ՄԵԾԱՐՎԵՑԻՆ ՀԲԿ-Ի ԲՈՒԺԱՇԽԱՏՈՂՆԵՐԸ
Զարինե ՄԱՅԻԼՅԱՆ
Հերթական անգամ ԱՀ առողջապահության նախարարության հանրապետական բժշկական կենտրոնի (ՀԲԿ) կոնֆերենց-դահլիճում ճյուղային արհմիութենական կազմակերպության նախաձեռնությամբ կազմակերպվեց բուժաշխատողների մեծարման հանդիսավոր արարողություն։ Միջոցառումը կազմակերպեց և վարեց ՀԲԿ-ի արհմիութենական կազմակերպության նախագահ, վերակենդանացման բաժանմունքի վարիչ, անեսթեզիոլոգ-ռեանիմատոլոգ Լևոն Հայրապետյանը։
Որպես ավանդույթ` տարվա ընթացքում ոլորտի ճյուղային արհմիությունների պատասխանատուները նման միջոցառումների ժամանակ մեծարում և խրախուսում են վաստակավոր բուժաշխատողներին, հոբելյարներին, մասնագիտական լավագույն ունակություններ ցուցաբերած բուժաշխատողներին՝ առողջապահական բնագավառում իրենց ունեցած ավանդի ու բարեխիղճ աշխատանքի համար։
Այս անգամ նոյեմբերի 25-ին ՀԲԿ-ի դահլիճում ի մի բերվեցին տարվա ընթացքում կատարված աշխատանքները և գալիք տարվա նախաշեմին մեծարվեցին առանձին բուժաշխատողներ։ ՙԱվարտին է մոտենում 2019 թվականը, որի ընթացքում մեր կոլեկտիվն աշխատել է տարբեր իրավիճակներում, մասնավորապես Արցախում կայացած ԿՈՆԻՖԱ-ի առաջնությունների, Համահայկական խաղերի, ինչպես նաև ԱՄՆ-ից և այլ երկրներից ժամանած տարբեր մասնագետների կողմից կազմակերպված ՙԲաց դռների օր՚ ծրագրի շրջանակներում մեր բուժաշխատողներն աշխատել են արտակարգ ռեժիմով, ծանրաբեռնված և պատասխանատվությամբ։ Իհարկե, խնդիրներ և բացթողումներ լինում են, բայց ես համոզված եմ, որ մեր բուժաշխատողների մեծամասնությունը միշտ էլ ձգտում է բարեխղճորեն կատարել իր պարտականությունները՚,-նշեց Լ. Հայրապետյանը։
ՀԲԿ-ի գործադիր տնօրեն Կարեն Բազյանն իր հերթին շնորհավորեց պարգևատրման և խրախուսման ներկայացված բուժաշխատողներին` մաղթելով առողջություն, հաջողություններ թե՜ անձնական կյանքում, թե՜ մասնագիտական ոլորտում։
Հանդիսավոր արարողության ժամանակ արհմիութենական ճյուղային կազմակերպության վարչության կողմից պատվոգրեր, ծաղկեփնջեր և խրախուսական նվերներ հանձնվեցին վաստակավոր բուժաշխատողներ Զ. Աթայանին, Լ. Բաբայանին, Գ. Շաքարյանին և Ֆ. Ասրյանին։ Շուրջ 38 բուժաշխատողներ էլ արժանացան դրամական աջակցության, նվերների, ծաղկեփնջերի։
ԱՀ բուժաշխատողների ճյուղային արհմիության նախագահ Լարիսա Պետրոսյանի պարզաբանմամբ՝ հերթական անգամ փոքրիկ խրախուսական միջոցներով փորձել են մեծարել և ջերմություն պարգևել բուժաշխատողներին։ ՙԱրդեն բարի ավանդույթ է դարձել երախտագիտություն հայտնել նման ձևաչափով։ Այսպիսի միջոցառումներ պարբերաբար կազմակերպում ենք բոլոր բուժհաստատություններում՚,- վերջում հավելեց Լ. Պետրոսյանը:
Միջոցառումն ուղեկցվեց Ստեփանակերտի Կոմիտասի անվան երաժշտական դպրոցի տնօրեն Արթուր Պետրոսյանի գլխավորած խմբի երաժշտական համարներով։