ԲԵՅՐՈՒԹԻ ՀԱՅԿԱԶՅԱՆ ՀԱՄԱԼՍԱՐԱՆԻ ՈՒՍԱՆՈՂՆԵՐՆ ԱՄՐԱՊՆԴՈՒՄ ԵՆ ԱՐՑԱԽԻ ՀԵՏ ԿԱՄՈՒՐՋՆԵՐԸ
Սվետլանա ԽԱՉԱՏՐՅԱՆ
Ամիսներ առաջ Արցախի պետական համալսարանի և արտաքին գործերի նախարարության ու Բեյրույթի Հայկազյան համալսարանի միջև Ստեփանակերտում կնքվել էր համագործակցության հուշագիր: Այդ շրջանակում այս օրերին Արցախում է Հայկազյանի ուսանողական պատվիրակությունը, որին ընդունեց կրթության, գիտության և սպորտի նախարար Նարինե Աղաբալյանը:
Նախարարը ողջունեց հուշագրի իրականացման գործնական այդ քայլը: Նշեց, որ հուշագրի կետերից մեկն էլ վերաբերում էր փոխադարձ այցելություններին: ՙԿարծում եմ` մենք արդեն սկսել ենք համագործակցության ծրագիրը և շահագրգռված ենք ավելի սերտացնելու այն, որովհետև Հայկազյան համալսարանը սփյուռքի մեր միակ պետական ճանաչում ունեցող հայկական համալսարանն է, և շատ կարևոր եմ համարում համագործակցությունը երկու բուհերի միջև՚,-ասաց Ն. Աղաբալյանը: Ըստ նրա` համագործակցության ծրագրերը կարող են տարբեր լինել թե՜ համալսարանների միջև և թե՜ ընդհանուր կրթական համակարգին առնչվող: Նա լիահույս է, որ կհաջորդեն ծրագրերն ուսանողների և դասախոսների փոխանակման առումով ու կրթամշակութային այլ միջոցներով: Օրինակ` շատ կուզենար համատեղ նախագծեր իրականացնել ամառային ճամբարների կազմակերպման ուղղությամբ: Հատկապես այս շրջանում անչափ կարևոր է փոխգործակցությունը: ՙՑավալի է խոստովանել, որ մենք պատերազմի և արտաքին վտանգի ժամանակ ենք ավելի շատ համախմբվում, իսկ խաղաղ ժամանակներում փոքր-ինչ հեռանում ենք իրարից, ինչը շատ վտանգավոր է՚,-նկատեց նախարարը` հավելելով, որ ամեն ինչ պետք է անել այդ կապերն ավելի սերտացնելու, միմյանց մոտիկից ավելի լավ ճանաչելու համար:
Պատվիրակության ղեկավար` Հայկազյան համալսարանի ուսանողական գրասենյակի տնօրեն Ռազմիկ Գաբրիելյանն ասաց, որ ներկայացել են համալսարանում գործող մի շարք ակումբներից մեկի` Heritage Club (Մշակույթի կենտրոն)-ի անդամները: Նպատակն է Արցախի հետ նոր կապեր հաստատել: Հավաքել և Արցախ են բերել 1000 կտոր գրականություն ԱրՊՀ-ի և ԱԳՆ-ի համար, որն իրականացրել են նախորդ օրն այդտեղ ունեցած հանդիպումների ժամանակ:
Ն. Աղաբալյանն ընդհանուր գծերով ներկայացրեց Արցախի կրթական համակարգը, հետաքրքրվեց սփյուռքահայ ուսանողների ընտրած մասնագիտությամբ, պատասխանեց նրանց հետաքրքրող հարցերին, առաջարկեց ավարտելուց հետո աշխատել Արցախի դպրոցներում:
Պատվիրակության ղեկավարը, շնորհակալություն հայտնելով սրտաբաց ընդունելության համար, նշեց, որ Բեյրութ վերադառնալուց հետո համալսարանի ղեկավարության և ուսանողների հետ կքննարկեն ստացված առաջարկները և, ըստ առաջնահերթության` ձեռնամուխ կլինեն դրանց իրականացմանը: Իսկ մինչ այդ կայցելեն Արցախի ու մայր Հայաստանի պատմամշակութային վայրերը: