ՄԵԿՆԱՐԿԵԼ Է ՙԱՍՊԵՏ՚ ՌԱԶՄԱՄԱՐԶԱԿԱՆ ՃԱՄԲԱՐԸ
Սվետլանա ԽԱՉԱՏՐՅԱՆ
ԱՀ կրթության, գիտության և սպորտի ու պաշտպանության նախարարությունների համատեղ ուժերով նախազորակոչային տարիքի դպրոցականների համար գործող ՙԱսպետ՚ ռազմամարզական ճամբարն սկսել է իր գործունեությունը: Հունիսի 28-ին տեղի ունեցավ նրա հանդիսավոր բացումը: Ներկա էին պետական այրեր, հասարակական կազմակերպությունների ներկայացուցիչներ, ծնողներ:
ՙԱռաջիկա շաբաթների ընթացքում այստեղ նորից հարյուրավոր հայ պատանիներ Արցախից, մայր հայրենիքից ու սփյուռքից կհամատեղեն իրենց հաճելի հանգիստը զինվորական նախնական պատրաստության վարժանքների հետ՚,- մեկնարկի առիթով ճամբարականներին ուղղված ողջույնի և շնորհավորանքի իր խոսքում ասել է ԱՀ կրթության, գիտության և սպորտի նախարար Նարինե Աղաբալյանը:
Ռազմամարզական ճամբարի դերը Ն. Աղաբալյանը կարևորեց այն առումով, որ 10-րդն ավարտած տղաներն այստեղ պատրաստվում են իրենց կյանքի կարևոր առաքելությանը` հայրենիքի պաշտպանությանը: Նրանցից շատերն ամիսներ, ոմանք` մեկ տարի հետո կփոխարինեն սահմանին կանգնած մեր զինվորներին: Ի տարբերություն պատերազմի թոհուբոհի մեջ կամավորական ջոկատների հիմքի վրա ստեղծված բանակի զինվորների, որոնք չունեին ժամանակ ու հնարավորություն պատրաստվելու, այսօրվա սերունդը բանակային ծառայությանը նախապատրաստվում է դեռ դպրոցից, նաև` այսպիսի ճամբարային միջոցառումների շնորհիվ: Դպրոցում նախնական զինվորական պատրաստություն առարկայից ստացած տեսական գիտելիքները նրանք կիրառում են ռազմամարզական ճամբարում, բանակային առօրյային և բանակի կարգ ու կանոնին նրանց առաջին գործնական ծանոթությունը հենց այստեղ է կայանում: Իսկ այստեղ ձեռքբերած ընկերներին վաղը հաստատ կհանդիպեն մարտական հերթապահության ժամանակ, և միասին ավելի հեշտ կլինի տանել դժվարությունները: ՙԱսպետ՚ ճամբարի կարևորագույն կողմերը ներկայացրեց ԿԳՍ նախարարը` որպես ապացույց բերելով նաև բանակի այն սպաներին, ովքեր անցել են ՙԱսպետ՚ ճամբարով և շահեկանորեն տարբերվում են մյուսներից:
ԱՀ պաշտպանության նախարարության անունից ճամբարականներին ողջունեց ՊԲ բարոյահոգեբանական աշխատանքների բաժնի պետ, գնդապետ Նորայր Մկրտչյանը` հավաստելով, որ նախարարությունն այսուհետ ևս շարունակելու է սերտ համագործակցությունը շահագրգիռ գերատեսչությունների ու կառույցների հետ և աջակցությունն այնպիսի միջոցառումների ու ծրագրերի իրականացմանը, ինչպիսիք են ռազմամարզական ճամբարները, հրաձգությունների կազմակերպումը, փոխադարձ այցելությունները, արիության դասերը և այլն: Իր հերթին նա ՙԱսպետ՚-ը կարևորեց նրանով, որ այստեղ անցկացվող միջոցառումները շատ մոտ են բանակային միջոցառումներին, որոնք էլ իրենց հերթին տալիս են այն հմտութույուններն ու ունակությունները, որոնք անրաժեշտ են ապագա զինվորին:
ՙԱսպետ՚-ը սկիզբն է լավ, խելացի, արժանապատիվ զինվոր դաստիարակելու համար: Անձնվեր, խելացի և բանիմաց , զենքին լավ տիրապետող, դժվարություններից խուճապի չմատնվող, սառը դատողությամբ ճիշտ որոշումներ կայացնելու ունակ զինվորը մարտունակ բանակի հիմքն է՚,- իր խոսքում ասաց ԱԱՄ ՙՀայրենյաց պաշտպան՚ երիտասարդկան թևի նախագահ Անդրանիկ Գրիգորյանը:
Ճամբարի պետ, մայոր Արսեն Հարությունյանը մեզ հետ զրույցում ասաց, որ ջոկերի ձեռքբերած ռազմակիրառական հմտություններն ու ունակությունները տեսանելի կլինեն անցկացվող մրցումներում: Հաղթող ճանաչված ջոկերն ու առանձին մասնակիցներ կխրախուսվեն ՊՆ արժեքավոր նվերներով և պատվոգրերով: Նախատեսված են տարբեր անվանակարգերով խրախուսումներ` ՙԼավագույն հրաձիգ՚, ՙԼավագույն շախմատիստ՚, ՙԼավագույն ճամբարական՚ և այլն: Իրենց լավագույնս ցուցաբերած ճամբարականների համար շնորհակալագրեր կուղարկվեն համապատասխան դպրոցներ:
Ճամբարի բացումն իրենց ելույթներով շնորհավորեցին ՊԲ ՙԱսպետ՚ համույթի տղաները: