ՇՈՒՇԻԻ Խ. ԱԲՈՎՅԱՆԻ ԱՆՎԱՆ ԴՊՐՈՑԸ ԳՈՐԾՈՒՄ Է
Սվետլանա ԽԱՉԱՏՐՅԱՆ
Հրադադար հայտարարելուց հետո, ռուս խաղաղապահների կողմից անվտանգության ապահովման երաշխավորությամբ Արցախ վերադառնալը, հատկապես իրենց բնակավայրերը կորցրած բնակիչների համար, մեծ չափով պամանավորված է նրանով, թե որքանով են լուծվում գոյության համար անհրաժեշտ խնդիրները, որոնց մեջ կարևոր է նաև երեխաների կրթության հարցը: Այդ իսկ պատճառով պետության կողմից առաջնահերթ կազմակերպվում է ուսումնական հաստատությունների գործարկումը:
Ինչպես հայտնի է, պատերազմի ավարտից հետո Ստեփանակերտում առաջինն իր դռները բացեց Աշոտ Ղուլյանի անվան հ. 2 հիմնական դպրոցը, որտեղ կարող էին սովորել ոչ միայն մայրաքաղաքի դպրոցների, այլև շրջանների երեխաները: Աստիճանաբար, ռմբակոծության հետևանքով մյուս կրթօջախներում ավերածությունների վերացմանը զուգընթաց, երեխաները սկսեցին հաճախել իրենց դպրոցները: Ադրբեջանի վերահսկողության տակ մնացած բնակավայրերի երեխաները, որոնք իրենց ընտանիքների հետ արդեն վերադարձել են Արցախ, շարունակում են հաճախել տարբեր դպրոցներ: Դեռևս նոյեմբեր ամսին մեր թերթին տված հարցազրույցում ԱՀ կրթության, գիտության, մշակույթի և սպորտի նախարար Լուսինե Ղարախանյանն ասել էր, որ հակված են նրան, որ Շուշիի ուսումնական հաստատությունների, ինչպես նաև Հադրութի Մ. Մանվելյանի անվան միջնակարգ դպրոցի անունները միշտ հնչեն: Իհարկե, դա կախված է նաև նրանից, թե այդ գործում ինչ շահագրգռություն կդրսևորեն տվյալ հաստատությունների ղեկավարներն իրենց կոլեկտիվներով հանդերձ:
Եվ ահա, հունվարի 11-ից« Շուշիի Խ. Աբովյանի անվան միջնակարգ դպրոցն արդեն գործում է: Այն տեղակայված է Ստեփանակերտի հ. 2 դպրոցի շենքում:
- Մեր խորին երախտագիտությունն ենք հայտնում ԱՀ կրթության, գիտության, մշակույթի և սպորտի նախարար Լուսինե Ղարախանյանին, ով ընդառաջեց Շուշիի կրթության բաժնի վարիչի և իմ խնդրանքին` վերաբացելու մեր դպրոցը,- մեր զրույցը շնորհակալական նախաբանով սկսեց Շուշիի Խ. Աբովյանի անվան դպրոցի տնօրեն Լիանա Հարությունյանը: Նախարարն ասել էր. ՙՇատ լավ կլինի, միայն թե կարողանաք հավաքել ձեր աշակերտական և ուսուցչական կոլեկտիվները՚: Մեր փոխտնօրենի հետ հարցում ենք արել, թե աշակերտներից քանիսն են Ստեփանակերտում, հետաքրքրվել ենք նաև Հայաստանում գտնվողներով: Պարզել ենք, որ մեր ուսուցիչներից արդեն 36 հոգի այստեղ է: Ծնողներին եմ դիմել, որոնք ուրախությամբ են ընդունել` ասելով, լավ կլինի, որ մեր դպրոցը բացվի, որովհետև ամեն աշակերտ իր ուսուցչին է ուզում: Կոնկրետ` իմ երեխաների օրինակով վկայեմ, որ դա, իրոք, այդպես է: Պատերազմի օրերին մեր ընտանիքն ապաստանել էր Ջերմուկում: Մեզ շատ լավ հյուրընկալել են այնտեղ, դրանում ոչ մի խոսք չկա, բայց աղջիկս, որ չորրորդ դասարանում է սովորում, ամեն օր լացում էր, որ իր ուսուցչուհուն է ուզում, իր դասընկերներին և մեծ սթրես էր ապրում:
Հունվարի 15-ի դրությամբ 184 աշակերտ է հաճախում դպրոց: Շուշիում 620 աշակերտ ունեին: Տնօրենի համոզմամբ` եթե բնակարանով ապահովման հարցը լուծված լինի, Հայաստանից ավելի շատ ընտանիքներ կտեղափոխվեն: Ըստ նրա` մյուս կողմից էլ խնդիր է այն, որ դպրոցը, որը մինչև պատերազմը հոսքային միջնակարգ էր` ունենալով բնագիտական ու հումանիտար հոսքեր, այժմ այդպիսին չէ, և բարձր դասարանների աշակերտների մի մասը Ստեփանակերտում ստիպված հաճախում է հոսքեր ունեցող դպրոցներ: Պատճառներից մեկն էլ այն է, որ երեխաները երկրորդ հերթ են հաճախում« և ծնողներից ոմանց հարմար չէ այդ ռեժիմը` կապված իրենց աշխատանքի հետ: ՙԱյսպես թե այնպես, Շուշիի դպրոցը գործում է, և մենք շատ ուրախ ենք դրա համար: Դեռ սկիզբն է, և համոզված ենք, որ ժամանակի ընթացքում ավելի մեծ համալրում կունենանք: Ես նկատում եմ, որ փոխվել է երեխաների տրամադրությունը, նրանք ուրախությամբ են հաճախում` ամեն օր վայելելով իրենց ուսուցիչների ու դասընկերների հետ շփման ուրախությունը: Ուսուցիչներն էլ են գոտեպնդվել, կամաց-կամաց շտկում են մեջքը: Ճիշտ է, կոտրված ենք, հայրենիք ենք կորցրել, տուն ու տեղ թողել, բայց որ միասին ենք, կարծես նորից ոգի առած լինենք: Ինձ Ջերմուկում աշխատանք էին առաջարկել, բայց մտածել եմ, որ անպայման պետք է վերադառնամ հայրենիք, հավաքեմ իմ ցիրուցան կոլեկտիվին, աշակերտներին, ձեռք-ձեռքի տված կրթենք ու դաստիարակենք արժանի սերունդ մեր երկրի համար: Մենք պարտավոր ենք դա անել՚,-ասաում է Լ. Հարությունյանը: Նա նկատեց, որ ուսումնական գործընթացը միաժամանակ բարերար ազդեցություն է թողնում թե աշակերտների և թե ուսուցիչների ու մյուս աշխատողների առողջության վրա, նրանք աստիճանաբար դուրս են գալիս ընկճված վիճակից. ՙՄեր կոլեկտիվը սիրով է լծվել իր գործին, կասեի` ավելի պատասխանատվությամբ է վերաբերվում իր առաքելությանը: Համոզված եմ` կկարողանանք հաղթահարել դժվարությունները, քանի որ միասին ենք՚:
Ինչպես տեղեկացանք տնօրենից` դպրոցն ունի 1-12-րդ դասարանները, համալրված է բոլոր մասնագետներով, որոնք հիմնականում իրենց դպրոցի մանկավարժներն են: Ուսուցիչներից մեկին` ինֆորմատիկայի մասնագետին« Ավետարանոց գյուղից են վերցրել, երկու հոգի էլ` շախմատի և մաթեմատիկայի ուսուցիչները, Շուշիի Դանիել Ղազարյանի անվան դպրոցից են: Տնօրենը կոլեկտիվի անունից խորին երախտագիտություն հայտնեց հ. 2 դպրոցի տնօրինությանը իրենց գրկաբաց ընդունելու համար` ասելով, որն ամեն ինչ անում է, որ Շուշիի դպրոցը կայանա: Շնորհակալության իր բաժինն ունի նաև ԿԳՄՍՆ տեսչական բաժինը, որը թեմատիկ պլաններով և մեթոդական այլ հարցերով օգնության ձեռք է մեկնում Շուշիի մանկավարժներին:
Ազգային ողբերգություն ապրելուց զատ կոլեկտիվն իր անձնական ցավն էլ ունի. դպրոցի զինղեկ Գարեգին Հարությունյանը, որը պատերազմի առաջին իսկ օրից զինվորագրվել է հայրենիքի պաշտպանությանը, հոկտեմբերի 10-ից ի վեր անհետ կորած է համարվում: Սիրելի զինղեկի, լավ մանկավարժի, ամեն ինչում հարեհաս մարդու բացակայությունը տխրության քողով է պատել կոլեկտիվին, մանավանդ որ նրա հայրն էլ` Վլադիմիր Հարությունյանը, այդ կոլեկտիվի անդամ է, պատմության ուսուցիչը: Թաքցրած իր վիշտը` վերջինս ամեն« օր մատյանն առած« դասարան է մտնում և շարունակում աշակերտներին մատուցել հայոց պատմության էջերը, որոնք, ավաղ, ժամանակ առ ժամանակ մթագնվել են, ինչպես` հիմա: Տնօրենն ասաց, որ ամբողջ կոլեկտիվով ամեն օր աղոթում են անհետ կորած իրենց գործընկերոջ վերադարձի համար: Աշխարհագրության մասնագետ Լուսինե Պետրոսյանի ամուսինն էլ ծանր վիրավորվել է, այժմ ապաքինվում է Երևանում: Ժամանակավոր մասնագետ են վերցրել և սիրով սպասում են իրենց ուսուցչուհու վերադարձին:
Ճակատագիրն իր չար խաղն է խաղում: Երեսուն տարի առաջ էլ Շուշին հայաթափվեց, և Խ. Աբովյանի անվան դպրոցը Ստեփանակերտում դարձյալ վերակազմակերպվեց կրթօջախի նախանձախնդիր ղեկավարության ու կրթության այն ժամանակվա պատասխանատուների շնորհիվ, պահեց իր գոյությունը` շարունակելով գործունեությունն ազատագրված Շուշիում:
Դպրոցի ներկայիս տնօրեն Լիանա Հարությունյանն էլ ապրել է այդ ամբողջ գողգոթան: Բռնագաղթած լինելով Բաքվից, երբ դեռ վեցերորդ դասարանի աշակերտ էր, նա դարձավ Խ. Աբովյանի անվան դպրոցի առաջին շրջանավարտն ու ավելի քան երկու տասնամյակ` նրա մանկավարժներից մեկը, իսկ վերջին վեց տարում` տնօրենը: Եվ այսօր էլ, հանգրվանած լինելով Ստեփանակերտում, հույսը չի կորցնում, որ մի օր հարազատ դպրոցի զանգը դարձյալ հնչեցնելու են Շուշիում: Իսկ դրա համար առաջին կռվանը, ինչպես կոլեկտիվի հետ ունեցած մեր զրույցի ժամանակ ասացին ուսուցիչները, Արցախում ապրելն ու կրթված, հարուստ գիտելիքներով զինված սերունդ տալն է: Այսօր մեր պայքարի ամենակարևոր ձևը դա է:
Վերջում հավելենք, որ հ. 2 դպրոցում տեղակայվել է նաև Շուշիի մանկապատանեկան ստեղծագործական կենտրոնը, որը գործելու է երրորդ հերթում: