Սայաթ-Նովայի ծննդյան 300-ամյակին նվիրված ՙԱմադեուս՚ մրցույթ-փառատոնը հոկտեմբերի 23-ին գալա համերգով ավարտեց իր աշխատանքը: Հիշեցնենք, փառատոնը հովանավորվում և անց է կացվում Բելգիայում բնակվող հայ բարերար Հովհաննես Անաստասյանի կողմից` ԼՂՀ մշակույթի և երիտասարդության հարցերի նախարարության աջակցությամբ:
Փառատոնն ապացուցեց, որ լավագույն ավանդույթները շարունակվում են: Ասենք ավելին` այս տարվա փառատոնը նոր երանգներ հաղորդեց ՙԱմադեուսին՚. ավանդաբար հնչող դասական երաժշտության ձայները հարստացան ազգային երգարվեստի, երաժշտարվեստի աննման ելևեջներով, հայկական պարերի կրակոտ ու առնական տրամադրությամբ, հեզ ու նուրբ պլաստիկայով: Խորհրդանշական ու ոգեշնչող էր այն, որ հենց ավստրիացի մեծ երգահանի (որն, ի դեպ, իր ստեղծագործություններում լայնորեն օգտագործում էր ժողովրդական պարն ու երգը, երաժշտությունը, գագաթնակետին հասցնելով դրանց արժեքն իր գլուխգործոցների մեջ) անունը կրող փառատոնին մեծարվեց, արժեվորվեց մեր ազգայինը, այն վերածվեց հայ երգի, պարի, երաժշտության իսկական տոնի:
Արդարացիորեն նկատենք. մեր օրերում մեզանում առաջին անգամ է, որ ազգային արվեստներին այսքան մեծ ուշադրություն տրվեցին, այսպիսի հովանավորություն ապահովվեց: