Լեռնային Ղարաբաղի Հանրապետության արտաքին գործերի նախարարությունը հայտարարում է, որ Ադրբեջանը շարունակում է ինտենսիվորեն խախտել կրակի դադարեցման ռեժիմը ԼՂՀ և Ադրբեջանի զինված ուժերի շփման գծի ամբողջ երկայնքով: Սույն թվականի հունիսի 18-ին ժամը 8.15-ին Ադրբեջանի զինված ուժերի կողմից իրագործված կոպիտ խախտումների արդյունքում սպանվել է ԼՂՀ ՊԲ` զինվորական ծառայության զորակոչված զինծառայող 1993 թ. ծնված Արամ Սիմոնի Գյուլնազարյանը:
Հունիսի 15-ին տեղի ունեցավ ԼՂՀ հանրային ծառայությունները և տնտեսական մրցակցությունը կարգավորող պետական հանձնաժողովի և ՀՀ հանրային ծառայությունները կարգավորող հանձնաժողովի համատեղ նիստը (Երևանից այդ կապակցությամբ ժամանել էր պատվիրակություն՝ հայաստանյան կառույցի նախագահ Ռոբերտ Նազարյանի գլխավորությամբ)։
Մայիս ամսվա երկրորդ կեսին Արցախի պետական երգչախումբը մեկնեց Իտալիա՝ մասնակցելու Վենետիկում անցկացվելիք հոգևոր երաժշտության միջազգային փառատոնին, ինչպես նաև Հայաստանում գրատպության 500-ամյակին նվիրված տոնական միջոցառումներին, որոնք կազմակերպվել են Մխիթարյան միաբանության կողմից։