Ֆրանսիական անկյուն Ստեփանակերտի սրտում
Սրբուհի ՎԱՆՅԱՆ
Հայ-ֆրանսիական բարեկամության շրջանակներում Արցախում վերջին տարիներին տարբեր մակարդակներով կազմակերպվող բազմաթիվ հանդիպումներն ու միջոցառումներն արդեն հաճելի ավանդույթ են դարձել։ Դարավոր մշակութային, քաղաքական, մարդկային կապերը նպաստել են, որպեսզի Հայաստանում և Արցախում սիրեն ֆրանսիականը, իսկ Ֆրանսիայում հարգեն և ակնածանքով վերաբերվեն հայկական ավանդույթներին, մշակույթին, պատմությանը։
Արցախում 2015 թվականից գործում է ՙՊոլ Էլյուարի տուն ֆրանկոֆոնիայի կենտրոն՚ հիմնադրամը, որի ուսումնական մասով տնօրեն Նելլի Ավանեսյանը տեղեկացրել էր, որ մարտի 20-ին Ֆրանկոֆոնիայի միջազգային օրվան նվիրված միջոցառումներ էին անցկացվելու նաև Արցախում։ Սակայն, օրերս ԱՀ պետնախարար Գ. Մարտիրոսյանը լրագրողների հետ հանդիպմանը հայտարարել էր բոլոր մշակութային, մարզական և նմանատիպ միջոցառումների չեղարկման կամ հետաձգման մասին` աշխարհում, այդ թվում և Հայաստանում տարածվող համաճարակի` կորոնավիրուսի պատճառով։
Ֆրանկոֆոնիայի միջազգային օրը նշվում է աշխարհի ավելի քան 65 երկրներում։ Ֆրանսախոսության տոնի նպատակը ֆրանսերենի տարածումն է, ինչպես նաև ֆրանսիական մշակույթին և քաղաքականությանը մարդկությանը ծանոթացնելը։
ՙԱմեն տարի կենտրոնը, որը, ի դեպ, ունի 50 ուսանող, Ֆրանսիայից հյուրեր է ընդունում` կազմակերպելով տարաբնույթ միջոցառումներ, որոնց միջոցով փորձում ենք հյուրերին ցույց տալ կենտրոն հաճախող ուսանողների գիտելիքները, ինչպես նաև նրանց ներկայացնում ենք արցախյան մշակույթը։ Այս տարի մարտի 20-ից սկսած, մեկ շաբաթվա ընթացքում կրկին պիտի կազմակերպեինք տարաբնույթ միջոցառումներ։ Հետաքրքիր թատերական ներկայացում, խաղ-մրցույթներ էինք կազմակերպելու ֆրանսիական գրականության, աշխարհագրության, երաժշտության և այլ ոլորտների, ինչպես նաև ֆրանսիական քաղաքակրթությանը վերաբերող թեմաներով։ Պատրաստել էինք նաև մուլտֆիլմերի և ֆիլմերի ցուցադրություններ, որոնք ևս կնպաստեն Արցախում ֆրանսերենի զարգացմանը, ասել է Ն. Ավանեսյանը։-Ցավոք, աշխարհն ապահովագրված չէ ճգնաժամերից, և այս անգամ էլ Կորոնավիրուսի համաճարակը խափանեց պլանները՚։
Նշենք, որ Ֆրանկոֆոնիայի միջազգային օրը տոնվում է ի նշանավորումն 1970 թվականի մարտի 20-ին Նիգերի մայրաքաղաք Նիամեյում ստորագրված համաձայնագրի արդյունքում ստեղծված Ֆրանկոֆոն երկրների միջազգային կազմակերպության ստեղծմանը։ Կազմակերպությունն ունի 56 անդամ և 19 դիտորդ պետություններ ու կառավարություններ, որոնց միավորում են ընդհանուր արժեքներն ու ընկալումները ժողովրդավարության, խաղաղության, իրավունքի և այլ հարցերում։ ՙՖրանսերենը ՄԱԿ-ի պաշտոնական լեզուներից է, աշխարհում ավելի քան 200 մլն ֆրանսախոս է հաշվվում՚,-մեզ հետ զրույցում ասաց Ն. Ավանեսյանը, ում մեջ ֆրանսերեն լեզվի հանդեպ սերն ու հետաքրքրությունը դեռ դպրոցական տարիներից է առաջացել։ ՙՊետք է ասեմ, որ հենց սկզբից սիրահարվել եմ այդ լեզվին, և այն դարձել է իմ երկրորդ մայրենին,-ասում է նա,- և չնայած այսօր այն զիջում է անգլերենին, բայց և այնպես շարունակում է մնալ հանրահայտ և սիրելի շատերի համար՚։
Ֆրանսերենն իր համար կախարդական բանալի է համարում, որի շնորհիվ մի քանի դռներ են բացվել իր առջև։ ՙՊոլ Էլյուար՚ կենտրոնի բացման արդյունքում և գործունեության շնորհիվ նաև Արցախում մեծ տարածում գտավ ֆրանսերեն լեզուն`առավելագույնս նպաստելով հայ-ֆրանսիական հարաբերությունների ամրապնդմանը։
Այդ հիմնադրամն Արցախում սկսել է գործունեություն ծավալել ԱՀ կառավարության նախաձեռնությամբ. նպատակն Արցախի և Ֆրանսիայի միջև բարեկամական կապերի ամրապնդումն է` տարբեր ծրագրերի իրականացման միջոցով։
Կենտրոնի կողմից հինգ տարիների ընթացքում կազմակերպվել են տարբեր դասընթացներ։ Առայժմ տարբեր վայրերում, քանի որ դեռ մշտական տեղ չունեն։ Օգտագործել են ԱրՊՀ, հիվանդանոցների, արտգործնախարարության, ԱԺ շենքերը` կապված միջոցառման բնույթից և ուղղվածությունից։ ՙՖրանկոֆոնիայի միջազգային օրվան նվիրված միջոցառումներով ուզում ենք համախմբել ֆրանսախոսներին ու ֆրանսասերներին։ Իսկ տարվա ընթացքում կազմակերպում ենք ֆրանսերեն լեզվի դասավանդում տարբեր մասնագետների շրջանում, այս տարվանից նաև` աշակերտների ու ուսանողների հետ։ Փորձում ենք կազմակերպել վերապատրաստման դասընթացներ նեղ մասնգետների համար` ֆրանսիացի մասնագետների ներգրավմամբ, ֆրանսիական փորձը բերելով ու կիրառելով Արցախում։ Եվ քանի որ մեր կենտրոնի գործունեությունը բավականին ակտիվ է, և ստիպված ենք լինում հաճախ միջոցառումներ անցկացնել տարբեր տեղերում, անհրաժեշտություն է առաջացել սեփական անկյուն ունենալ, որտեղ միաժամանակ կարող ենք բոլորս աշխատել։ Շատ ուրախացանք, երբ իմացանք, որ հաստատվել է կենտրոնը կառուցելու մեր առաջարկը՚,-պատմում է մեր զրուցակիցը։
Նախագիծը կյանքի է կոչվել ԱՀ կառավարության աջակցությամբ, Ֆրանսիայի համահայկական հիմնադրամի և ֆրանսախոսությունն Արցախում կազմակերպության ֆինանսավորմամբ։
Շինարարական աշխատանքները սկսվել են 2019 թվականի ամռանը։ Շենքը բաղկացած է լինելու 2 մասից` առևտրային և ոչ առևտրային, որտեղ էլ հենց կազմակերպվելու են ֆրանսերենի դասընթացները, տարբեր մշակութային միջոցառումներ` ֆրանսերենով։ Ֆրանկոֆոնիայի միջազգային տոնն էլ հետագայում այստեղ կնշվի։ Մյուս մասում տեղակայված են լինելու սրճարան-ռեստորան, հացաբուլկեղենի խանութ։ Կենտրոնն ունենալու է բազմաֆունկցիոնալ սրահ` նախատեսված զանազան միջոցառումների համար, կկիրառվեն ժամանակակից ուսումնական մեթոդներ և սարքավորումներ, դասընթացների մի մասը կլինի առցանց։ Բակի կենտրոնում կլինի շատրվան, կանաչ գոտի` պուրակ, շենքում կլինի նաև գինու մառան։
Կենտրոնում ամեն ինչ կլինի եվրոպական չափորոշիչներին համապատասխան։ Ն. Ավանեսյանի խոսքով, հիմնական շեշտը դրվելու է խոսակցական լեզվի զարգացման վրա։
Շենքը մասամբ երկհարկ է, մասամբ` միահարկ։ Երկրորդ հարկում տեղակայված են լինելու նաև սենյակներ` ժամանած հյուրերի, մասնագետների համար։ Կենտրոնը կունենա բարեկարգ բակ և մեծ պարտեզ։
Այդպիսով Ստեփանակերտում կլինի ֆրանսիական փոքրիկ անկյուն, որը կամուրջի դեր կունենա Արցախի և Ֆրանսիայի միջև:
Ներկայումս կենտրոնի ուսումնական մասում աշխատում են հինգ հոգով, կադրերի համալրման անհրաժեշտություն չեն տեսնում։ Առաջիկայում հնարավոր է, որ միայն առևտրային մասում նոր հաստիքների ավելացման անհրաժեշտություն լինի։
Կենտրոնի շինարարությունն իրականացնում է ՙՊանտ՚ ՍՊԸ-ն, նախագիծը կազմել է ճարտարապետ Սևակ Ասրյանը։ Նրա խոսքով, նախագիծը կազմվել է այդ թաղամասի ընդհանուր ճարտարապետությանը համահունչ, լինելու է մոդեռն ոճի կառույց։ Շինարարական աշխատանքները նախատեսվում է ավարտել 2020 թվականի ամռանը, իսկ պաշտոնական բացումը կլինի սեպտեմբերի 2-ին։