ուսուցանվող գիտելիքների մոտ 60 տոկոսը մասնագիտական է, մյուսները` ուսանողին բազմակողմանիորեն նախապատրաստում են ինչպես կյանքում, այնպես էլ աշխատանքում փայլուն ինքնադրսևորվելու՚,- ընդգծեց Ա. Զոհրաբյանը։
Ուսման վարձավճարների հարցում Ամերկյան համալսարանը ՀՀ քաղաքացիներին ավելի մատչելի պայմաններ է առաջարկում։ ՀՀ քաղաքացի և Հայաստանում երկարաժամկետ կացության կարգավիճակ ունեցող ուսանողների համար սահմանված տարեկան ուսման վարձավճարը մոտ 2 անգամ պակաս է օտարերկրացի ուսանողների համար սահմանված գումարից։ Ընդհանրապես Ամերիկյան համալսարանում ուսման վարձավճարների հարցում որդեգրած քաղաքականությունը ֆինանսական խնդիրների պատճառով ոչ մի ուսանողի բուհում կրթություն ստանալու հնարավորությունից չզրկելն է։ Այս նպատակով համալսարանն առաջարկում է ֆինանսական օժանդակության և կրթաթոշակների մի շարք հնարավորություններ իր ուսանողների համար։ Խոսելով բուհի կողմից ուսանողներին ընձեռվող ֆինանսական աջակցության հնարավորություններից, օժանդակության գրասենյակի ներկայացուցիչ Կարինե Շահնազարյանը տեղեկացրեց, որ Ամերիկյան համալսարանը, ըստ սոցիալական այս կամ այն կարգավիճակի, կամ կարիքի հաշվառմամբ ուսման վարձավճարների համար սահմանում է 20-90 տոկոս զեղչ։ Մինչ այդ, մասնավորապես արցախցի դիմորդները հնարավորություն ունեն նաև դիմելու Կրթության, գիտության և սպորտի նախարարությանը ուսման վարձի աջակցություն ստանալու նպատակով։ Գործում են նաև կրթաթոշակներ, որոնք հասանելի են ուսումնական առաջադիմություն ունեցող ուսանողների համար։ Ընդունելության բաժնի տնօրեն Արինա Զոհրաբյանի խոսքով` շատ հաճախ դիմորդները մտավախություն ունեն, որ ֆինանսական օժանդակության դիմելու հանգամանքը բացասաբար կանդրադառնա իրենց ընդունելության վրա, ինչն իրականությանը չի համապատասխանում։ Արցախցի դիմորդները շատ հաճախ ստիպված են լինում Ամերիկյան համալսարանի ընդունելությանը նախապատրաստվելու նպատակով մեկնել Երևան` համապատասխան մասնագետների մոտ պարապելու համար, մինչդեռ բուհի ներկայացուցիչը վստահեցնում է, որ Ամերիկյան համալսարանի ծրագրով Ստեփանակերտում գործող գրասենյակի շնորհիվ արդեն իսկ ստեղծված են համապատասխան բոլոր պայմանները, միայն արտաքինից բարդ թվացող իրենց ընդունելությանը նախապատրաստվելու համար։
;