[ARM]     [RUS]     [ENG]

ԲԱՐԵԿԱՐԳՎՈՒՄ Է ՀԵՐՈՍԻ ԱՆՎԱՆ ԶԲՈՍԱՅԳԻՆ

Ստեփանակերտի քաղաքապետարանի պատվերով բարեկարգման աշխատանքներ են սկսվել Արցախի հերոս Աշոտ Ղուլյանի (Բեկոր) անունը կրող զբոսայգում:

 Զբոսայգին, որ կառուցվել էր խորհրդային տարիներին` Ստեփանակերտի  նախկին պոլիկլինիկայի հարևանությամբ, Արցախյան պատերազմից հետո անվանակոչվել է Բեկոր Աշոտի անունով: Այգու կենտրոնում տեղադրվել է հերոսի հուշարձանը: Անցած տարիների ընթացքում այստեղ, սանմաքրման ու կանաչապատման աշխատանքներից բացի, լայնածավալ բարեկարգում  չի իրականացվել:  Խափանված էր տարածքի գիշերային լուսավորությունը, վերանորոգման անհրաժեշտություն ունեին աստիճանները,  խնամքի և ուշադրության կարիք` պուրակին հարակից ծառուղին։

Այս օրերին զբոսայգու բարեկարգման ուղղությամբ աշխատանքներ են ընթանում: ՙՆարինե և Գեղանի՚ ընկերությունն արդեն կատարել է Բեկոր Աշոտի անվան պուրակի նախագիծը, ըստ որի այն ամբողջությամբ կվերանորոգվի: Առաջին փուլում նախատեսվում է կատարել այգու ներքին հատվածի  (Ա.Մկրտչյան փողոցի ուղղությամբ) հողային հարթեցում, սիզամարգերի կառուցում և կանաչապատում,  լուսարձակների վերանորոգում և վերականգնում:

Շինարարների հավաստմամբ՝ բոլոր տեսակի աշխատանքների ավարտից  հետո այգին հրաշալի տեսք կստանա: 

 

Լաուրա ԳՐԻԳՈՐՅԱՆ