ՈՒՍՈՒՄՆԱԿԱՆ ՏԱԳՆԱՊ
Մարտի 16-ին ԼՂՀ արտակարգ իրավիճակների պետական ծառայության (ԱԻՊԾ) Քաշաթաղի շրջանային բաժինը շրջբուժմիավորումում անցկացրեց ուսումնական տագնապ՝ ստուգելու, թե ինչպես հրդեհի դեպքում կիրականացվի բուժմիավորման անձնակազմի և հիվանդների տարհանումը հիվանդանոցի շենքից։
Տագնապը տրվեց առավոտյան ժամերին, երբ բժշկական անձնակազմն զբաղված էր հիվանդների այցերով, բուժական և այլ աշխատանքներով: Տարհանումը կատարվեց նախատեսած ժամկետում՝ չնայած եղանակային ոչ բարենպաստ պայմաններին: ԱԻՊԾ Քաշաթաղի բաժանմունքի պետ Քերոբ Մովսիսյանը դրական գնահատեց աշխատանքները, շնորհակալություն հայտնեց բուժմիավորման տնօրեն Կարեն Գրիգորյանին, բուժանձնակազմին՝ տարհանումը պատշաճ ձևով կազմակերպելու համար։ Նախատեսած ժամին տագնապն ավարտվեց, և հիվանդանոցն անցավ իր բնականոն աշխատանքին:
Միջոցառման ավարտից հետո ԱԻՊԾ աշխատակիցները բուժմիավորման տնօրենի հետ քննարկեցին արդյունքները, նշեցին թերությունները: Որոշվեց ժամանակ անց նման միջոցառումներ նորից իրականացնել: Կարեն Գրիգորյանը, որ վերջերս է նշանակվել բուժմիավորման տնօրեն, կարևորեց նման միջոցառումների դերը:
Տեղեկացնենք, որ Քաշաթաղի շրջանային բուժմիավորումն ունի 20 տարվա պատմություն, գործում է ոչ հարմարավետ երկհարկանի շենքում: Արդեն երրորդ տարին է, ինչ այս շենքի հարևանությամբ կառուցվում է հիվանդանոցի նոր շենքը: Ըստ նախատեսածի՝ այն շահագործման պետք է հանձնվեր 2015թ. վերջին, սակայն ինչ-ինչ պատճառներով շինարարությունը դադարեցվել է: Ըստ ԼՂՀ քաղաքաշինության նախարարության լրատվական բաժնի տվյալների՝ այս տարվա մայիսից շինարարական աշխատանքները կշարունակվեն: Հուսանք, որ 2017 թվականին շենքը կհանձնվի շահագործման։
Զոհրաբ ԸՌՔՈՅԱՆ
ք. Բերձոր