ԻՆՖՈԳՐԱՖԻԿԱՆ ԶԱՐԳԱՑՈՂ ՈՒՂՂՈՒԹՅՈՒՆ Է
Ստեփանակերտի ՙԹումո՚ կենտրոնը ներկայացրեց հերթական արդյունքները. տեղեկացնենք, որ արդյունքների ամփոփումը սովորաբար լինում է ուսանողների կողմից որևէ հմտություն ձեռք բերելու ճանապարհին երեք փուլ անցնելուց հետո:
ՙԹումո՚-ի ղեկավար Կորյուն Խաչատուրյանը տեղեկացրեց, որ մոտ 9 ամիս է, ինչ ԼՂՀ մայրաքաղաքում բացվել է ՙԹումո՚-ն, և արդեն 6-րդ արդյունքներն են ներկայացվում: Այցելուներն ականատես եղան ուսանողների ինֆոգրաֆիկական աշխատանքներին: Վերջնական փուլում նրանց համար 15 օր դասընթացներ է վարել դիզայներ, լրագրող, կայքի խմբագիր Սեդրակ Մկրտչյանը:
Շնորհանդեսի սկզբում Ս. Մկրտչյանը հանդես եկավ ինֆոգրաֆիկայի մասին տեղեկատվությամբ: Ի դեպ, ինֆոգրաֆիկան ինֆորմացիայի և գրաֆիկայի համադրում է: Այսօր աշխարհի առաջատար լրատվամիջոցների կողմից վիճակագրական տեղեկատվության տարածման ամենակիրառելի ձևաչափերից մեկը ինֆոգրաֆիկան է: Այն ավելի սեղմ կարելի է սահմանել հետևյալ կերպ. դա տեղեկությունների փոխանցման գրաֆիկական միջոց է, որի նպատակն է արագ ու հստակ ներկայացնել բարդ տեղեկատվությունը:
Ս. Մկրտչյանը ինֆոգրաֆիկայի մի քանի օրինակներ բերեց, որոնք ինքն է ստեղծել: Անցյալ տարվա ընթացքում համացանցում տեղեկություններ կային, թե Ադրբեջանը որքան գումարներ է ծախսում Ամերիկայում լոբբինգի վրա: Այդ բոլոր տեղեկությունները` լոբբիստական կազմակերպությունները, դրանց ուղղված գումարները, համադրելով և կենտրոնում դնելով Ալիևի նկարը, Ս. Մկրտչյանը ստեղծեց մի վիզուալ պատկեր, որտեղ պարզ երևում է Ադրբեջանի քաղաքականությունն այդ ուղղությամբ: Դա ունեցավ մեծ ազդեցություն. տարածվեց համացանցում։ ԱՄՆ-ի սենատորները, կոնգրեսականները ծանոթացան, հայկական սփյուռքն իր պահանջները ներկայացրեց: Դա ինֆոգրաֆիկայի դրական արդյունքի կատարյալ օրինակ է:
Ս. Մկրտչյանը ցուցադրեց նաև 1990թ. Բաքվի հայկական ջարդերի, Հայոց ցեղասպանության մասին, նոր ժամանակներից` ազերիների կողմից խոցված հայկական ուղղաթիռի վերաբերյալ ստեղծած ինֆոգրաֆիկան։ Վերջինում ապացուցվում է, որ մեր ուղղաթիռը չի մտել Ադրբեջանի տարածք, եղել է հայկական սահմանում կամ չեզոք գոտում, և դա տարածվեց համացանցում:
Եվս մի վիզուալ լուծում էր Տավուշից ադրբեջանցիներին գերի ընկած Կարեն Պետրոսյանի մասին ինֆոգրաֆիկան: Ինչպես հայտնի է, նա հաջորդ օրը մահացավ անհայտ հանգամանքներում։ Ապրիլյան պատերազմի հենց առաջին օրերից հրապարակված նյութերի հիման վրա նույնպես ստեղծվեց ինֆոգրաֆիկա. ՙԱյդ օրերին թշնամուն հաղթել էինք գրաֆիկական առւմով` համացանցում՚,¬ասաց դիզայները:
Բնական է, որ ինֆոգրաֆիկան միայն ռազմական թեմաներով չէ: Ս. Մկրտչյանը բերեց տարբեր ժամանակներում տարբեր կազմակերպությունների համար ստեղծած ինֆոգրաֆիկայի օրինակներ: Այնուհետև ասպարեզը տրամադրվեց ՙԹումո՚-ի ուսանողներին, որոնց մեջ ոչ միայն դպրոցականներ էին, այլև բուհերի ուսանողներ, երիտասարդ լրագրողներ: Թեմաներն առնչվում էին Արցախին` պատմություն, խոհանոց, տուրիզմ, էներգահամակարգ, Ստեփանակերտի տրանսպորտային համակարգ, Տնջրի և այլն:
Դասընթացավարի համոզմամբ` երեխաների կողմից այս աշխատանքը նրանց համար դառնում է գիտելիք: Իհարկե, երկու շաբթում մարդիկ լիարժեք մասնագետ չեն դառնում, բայց նրանք ձեռք են բերում այն, ինչը հետագայում նրանց կօգնի այդ մասնագիտության տիրապետման հարցում:
Սվետլանա ԽԱՉԱՏՐՅԱՆ