ԵՐԲ ԽԱՂԸ ԳՐՈՇ ՉԱՐԺԵ
Սոֆի ԲԱԲԱՅԱՆ
Որքան մոտենում են նախագահական և խորհրդարանական ընտրությունները, այնքան բորբոքվում են կրքերը: Չգիտես ինչպես է ստացվում, որ շատերն արդեն կողմնորոշվել են, թե ում են ընտրելու, երբ ընտրապայքարը դեռ չի սկսվել:
Համատարած թշնամության, կասկածամտության, անկեղծության հանդեպ անվստահության և, առհասարակ, մարդ տեսակի անձնային չար որակների լիարժեք դրսևորման համար բավական բարենպաստ պայմաններ են ստեղծվել: Խմբավորումներ են առաջանում անգամ ընկերական շրջապատում ու ընտանիքներում: Ամեն մեկն իր ՙճշմարտությունն՚ է առաջ տանում` արհամարհելով դիմացինի օբյեկտիվ փաստարկները: Առողջ դատողությունն ու տարրական տրամաբանությունը երրորդական պլան են մղվում: Տպավորություն է ստեղծվում, որ ոմանց համար առաջնային են անձնական շահը, սեփական ամբիցիաների վրա հիմնված ազարտային մրցակցությունն ու թշնամական տրամադրվածությունը հակառակ թիմի հանդեպ: Ամեն մեկն իր պարտքն է համարում հորինել հերթական սուտն ու հրամցնել հանրությանը որպես բացարձակ ճշմարտություն: Ի տարբերություն հին ու բարի հեքիաթների` այս հորինվածքները մեկը մյուսից զազրելի են, տհաճ, երբեմն ճշմարտանման, երբեմն էլ` ծիծաղելի: Մեկն իր շրջապատի ոգևորվածության վրա հենվելով հայտարարում է, որ իր թիմն է հաղթելու, մյուսը չանցկացված սոցհարցման ՙարդյունքներն՚ է հրապարակում, մյուսն էլ թե` ընտրությունները կանխորոշված են…Ո՞ւմ են պետք այս ստերն ու կեղծիքները: Պարզ չէ: Բայց այն, որ այս ֆոնին պարզ ու հասարակ քաղաքացին ինքն իրեն օտարացած և ինչ-որ տեղ էլ ՙխաղից դուրս՚ է զգում, անհերքելի է:
Սովորաբար մարդիկ կաղապարվում են իրենց սուբյեկտիվ ընկալումների մեջ փառասիրության պատճառով: Սեփական կարծիքի անկրկնելի ու անհերքելի լինելու աստղային ՙհիվանդությունը՚ արգելափակում է մարդու վերացական ու գործնական մտածողությունն ու զգայունակությունը, ինչը դժվարացնում է լսել դիմացինին, ով նաև միգուցե փոքր-ինչ ավելի բանիմաց է իրենից: Ախր փառամոլը ո՞նց ընդունի, որ իր ՙփայլուն՚ ուղեղից այն կողմ էլ միտք կա: Ինքնասիրահարվածը սեփական չկայացած ամբիցիաներն արդարացնելու համար կենտրոնանում է մեկի վրա, ով կկարողանա իրականացնել իր երազանքները: Այսկերպ կերտվում են նորօրյա կուռքերը, ինչպես միշտ աստվածացվում է մարդը. միայն սա է արժանի, միայն նա է, որ կփրկի մեր երկիրը, միայն...: Սոցցանցերը հեղեղված են իրենց պաշտամունքի առարկա հանդիսացող մարդու կամ կուսակցության նկարներով ու լոզունգներով: Ակամայից հիշում ես՝ կեցցե Լենինը, կեցցե Ստալինը, կեցցե Սովետական Միությունը: Մի՞թե մոռացել ենք ոչ հեռավոր անցյալը: Պաշտամունքի առարկա հանդիսացող մարդիկ էլ, լավագույն դեպքում, ընդամենը կրքերի դեմ պայքարող են կամ, հակառակը, իրենց կրքոտ բնությամբ վարակողներ: Արժե՞, արդյոք, կիսատ-պռատ տեղեկատվությունից ու շուկայական մակարդակի բամբասանքներից ելնելով` պարփակվել որոշակի ՙհավատամքների՚ մեջ և ընդունելով անմիտ ջայլամի կեցվածքը` հերքել բոլորին, ամեն ինչ:
Կարևոր այս ժամանակաշրջանում ավելորդ զգոնությունը չի խանգարում: Ինչպես Առակաց գիրքն է ասում` ողջամտությամբ ընթացողն ապահով է: Ազգը սիրողը, երկրի ապագայի մասին մտահոգվողը պարտավոր է գոնե լսել բոլոր թեկնածուներին, հաշվի առնել նրանց անցյալը, նրանց գիտելիքները, բարոյականությունը, մարդասիրությունը, հավատքը, իդեալները, ի վերջո, մարդկային կերպարը: Եթե ծանոթ-բարեկամ սկզբունքով ընտրենք մեր ղեկավարին, կտուժի երկիրը, եթե անգամ մենք կարճ ժամանակով բարգավաճենք: Ի վերջո, չմոռանանք որ ՙՏիտանիկի՚ մեջ շատերն էին բարգավաճ, բայց երբ այն խորտակվեց, աղքատ թե հարուստ հավասարվեցին: Եթե սուտ խոստումներով ընտրենք, կշահի միայն ստողը, իսկ խաբվածներն ավելի խղճալի վիճակում կհայտնվեն. չէ՞ որ ստիպված են լինելու առաջիկա տարիներին իրենց արածն էլ ինչ-որ կերպ արդարացնել:
Քանի դեռ ժամանակ ունենք, լարենք մեր ողջախոհությունն ու բարոյականությունը, կշեռքի նժարին դնելով` ամեն ինչ ծանրութեթև անենք, չարն ու չարյաց փոքրագույնը, բարին ու ամենաբարին: Հիշենք նաև` նա, ով արժանի է, կեղծ ճանապարհով չի ընթանա, նրա հոգին ու խիղճը մաքուր են: Երբևէ տեսած կա՞ք, որ գերազանց գիտելիքներ ունեցող ուսանողը կաշառի դասախոսին: Եթե անգամ մի փոքր ցածր գնահատական ստանալու վտանգ լինի, միևնույն է, նա հանգիստ է, խաղաղ: Ուստի, ով գնում է զարտուղի ճանապարհներով՝ վերամբարձ խոստումներով, ստում է, ծածկելու շատ բան ունի և մեծ, շատ մեծ շահ: Արժանի մարդը կեղծելու, մրցակցի վրա ցեխ շպրտելու, իր անձի շուրջ լեգենդներ հյուսելու, իր ճառերում զգացմունքային մարդկանց վրա խաղադրույքներ անելու կարիք չունի:
Լավ կլիներ` հատկապես երիտասարդները կարողանային լսել իմաստուն մարդկանց, մտավորականներին (իհարկե ոչ նրանց, ովքեր նույնպես անձնական շահեր ունեն/) ծանրութեթև անեին ամեն ինչ, հաշվի առնելով նաև, որ մենք դեռևս պատերազմական գոտում ենք ապրում, ուստի պետք է ոչ թե այսօրվա համար ընտրել ու ընթանալ անհատական ամբիցիաներով, այլ հայրենիքի շահերով:
Ընտրապայքարը դեռևս առջևում է: Զինվենք համբերությամբ, լսենք բոլորին, հարգենք մեկս մյուսին, մեզ իմաստունի տեղ դնելով` ջայլամի կեցվածք չընդունենք, հավատանք Աստծուն, աղոթենք ներկայիս իշխանությունների համար, որպեսզի կարողանան ապահովել թափանցիկ ու արդար ընտրություններ, և ապագա իշխանությունների համար, որպեսզի գոնե կոտրած տաշտակի առջև չդնեն մեր մեծ գնով փրկած Հայրենիքը: