ՏՈՆ, ՈՐ ՄԻՇՏ ՄԵԶ ՀԵՏ Է...
Սիրվարդ ՄԱՐԳԱՐՅԱՆ
Ասենք` շնորհավո~ր… Ասենք ու փաստենք՝ ձեր ներկայությունն արդեն իսկ տոն է մեզ համար՝ Տոն, որ միշտ մեզ հետ է։ Շնորհակալություն ձեր ներկայության համար, մեր կյանքը, յուրաքանչյուր մեր օրը տոն դարձնելու համար։ Չմոռանանք ասել՝ կներեք երբեմն ձեզ չհասկանալու կամ ճիշտ չհասկանալու համար։ Մեր փոքրիկ մոլորակի ՙՄեծ՚ բնակիչներ, ձեր տոն օրն է այսօր։ ՙԱշխարհաստեղծ՚ ու ՙաշխարհակալ՚ մեր հրեշտակներ` անմեղ, խոսուն հայացքներով ու պահվածքով մեծավարի։ Աշխարհին ձեր մաքրությունն ու անկեղծությունն է պակասում, մանկան ձեր մաքրությունն ու սրտի տրոփյունը՝ համաչափ, տաք, անկեղծ։ Ձեր իսկ ներկայությամբ պատերազմին ՙոչ՚ ասող, ձեր անվախությամբ ու հաստատակամությամբ մեծերին ՙդասեր՚ տվող, աշխարհի ցավ ու դավերի հետ հաշտ ու անհաշտ... Անհաշտ աշխարհին հաշտություն պարտադրող, անխոս ներկայությամբ մեր հրաշամանուկներ՝ աչքի պես մաքրամաքուր հոգով, լայնասիրտ ու լայնաժպիտ... Արցախի պատիվը ձեր գոյությամբ պատվար դարձնող, հաղթանակի պատվանդաններին մշտապես ներկա, աշխարհի ամենատարբեր հարթակներում՝ մշակութային ու մարզական հաղթանակներով Եռագույնը ծածանող, մեր երկրին ու մեր կյանքին իմաստ, հպարտություն ու իմաստնություն պարգևող։ Փոքրիկ ղարաբաղցու՝ Միշա Գրիգորյանի բերանով հազարավորներին Արցախ ՙԺենգյալով հաց՚ ուտելու հրավիրող, միշտ հյուրասեր ու միշտ սրտաբաց քո տեսակով, իմ փոքրիկ ու մեծ բարեկամ։ Անցյալիդ, ներկայիդ ու ապագայիդ տեսլականով մեզ հույս ու հավատ պարգևող Փոքրի՜կ Ղարաբաղցի. դու քաջ գիտես՝ քո երջանկության համար թանկ գին է վճարվել... Դու էլ քո ներկայությամբ ես հաղթել պատերազմին...Արկերն ու ռումբերն այլևս չեն պայթում` խաթարելով քո մանկական ՙպահմտոցին՚, դրանց, ի սեր որդիների, լռեցրել են հայրերը։ 25 տարի է արդեն, ինչ քեզ համար փխրուն խաղաղություն է, քո տաք ձեռքերի մեջ ձյան պես հալչող փխրուն խաղաղություն...Սակայն դու չես երկնչում, սահմանի ա՛յն կողմից հնչող կրակոցներից սիրտդ ծուլ չի լինում, դու պինդ ես` ինչպես քո պապը, հայրդ ու հորեղբայրդ, ինչպես Վարդան քեռիդ, որ երկու ոտքն է կորցրել պատերազմում ու դարձյալ ՙքայլելիս՚ չի երերում։ Իսկ ինքդ վաղուց վերջ ես տվել դատարկ պարկուճներով խաղալուդ, արդեն հորդ ինքնաձիգի բոյին ես ու երազում ես այն կրծքիդ սեղմած կանգնել առաջնագծում։ Անկեղծորեն նեղանում ես, երբ քեզ երեխայի տեղ են դնում։ Դու արդեն տղամարդ ես ու ՙգնդի որդիների՚ տարիքին ես...Պապիդ, հորդ, հորեղբորդ պատճեն ես ու խռովում ես, երբ քեզ չեն նկատում, հաշվի չեն նստում հետդ։ Այնինչ, անզեն աչքով էլ տեսանելի է, որ դու կաթիլ-կաթիլ քո հոգում ամբարել ես պապիկիդ հայրենասիրությունը, հորդ պայքարի ոգին ու սխրանքը։ Դու մեծ ես բոլոր մեծերից ու քո ներսում կրում ես հաղթանակների բերկրանքը։ Դու հաղթանակած երկրիդ հպարտ քաղաքացին ես՝ փոքրիկ տիրակալը: Հայոց Այբուբենի 36 զինվորների հետ շարքում ես, սերտում ես Ոսկեղենիկը՝ քո բաժին ինքնությունը վերածելով լույսի: Դու ամեն օր վրձնի հետ թաթախում ես ներսիդ գույները, դաշնամուրի ստեղներին պահ տալիս հոգուդ գանձերն ու գրչիդ ծայրին Բառը-Բանը դարձնում ապագային պարզած Եռածածան Դրոշ։ Քո վաղվա օրը ինքդ ես վրձնում՝ խոհեմ, հավասարակշռված, մեծավարի, հաստատաքայլ ու հաստատակամ ու, որպես փոքր Հոտի փոքրիկ գառնուկ, ամեն Աստծո օր Խաչի կնիքը դնելով ճակատիդ, հույսդ Աստծուն` աղոթում ես ողջ աշխարհի քո հասակակիցների խաղաղության համար... Ու որպես փոքրիկ մոլորակի ՙՄեծ՚ բնակիչ` քո ներկայությունը Տոն ես դարձնում Աշխարհի համար, Աշխարհ, որտեղ ամեն օր տոնախմբվում են հազարավոր երեխաների երազանքները...