ԲՆԱԿԱՐԱՆԱՇԻՆՈՒԹՅՈՒՆ ԵՎ ԼՈՒՍԱՎՈՐՈՒԹՅԱՆ ՑԱՆՑՈՎ ՆՈՐ ՈՒ ԱՆՎՏԱՆԳ ՃԱՆԱՊԱՐՀՆԵՐ
Արցախում տեղահանված ընտանիքների համար բնակարանաշինության, ներհանրապետական ու միջհամայնքային նշանակության ճանապարհաշինության ու ճանապարհների լուսավորության ցանցի ստեղծման, ինչպես նաև շինարարական լայնածավալ աշխատանքների ներկա ընթացքի և այլ մանրամասների վերաբերյալ ՙԱզատ Արցախ՚-ի հարցերին պատասխանում է Արցախի Հանրապետության Քաղաքաշինության նախարար Արամ Սարգսյանը։
-Պատերազմից հետո Հանրապետությունում նկատվում է ավտոճանապարհների բարեկարգման և ասֆալտապատման աշխատանքների աշխուժություն։ Ներհամայնքային ու ներհանրապետական նշանակության մասնավորապես ի՞նչ ճանապարհներ են վերանորոգվում կամ կառուցվում։ Դրանցից` որո՞նք են նորերը, որոնք համեմատաբար կարճ ու անվտանգ երթուղի կհանդիսանան: Մասնավորապես՝ խոսքը վերաբերում է նաև Ստեփանակերտ-Մարտակերտ ավտոճանապարհին: Քանի՞ տոկոսով են իրականացվել շինաշխատանքները։ Ե՞րբ շահագործման կհանձնվեն նոր ճանապարհները։
-Ճանապարհների շինաշխատանքներն սկսված են եղել մինչև պատերազմական գործողությունները և շարունակվում են նաև պատերազմից հետո։ Ներկայումս ընթացքի մեջ են Մարտակերտ-Ներքին Հոռաթաղ-Ծաղկաշեն-Վարդաձոր-Ճանկաթաղ ներհանրապետական նշանակության ճանապարհի կառուցման աշխատանքները, որոնք ավարտվելու են 2022 թվականին։ Այս նոր ճանապարհի կառուցումը 25 կմ-ով կրճատելու է Ստեփանակերտ-Մարտակերտ ճանապարհը, որի շնորհիվ նաև զարգացման հնարավորություններ կստեղծվեն ճանապարհին կից գյուղերի համար։ Շինարարական այս աշխատանքներն սկսել ենք միաժամանակ 3 կազմակերպությունների հետ համատեղ՝ Քարավան ՓԲԸ, Ճանշին ՓԲԸ, Վերածնունդ ՍՊԸ։ Ասֆալտապատվել է մայրուղուց Մաղավուզ գյուղ տանող ավտոճանապարհը, Գետավան-Հաթերք ճանապարհից դեպի Զարդախաչ գյուղ տանող ավտոճանապարհը, իսկ Վերին Հոռաթաղ, Կոճողոտ, Վաղուհաս, Հարությունագոմեր, Խնձրիստան, Հիլիս, Առաջաձոր, Քերթ, Ստեփանակերտ-Խնածախ-Այգեստան գյուղ տանող և Բերքաձոր գյուղի խաչմերուկից Ասկերան տանող ավտոճանապարհների վերակառուցումն ավարտվել է։ Ընթացքի մեջ են Կաղարծի և Թաղավարդ համայնքների ճանապարհների ասֆալտապատման աշխատանքները, նաև վերակառուցվում են Աջափնյակ-Փրմքե-Դահրավ ճանապարհները, որոնք առաջին փուլում նախատեսված են խճապատել։ Ստեփանակերտում փողոցների մի մասը, որտեղ աշխատանքներն սկսել ենք մինչև պատերազմը, արդեն ավարտել ենք ու սկսել թաղամասերի բարեկարգումը։ Բարեկարգվում են 15 փողոցների ու թաղամասերի հարակից տարածքներ։ Ընթացքի մեջ գտնվող ճանապարհների շինաշխատանքների մեծ մասը մինչև տարեվերջ կավարտվի։
-Մեր տեղեկություններով՝ շարունակական աշխատանքներ են տարվում նաև ներհանրապետական ճանապարհների լուսավորության ցանցի ստեղծման ուղղությամբ։
-Խոշոր 3 ներհանրապետական ճանապարհների լուսավորության ցանց է ստեղծվել։ Մասնավորապես՝ Ստեփանակերտ-Ասկերան ներհանրապետական ճանապարհի լուսավորությունն արդեն ավարտվել է, Ստեփանակերտ-Կարմիր Շուկա և Ստեփանակերտ-Լիսագոր ճանապարհների լուսավորությունն ընթացքի մեջ է։ Իրականացվել է Թաղավարդ, Սզնեք, Շոշ, Մխիթարաշեն, Սարուշեն համայնքների լուսավորությունը, իսկ Կարմիր Շուկա համայնքի լուսավորության ցանցի ստեղծման մեկնարկը շուտով կտրվի։
-Ի՞նչ փուլում են պատերազմական գործողությունների հետևանքով վնասված կամ հիմնովին ու մասնակի ավերված բնակելի տների, շենք-շինությունների վերակառուցման աշխատանքները։ Հաշվառումն ավարտվե՞լ է, թե՞ շարունակվում է։ Մինչ այժմ քանի՞ այդպիսի բնակելի տուն և շենք- շինություն է գրանցվել։ Դրանցից քանիսի՞ վերանորոգումն ու վերակառուցումն է ավարտվել և քանի՞սն են ընթացքում։
-Պատերազմական գործողությունների հետևանքով՝ հրետակոծությունից վնասված 8155 շենք-շինություն կա, որից ավարտված են 1350-ի վերանորոգման աշխատանքները, ընթացքի մեջ է 984-ը, նախատեսվում է 605 օբյեկտում շինարարական աշխատանքներ իրականացնել: Համապատասխան շինանյութ է տրամադրվել և վերանորոգում իրականացվել 2814-ում, այսինքն`ենթակա է ուսումնասիրման 765 տուն։ Հիմնական մասը կավարտվի մինչև տարվա վերջ։
-Հաշվի առնելով բնակարանաշինական աշխատանքների ներկա ցուցանիշներն ու ընթացքը /ի դեպ, կա՞ն խնդիրներ ու խոչընդոտներ, թե՞ շինարարությունն ընթանում է նախանշված ժամանակացույցով/, մինչև տարեվերջ, ընդհանուր առմամբ, քանի՞ բնակարան կհանձնվի շահագործման, որտե՞ղ և ու՞մ։
-Նոր բնակարանների շինարարության համար մեծ ծրագիր է սկսված, որի մի մասն այս տարի կավարտվի։ Շինարարական աշխատանքներին խոչնդոտող խնդիրներ չկան։ Ընդհանուր առմամբ՝ մեկնարկած բնակարանաշինության աշխատանքները բավարար տեմպերով են ընթանում։ ՀՀ-ից վարպետների խմբեր են ժամանել։ Շահագործման է հանձնվել Ստեփանակերտի Կամո 2-րդ նրբանցքում 1 շենք՝ 9 բնակարանով, Կաղարծիում՝ 14 բնակարան։ Մինչև տարվա վերջ շահագործման կհանձնվի Հովսեփավանում` 30 առանձնատուն, Ասկերանում՝ 1, Կարմիր Շուկայում՝ 5, Ճարտար քաղաքում՝ 3-հարկանի 9 բնակարան ունեցող շենք, Ստեփանակերտի Թումանյան փողոցի մի թաղամասում ՝ 153-բնակարանոց բնակելի շենք, մյուսում՝ 106, Առաքելյան փողոցում, նախկին 6-րդ դպրոցի տարածքում՝ 30-բնակարանոց բնակելի շենք, Ասկերան քաղաքում՝ 38 բնակարան ունեցող 3 շենք։ Մինչև տարեվերջ շահագործման կհանձնվի 371 բնակարան։
-Ստեփանակերտի Տիգրան Մեծ փողոցի հարակից տարածքում ու Աջափնյակ թաղամասում կառուցվող բազմաբնակարան շենքերի շինաշխատանքներից խոսենք։ Քանի՞ բնակարան կունենան այդ թաղամասերը։
-Ստեփանակերտի Տիգրան Մեծ փողոցի հարակից տարածքում սկսվել է նոր թաղամասի կառուցում, որի վերջնաժամկետը նախատեսված է 2023 թվականին։ Առաջին փուլում կկառուցվի 6 մասնաշենք, որից 3-ի շինաշխատանքներն սկսված են։ Առաջին փուլն ավարտելուց հետո կունենանք 9- և 12-հարկանի շենքեր՝ 224 բնակարանով։ Աջափնյակ թաղամասում օրերս սկսել են հողային աշխատանքները, լինելու է 4-հարկանի 15 շենք։ Այս թաղամասի կառուցման ավարտը նախատեսված է մինչև 2023 թվականի վերջը։
-Իվանյան համայնքում քանի՞ բնակարան է կառուցվում։
-Իվանյան համայնքում կառուցվում է 2 թաղամաս։ Մի թաղամասում կլինի 4-սենյականոց 102 առանձնատուն, որոնցից 10-ը՝ թեթև կոնստրուկցիաներով, իսկ մյուս թաղամասում կլինեն 3-հարկանի շենքեր։ Ծրագրով արդեն նախատեսված է 15 շենքի կառուցումը, որից 11-ի շինարարական աշխատանքներն արդեն սկսված են, իսկ 120 բնակարան ունեցող 10 եռահարկ շենքի շինաշխատանքները մոտակա ժամանակներում կսկսվեն։
-Հանրապետության բնակավայրերում շարունակվու՞մ են տեղահանված ընտանիքների բնակարանային ապահովման ծրագրով անբնակ առանձնատների վերանորոգումն ու վերակառուցումը։ Մինչ այժմ քանի՞սն են կառուցվել և քանի՞սն են ընթացքում։
-Ընդհանուր ԱՀ վարչակազմերի կողմից ներկայացված ազատ բնակֆոնդի թիվը կազմում է 1701 բնակարան, որից 270 բնակարանի շինարարական աշխատանքներն ավարտված են, ընթացքի մեջ են 344-ի շինաշխատանքները, մոտակա ժամանակահատվածում նախատեսված է սկսել 317 տան շինաշխատանքներ, ենթակա է ուսումնասիրության 770 տուն։ Ընդհանուր շինարարական աշխատանքները կավարտվեն 3 տարվա ընթացքում։
-Արցախի ո՞ր շրջաններում և հիմնականում ո՞ր գյուղերում է տեղահանվածների վերաբնակեցման ծրագրով շինարարություն ընթանում այժմ։
- Արցախի բոլոր շրջաններում տեղահանվածների վերաբնակեցման ծրագրով ընթանում են մեծածավալ շինարարական աշխատանքներ։ Մասնավորապես՝ Դահրավ գյուղում 20 տան շինարարություն ավարտված է, Լուսաձորում՝ 15-ն ավարտված է, 10-ը՝ ընթացքի մեջ, Խնածախում 10-ը ընթացքի մեջ է, 8-ը՝ ավարտված, Խնձրիստանում 13-ն ավարտված է, Խնապատում 12-ն ավարտված է, Պատարայում 53-ն ավարտված է, 15-ը՝ ընթացքի մեջ, Աշանում 6-ն ավարտված է, 3-ը՝ ընթացքի մեջ, Մսմնայում 4-ն ավարտված է, 3-ը՝ ընթացքի մեջ, Սոսում 9-ը ընթացքի մեջ է, 2-ն՝ ավարտված, Մարտակերտ քաղաքում 99-ը սկսված է, 52-ն՝ ավարտված, Դրմբոնում 3-ն ավարտված է, 4-ը՝ սկսված, Հաթերքում 62-ը սկսված է, 22-ն ավարտված։ Շահումյանի շրջանի Չարեքտար գյուղում ավարտված և կահավորված է 13 առանձնատուն, իսկ 19 տան շինարարության աշխատանքներն ընթացքի մեջ են։ Ականաբերդ համայնքում վերանորոգվում է 6 առանձնատուն, ինչպես նաև արդեն սկսվել են մանկապարտեզի վերանորոգման աշխատանքները։
Հարցազրույցը՝
Աննա ՊԵՏՐՈՍՅԱՆԻ