ԻՆՔՆԱՀՐԱԺԱՐՈՒՄ ԿԱՄ` ԿՐԿԻՆ ԵՐԿՆԱՅԻՆ ՏԱՐԱԾՔՆԵՐՈՒՄ ԳՏՆՎՈՂՆԵՐԻ ՄԱՍԻՆ
Նորեկ ԳԱՍՊԱՐՅԱՆ
Էլի։ Նույն ցավը, նույն մոլորությունը, նույն ինքնահրաժարումը։ Եվ հարցը՝ ինչո՞ւ։ Ո՞վ է փրկիչը։ Որտե՞ղ է նա։ Մեր կողքի՞ն։ Գուցե հենց մեր մե՞ջ։ Բայց ինչո՞ւ ենք անընդհատ որոնում նրան։ Իմա՞ստը։ Ո՞վ է առաջնորդում մեզ այս փնտրտուքի ճանապարհին։ Ասեմ, չեք հավատա, մենք անընդհատ տեր ենք փնտրում, հրամաններ արձակող, պատժող, գնդակահարող ու կախաղան հանող, խարույկը նետող…Պարզվում է` մենք առանց չարչարանքի չենք կարող։ Ուզում եք ծիծաղեք, ուրիշ բան մեր մշակած ու շնորհված տարածքներում չի երևում, գոնե ես չեմ տեսնում։
Միայն նա~…Առանց նրա~…եթե նա չլինե~ր…նա~ է ուղղարկվածը…ամենաուժեղը…ամենանվիրյալը…հաղթողը…
Աստված իմ, բանականության ինչպիսի~ տկարություն… Ստրկամտության ավելի կատարյալ ցուցադրություն ես չգիտեմ…ինքնահրաժարումի առավել ծիծաղելի ներկայացում հասու չէ իմ մտքին…
Այդ նրան պիտի դնենք մեր ուսերին, նրան պիտի երկրպագենք, նրա առաջ պիտի խոնարհենք մեր անօգնական ու անկարող մարմինը, որովհետև, եթե նա չլիներ, մեր տներն ու քաղաքները կկործանեին սելավներն ու ցրտերը, կչորանային մեր այգիներն ու դաշտերը, մեզ կոչնչացնեին թշնամու բանակներն, ու երբեք չէր պտղավորվի մեր միտքը, և մենք կմոլորվեինք ժամանակների խաչմերուկներում…
Հենց այսպես։ Մեկ ուրիշը չկա, գոյություն չունի և չի էլ կարող լինել։ Ոչ կենսագրություն, ոչ անցյալ, ոչ հիշողություն։ Ասես ոչինչ էլ չի եղել, և մարդն իջել է երկնքից, հանդիպել է Աստծուն ու հետո իջել՝ իբրև առաքյալ, իբրև օծյալ… Չասե՞նք՝ կեցցե~, և փա~ռք տիրոջը…
Չէ, կատակելու մտադրություն ամենևին էլ չունեմ, ուղղակի մեկ-մեկ խառնում եմ ամեն ինչ, չեմ զգում ժամանակի շունչը և էլի մոլորվում եմ, էլի դառնում եմ անհասկանալի, էլի մնում եմ խաղից դուրս… Չասեք ասածս հեռու է իրականությունից, անտրամաբանական էլ է, լրջության տարածքներից հեռու…
Հետո՞…
Արձանները մեր աչքի առաջ, մեր ընտրությամբ զավթում են փողոցներն ու հրապարակները, զբոսայգիներն ու պուրակները, երկիրը շնչահեղձ է լինում դրանց ծանրությունից…
Մենք դադարում ենք մտածել, որոշում կայացնել, ինքնուրույն քայլ անել, խոսք ասել, նույնիսկ ծառ տնկել, պատ շարել… Եթե կուզեք, դա մեզ խանգարում է ապրել, զգալ իրական ազատության ամբողջ շքեղությունն ու երանությունը։ Չասեք` սովորել եմ սուտի փիլիսոփայել, անլուրջ ու կասկածելի դատողություններ անել, վերջապես՝ դուրս գալ սովորական մահկանացուի համար գծված սահմաններից։ Մեկ է, բան չի փոխվում։ Էլի մեկին անընդհատ բարձրացնում ենք, հատուկ պատվանդան շինում, վերագրում անհավատալի բաներ, շնորհում կոչումներ ու ոչ երկրային իրավունքներ: Ամենաանժխտելին` մենք առանց այդ ընտրյալի զուրկ ենք բանականությունից, սիրելու, ինքնուրույն քայլելու կարողությւոնից, երկիրը պաշտպանելու, փորձությունը հաղթահարելու, թշնամու առաջն առնելու ունակություններից։ Մենք ուղղակի գոյություն չունենք։ Երբեք չենք խիզախել, երկիր չենք պահել, հող չենք մշակել, ոչ էլ քարկոծվել ու գնդակահարվել ենք։ Չէ, կարծես էլի անիմաստ բաներ եմ ասում, իրավիճակին չեմ տիրապետում, մերձավորիս չեմ հասկանում, հեռացել եմ մարդուց…Գուցե մի քիչ էլ ծերացե՞լ եմ… Ամեն ինչ էլ հնարավոր է։
88-ը բացառություն էր։ Կուռք չկար,ավելի ճիշտ կլիներ ասել` դրան արարելու համար մենք ուղղակի ժամանակ չունեինք։ Ունենայինք այդ ժամանակը, տանուլ կտայինք, էլի կկորցնեինք, կզրկվեինք…Բոլորս զինվոր էինք շարքային, բոլորս՝ հրամանատար, ուզում եմ ասել՝ առաջնորդ։ Մենք այդպես մեզանից չէինք հրաժարվում, մենք առանձին-առանձին էլ էինք հզոր, միասին էլ։
Պատերազմում էլ այդպես հաղթեցինք, էլի ժամանակ չունեինք ինչ-որ մեկին արարելու, մեր գլխին տեր կարգելու, բոլոր հաջողությունների ու հաղթանակների հեղինակը նրան համարելու։ Խիզախողը հավաքականությունն էր, ուղեկցողը՝ Աստված։ Իրավունք ունեք չհամաձայնվել։ Բայց ինձ այլ բան էլ համոզել չեք կարող։ Զորահրամանատարը կուռք չէր, գումարտակն իր ետևից տանողը կուռք չէր, տասի, քսանի դեմ մենակ գնացողը կուռք չէր։ Բոլորը զինվոր էին… Երկիրն ուսած, երկրի առաջ կանգնած…մինչ պատերազմի մեջ մտնելն այդ պատերազմում հաղթած…իր ուժը ճանաչած, իր պարտություններից վեր, հոգևոր հաղթանակները…չընդունող…ուրիշներից ոչինչ չսպասող, հզորների թակարդներից ու ոստյաններից հեռու…
Չասե՞մ` երանի մեզ, չասե՞մ` կեցցե~ն միայնակ արիացողները… աշխարհից օգնություն չսպասողները, իրենց հիշողությունն իրենց դաշնակիցը համարողները…ուրիշ աստվածներ չփնտրողները…
Չասել չեմ կարող։
Հիմա։
Այս ի՞նչ բանի ենք, այս ի~նչ գովերգել ենք գովերգում, ինչպիսի~ ձոներ, ինչպիսի~ ոճ ու մեծարում։ Կրկին եզակի, կրկին անփոխարինելի, աստվածային էլ։ Էլի՝ եթե նա չլիներ, նորից՝ միայն նա…ես բան չունեմ անելու, բան չունես անելու դու, նա…մեր հեռավոր շեներում ու բնակավայրերում տքնողները…էլի առանց այդ եզակիի ցորենը ծիլ տվողը չէ…ինչքան էլ աղոթես, ծառը չի պտղավորվի, ոչ էլ ժողովրդավարությունը կբնավորվի երկրում …Եվ ամեն օր մեզնից բարձրանում, առանձնանում է այդ նոր ոչ երկրայինը, որպեսզի առաջնորդի խաբված ու հուսալքված ժողովրդին, զորացնի հող հայրենին, մի հարվածով ոչնչացնի, ցաքուցրիվ անի թշնամու զորքերը, որպեսզի չլինեն հարուստներ ու աղքատներ, և մարդը չվախենա ամենուր մատուցել իր կարծիքը։
Չասե՞մ, որ մարդն իր ստեղծման օրից թագավորելու այլ գործելաոճ չի հորինել։ Տիրելու, իշխելու, արհամարհելու այլ տարբերակ գոյություն չունի…Բոլորն էլ այդպես են գալիս։ Նույն ձեռագիրն է, նույն գաղափարը, նույն ծրագիրը… Եվ այդ ամենին հավատացող նույն մարդ արարածը՝ թույլ, պարտվող, ժամանակի ընթացքից դուրս…ճանապարհը կորցրած…Եվ անցյալի ժխտումը, նախորդներին պարտադիր մեղադրելը, կատարածը արհամարհելը, շինածը չընդունելը…Բոլոր ժամանակներում…անփոփոխ…մեկին փոխարինելու է գալիս մյուսը, ավելի ճիշտ կլիներ ասել՝ մեկին իջեցնում են երկնային բարձունքներից, այնտեղ տեղադրում մեկ ուրիշին…ու միշտ երանի տալիս անցյալին…
Հետո՞…
Ես ինձնից հրաժարվելու մտադրություն երբեք չեմ ունեցել, չունեմ և չեմ էլ ունենալու։ Գիտե՞ք ինչու։ Ասեմ։ Որովհետև ինձնից հետաքրքիրը երբեք ինձ չի հանդիպել, որովհետև չեմ սիրում, երբ ինձ խաբում են, շեղում, արհամարհում…և, ամենագլխավորը, ես առանց ինձ ապրել չեմ կարող… Մի քիչ էլ երևի անհասկանալի բան ասեմ` ոչ մեկը ոչ մեկին մոլորեցնելու իրավունքը չունի…
Մեկը կար։ Իմ կարծիքով իմաստուն մարդ էր, համարյա՝ փիլիսոփա։ Ամբողջ օրն էլ գործ էր անում։ Ծաղիկ էր աճեցնում, ծառ էր տնկում, քանդակում էր, բոլորին օգնում, խորհուրդներ էր տալիս, 75 տարեկանում էլ պատրաստ էր ճակատ մեկնել…
Բայց մի բան չէի հասկանում։ Իր ժամանակ Մոսկվայում նստած կոմունիստ ղեկավարներից ում անունն էլ տալիս էի, ասում էր… ավելի լավ է չասեմ ինչ էր ասում, շատերի հասցեին տեղի-անտեղի հնչեցնում էր բաներ, որ ոչ մեկը չէր համարձակվում նույնիսկ մտքում արտաբերել…Կարճ` մարդը ոչ մեկին չէր հավատում։ Հա, մի անգամ էլ Ստալինի մասին ուղղակի ասաց.
-Ստալինը, եթե ուզում ես իմանալ, ոչ մի մեղք էլ չունի, մեղավորն էլի, ինչքան գլխիս զոռ եմ տալիս, ես եմ… մեր հարևան Հարությունը, վարսավիր Պողոսը, վարժապետ Սիմոնը… նույնիսկ փողոց ավլող Վարսիկը…
Հիմա…
Ի՞նչ ենք անում։ Ոչինչ։ Բացարձակապես ոչինչ։ Ինչ մնում է ինձ, ես ուղղակի սարսափում եմ հերթական քարկոծվողի փոխարեն…Որովհետև մտածում եմ, որ ոչ մի երկրային մինչև հիմա չի դիմացել երկնային տարածքների գայթակղու՜թյանը, և բացարձակապես չեմ կասկածում, որ այնտեղ շատ վաղուց, անհիշելի ժամանակներից, դատարկ տարածքներ գոյություն չունեն…
;