ԱՌԱՋ ԵՎ ՀԵՏՈ
Նորեկ ԳԱՍՊԱՐՅԱՆ
Չէ, առանձնակի բան չկա, ուղղակի մի քիչ մտահոգ եմ։ Կարծում եմ` դուք նույնպես։ Չեմ թաքցնում, մեկ-մեկ հարցնում եմ ինքս ինձ՝ այս ի՞նչ է կատարվում մեզ հետ։ Հարցնում եմ ու ոչ թե չեմ կարողանում, այլ չեմ համարձակվում պատասխանել։ Ի՞նչ ասեմ։ Ասեմ ամեն ինչ հրաշալի՞ է, ասեմ իրար հանդեպ երբեք այսքան հոգատար չե՞նք եղել, այսքան միասնական, այսքան ամբողջ։ Վախենում եմ ծիծաղեք, ինձ էլ համարեք միամիտ ու երկնային տարածքներում ապրող մեկը։
Ասեմ, որ քիչ բան չեմ տեսել այս արևի տակ, քիչ մարդկանց հետ չեմ հաց կիսել, վիճել, ճանապարհ անցել։ Եղել է հուսահատ պահեր եմ ունեցել, գայթել եմ, չեմ տեսել այն, ինչ պիտի տեսնեի կամ տեսել եմ այն, ինչ չպիտի տեսնեի, մեկի համար եղել եմ, մյուսի համար՝ ոչ։ Միշտ չէ, որ ասածս ընդունվել է, որ ճանաչել եմ, որ ինձ հասկացել են կամ ես եմ հասկացել։ Պատահել է` չեմ կարողացել վայելել մերձավորիս ներելու աստվածային երանությանը… Քարկոծվել եմ, բայց կարողացել եմ չքարկոծել…Հայ մարդ եմ, հպարտությունս` տեղը, ոգիս՝ տեղը, պատմությունս՝ տեղը, թերություններս՝ տեղը… Քաղաքականության տարածքներից ու կուսակցություններից էլ, ինչքան հնարավոր է, դուրս։ Իմ երկրում էլ անծանոթ մեկը չկա։ Ամենափոքրիկ շեներում անգամ տարբեր տարիների հյուրընկալվել եմ և էլի երանի եմ տվել ինձ…Եվ չեմ զարմացել, երբ ոչ մեկից ու ոչ մի բանից չեն դժգոհել, երբ մեղադրել են...միայն ինքներն իրենց… Եթե, օրինակի համար, մեկին ասեի, որ այս երեսուն տարվա ընթացքում բան չենք արել, հաստատ, գժի տեղ կդնեին։ Ես դրանում մի գրամ անգամ կասկած չունեմ։ Դժգոհ են միայն մի բանից. լավ չենք արել, որ կոլխոզ ենք քանդել, որ ցաք ու ցրիվ ենք արել կոլեկտիվ ունեցվածքը…Լավ չենք արել, որովհետև, ասում են, եթե սովետի ժամանակներում մի քանի լավ բան կար, մեկը, հաստատ, էդ կոլխոզն էր…Ես, իհարկե, չեմ կարողանում չհամաձայնել, գիտեմ, ինչ էլ ասեմ, չեն ընդունելու։ Բայց մի անգամ նման փորձ արել եմ, ասել են կոլխոզի ժամանակ բոլորն էլ ապրում էին, գյուղն էլ տեր ուներ…Եվ ես թեման համարել եմ փակված։
Հիմա հարցնում եմ՝ էսքան բան տեսած մարդը իրավունք չունի՞ մտահոգվելու…հատկապես այս օրերին, երբ միանգամից այսքան մարդ ուզում է դառնալ ՆԱԽԱԳԱՀ, երկրի ղեկավար, առաջնորդ։ Ո՞վ կմտածեր։ Մի տեսակ չես կարողանում և չես էլ ուզում հավատալ։ Ես, օրինակի համար եմ ասում, չգիտեի, որ երկիր ղեկավարելն այդքան անհոգ բան է, այդքան հեշտ, այդքան, ո՞նց ասեմ, գայթակղիչ…Ուզում եմ ասել, եթե երկու թեկնածու ունենայինք կամ երեքը, լավ՝ չորսը, այսպես խոսելն ու զարմանալը, կարծում եմ, տարօրինակ կլիներ։ Վերջապես՝ բոլոր երկրներում էլ այդպես է, կապ չունի` մեծ, թե` փոքր։ Չգիտեմ, ինձ թվում է` բոլորի համար վիրավորական բան կա այս ամենի մեջ, արհամարհանքի նման մի բան։
…Ես, ունենալով առաջադեմ գաղափարներ, անբասիր վարք, կառավարման մեծ ունակություններ, չեմ կարող անտարբեր նայել երկրում տեղի ունեցող իրադարձություններին, հանդես գալ դիտորդի դերում, դրա համար էլ որոշել եմ առաջադրվել…
Չէ, իսկապես, ինչ-որ բան խախտվել է, դուրս եկել մեր իմացականի տարածքներից։ Էլի բան չունեմ ասելու, ժողովրդավարությունը ոչինչ չի արգելում, բայց, ախր, այդպես էլ շատ տխուր է, շատ անհասկանալի, համորեսկի որոշակի տարրեր պարունակող մի մոտեցում։ Լավ։ Հիմա արդեն ոչինչ չենք կարող փոխել և իմաստ էլ չունի։ Մարդը որոշել է Երկիր ղեկավարել, թող ղեկավարի։ Ժողովրդավարությունն ամեն ինչ էլ թույլատրում է։ Մենք ամեն ինչի պիտի պատրաստ լինենք։ Անակնկալները բացառվում են։ Մեզանից յուրաքնչյուրն ունի իր թեկնածուն, իր ծրագիրը, երկիրը զորացնելու իր տեսլականը…ուզում եմ ասել` այսպես, որ խորը մտածում ես, մեկը մյուսին չի խանգարում, մեկը մյուսին չի ժխտում։ Չնայած մարդկանց պահվածքը մեկ-մեկ այլ բան է հուշում, որը, բնականաբար, չի կարող չանհանգստացնել ընտրողին, չի կարող չհիասթափեցնել, նույնիսկ ստիպել փոխել նախօրոք կայացրած որոշումը…
Կարևորը մաս-մաս չանենք մեր ունեցածը, չբաժանենք, իրարից չհեռացնենք մարդկանց, չվիրավորենք, արհամարհանքի մասին էլ չեմ խոսում։ Բոլորը չեն խելոք, բոլորը չեն ի վիճակի անցյալն ու ներկան դնել իրար կողքի, տեսնել տարիների մեր չարչարանքի արդյունքը, մեր ընկնել-վերկենալը, մեր մեծահոգությունը, մեր իմաստուն միամտությունը։ Մենք չենք կարող նման լինել իրար, նայել նույն ուղղությամբ։ Մեկը ռամիկ է, մեկ ուրիշը` գիտնական, երրորդը՝ զինվորական, մյուսը՝ դպիր… Երկիրն էլ մեկը, հավասար բոլորինը։ Առանձին-առանձին պահելն՝ անհնար։ Ինչ էլ լինի, էլի բոլորս միասին պիտի խիզախենք, բոլորս միասին պիտի ցրտերի ու ցավի առաջն առնենք, բոլորս միասին էլ ապրենք։ Մեր թշնամին սահմանի մյուս կողմում է, բոլորիս թշնամին։ Այստեղ, մեր տանը մենք թշնամի փնտրեցինք, տանուլ ենք տալու, կորցնելու ենք, մեզանից հեռացնելու ենք նվաճածը։
Գյուղում ապրող ընկեր ունեի։ Պատերազմի մի ծայրից մյուս ծայրն անցած տղա։ Խելքը՝ տեղը, ուժը՝ տեղը, հեղինակությունը՝ միլիոն։ Գյուղում՝ ոնց որ թագավոր։ Բայց ինչ արեցինք, չհամաձայնվեց մասնակցել համայնքի ղեկավարի ընտրություններին, ասաց՝ հնարավոր բան չէ, ասաց, որ չի ուզում կորցնել ունեցած հեղինակությունն ու տեղը։ Եվ ես հասկացա, որ դժվար բան է գյուղ ղեկավարելը, որ մարդը չի ուզում հարաբերություններ փչացնել, ունեցածից հրաժարվել։ Ինչ ասեմ, կեցցե՛ ինքը։ Չնայած մինչև հիմա էլ կան մարդիկ, ովքեր շարունակում են համոզել, հորդորել, նույնիսկ՝ պարտադրել…Բան չկա, սովորել է դիմանալ ու դիմանալու է… համոզված է, որ ինքն այդպես ավելի կարևոր է գյուղի համար, ավելի հարկավոր…մի անգամ էլ ուղղակի ասաց.
-Ձեզ որ լսեմ, գյուղը բաժան-բաժան կլինի…
Եվ, չզարմանաք, մարդը փրկեց գյուղը։ Տղամարդավարի, զինվորավարի պաշտպանեց։ Կանգնեց յուրաքանչյուրի կողքին, յուրաքանչյուրի հետ տքնեց, ծառ տնկեց, ջուրը հասցրեց գյուղ, հող մշակեց, տուն շինեց, արահետը դարձրեց ճանապարհ։ Այնպես որ այդպես էլ է լինում, ուզում եմ ասել՝ երկիր սիրող մարդն այդպես է ապրում։
Հիմա մեր այս ընտրություններն են։ Արցախի Հանրապետության տասնչորս քաղաքացի, մի քանիսին, ընդհանրապես, չեմ ճանաչում, մտածում է, որ կարող է ղեկավարել Երկիր, որ միայն ու միայն նախագահի պաշտոնն է հնարավորություն տալիս օգնել մերձավորին, շենացնել երկիրը, վերացնել աղքատությունն ու անարդարությունը, ավելի ու ավելի զորացնել բանակը, աշխարհին էլ ստիպել, ճանաչել Արցախի անկախությունը։ Իսկապես վատ չէ, ես կասեի, նախանձելի էլ է, թեպետ, մի տեսակ, մեղքս ինչ թաքցնեմ, մինչև վերջ չեմ կարողանում հավատալ։ Խոսքն, իհարկե, բոլորի մասին չէ։ Բայց մեկ է, երբ 156 հազարանոց երկիրդ ու 14 թեկնածուին, նաև՝ պատգամավորության 361 թեկնածուին բերում դնում ես իրար կողքի, ինչքան էլ քեզ չարչարում ես, լուրջ պատկեր չես կարողանում ստանալ, աբստրակտ ինչ-որ բան է ստացվում, հասկանալի երևի միայն բարձր ինտելեկտ ունեցողներին։ Ես այդ շարքում, բնականաբար, չկամ և երբեք էլ չեմ լինելու։ Մարդ ուղղակի ուզում է բացականչել՝ կեցցե՛ ժողովրդավարությունը… Դա էլի ոչինչ, ինձ ավելի շատ այդ տասնչորս թեկնածուներից յուրաքանչյուրին շրջապատող իմ հայրենակիցների վիճակն է մտահոգում, այդ տասնչորս մեծ ու փոքր մասի բաժանված հասարակությունը։ Կներեք, բայց չեմ կարծում, որ այս ամենի մեջ հասուն դատողություն կա։ Ու՞մ կողքին կանգնեմ, որ մյուսները չմեղադրեն…վերջապես, մեկին պիտի ընտրե՞մ, չէ՞, իսկ մյուս տասներեքը՞…նրանց ի՞նչ անեմ, որ փրկվեմ անեծքից, ուշունցից, չդառնամ դավաճան, անհայրենասեր, եսակենտրոն, կարճամիտ ու չգիտեմ էլ ինչ…Մի՞թե տխուր չէ, մի՞թե մենք սրան էինք արժան…Չեմ կարծում։ Սա փորձություն է, դիմակահանդես է, խաղ…որտեղ հաղթող ու պարտվող չկա, ավելի ազնիվ կլիներ ասել` բոլորն էլ տանուլ տվող են, հաղթելը բացառված է…
Եվ ամենաանընդունելին՝ հակաքարոզչությունը, իրար վիրավորելը, մեղադրելը, հնի ու նորի հասկացությունը, անցյալի ամբողջական ժխտումը, չերևացող, անշոշափելի նորի գովերգությունը… այդ ամենը՝ հենց մի քանի մասի բաժանվածի միջոցով։ Հետո ի՞նչ եք անելու, ո՞ւմ եք մեղադրելու՜։ Էս մեր երկիրը, էս էլ՝ մենք` մեր հոգսերով ու չարչարանքով, մեր պատերազմահոտ սահմաններով ու ցավով, մեր արածով։ Մեկ-մեկ իրար կողքի, մեկ-մեկ էլ՝ բաժան։ Հաճախ ոչինչ չտեսնող, նաև ավելորդ գովերգող։
Չասեմ ում եմ ընտրելու ես, ազնիվ չէր լինի։ Թաքցնելու բան չունեմ, ընտրելու եմ նրան, ով ժողովրդի անունից չի խոսում, ով հակաքարոզությամբ չի զբաղվում, ով ինքն իրեն անցյալից չի առանձնացնում, ով մյուս թեկնածուներին չի մեղադրում ու վիրավորում, ով գործում է միայն ու միայն անանձնականի տարածքներում, ում ծրագրերը համոզիչ են ու իրագործելի, ով սերունդների հավաքականության մեջ է տեսնում առաջմղիչ գաղափարը, ով ի վիճակի է լինելու պահել ու պաշտպանել ժառանգածը…ով ընտրություններից հետո լինելու է բոլորի նախագահը…մի բան, որը, ցավոք, բոլորին չէ տրված…
ՎԵՐՋԱԲԱՆԻ ՓՈԽԱՐԵՆ. Երանի ընտրություններից հետո համոզվենք, որ չկան հաղթողներ ու պարտվողներ և բոլորս միասին շնորհավորենք ընտրված առաջնորդին…ուզում եմ ասել, եթե, իսկապես, իմաստնացել ենք այսքան ցավից ու չարչարանքից, այդպես էլ պիտի անենք… բոլոր մյուս տարբերակներն այլ բան հուշելու իրավունք ունեն…