ՀԱՄԱԳՈՐԾԱԿՑՈՒԹՅԱՆ ՀՈՒՇԱԳՐԻ ՍՏՈՐԱԳՐՈՒՄ
Հունվարի 19-ին ԱՀ կրթության, գիտության և սպորտի նախարարությունում տեղի ունեցավ համագործակցության հուշագրի ստորագրում ԿԳՍՆ և ՀՀ ինֆորմացիոն տեխնոլոգիաների ձեռնարկությունների միության/ԻՏՁՄ/ միջև:
Նախարար Նարինե Աղաբալյանն իր ողջույնի խոսքում նշեց, որ Հուշագրի ստորագրումն ամրագրում է 2015 թվականից միության և նախարարության միջև սկզբնավորված համագործակցությունը կրթության ոլորտում ՙԱրմաթ՚ ինժեներական լաբորատորիաների ներդրման ծրագրի իրականացման միջոցով: Նրա խոսքով` Հուշագրի ստորագրմամբ ամրագրում են նաև համագործակցության շարունակականության, ինչպես նաև ծրագրի իրականացման գործում ջանքերի և միջոցների հայթայթման պատրաստակամությունը: Նախարարն ընդգծեց տեղեկատվական տեխնոլոգիաների դերակատարությունը մեր կյանքում և ընդհանրապես երկրների զարգացման գործում: Ըստ նրա` շատ կարևոր է, որ այդ կրթության հիմքն ամրապնդվում է դպրոցում նաև այս լաբորոտորիաների ներդրման միջոցով:ՙԱրցախն ունի բավարար մտավոր ներուժ, բոլոր պայմանները կստեղծվեն մեր երեխաների կարողությունները զարգացնելու համար՚,-նշեց նախարարը:
ԻՏՁՄ գործադիր տնօրեն Կարեն Վարդանյանն իր խոսքում բացառիկ համարեց ներկա ժամանակաշրջանը. այն բարենպաստ է այն իմաստով, որ մարդուն հասանելի են բոլոր կրթական ռեսուրսները, և եթե նա ցանկություն ունի, կարող է իր կրթական պահանջները բավարարել գրեթե բոլոր ուղղություններով: Ժամանակաշրջանը բացառիկ է նաև այն առումով, որ, կապված աշխարհում տեխնոլոգիական արագ կատարվող փոփոխությունների հետ, կա մասնագետների մեծ պահանջարկ: Այսպես` 2016թ. միայն ԱՄՆ-ում և Եվրոպայում ՏՏ ոլորտում 2 մլն մասնագետի պահանջարկ կար: Կանխատեսվում է, որ այդ թիվը 2022թ. կհասնի 4-5 մլն-ի: Մյուս կողմից, Արցախի և Հայաստանի` պատերազմական իրավիճակում գտնվելու հանգամանքը մեզ ստիպում է ավելի շատ աշխատել այդ ուղղությամբ: 2016թ. ապրիլը ցույց տվեց, որ այսօրվա պատերազմը տեխնոլոգիական պատերազմ է: ՙԻրականում մարդ կարող է շատ հերոս լինել, բայց եթե որոշակի անջրպետ կա քո և հակառակորդի միջև, քո հերոսությունը կարող է դառնալ նահատակություն: Դրա համար մեր հերոսությունը պետք է ուղղել դեպի տեղեկատավական տեխնոլոգիաները , հերոսին սովորեցնել տեխնոլոգիաներ օգտագործել մարտի դաշտում և հաղթել՚,-ասաց նա` խորին համոզմունք հայտնելով, որ այդ ամենը ճիշտ կազմակերպելու դեպքում մեր լիակատար հաղթանակն ապահովված կլինի: Ըստ նրա `ՙԱրմաթ՚ լաբորատորիան այդ գործընթացի զարգացման գործիքներից մեկն է: Այն ներառում է ծրագրավորման, եռաչափ մոդելավորման, ռոբոտաշինության և այլ ուղղությունների համապարփակ ուսուցում, ինչպես նաև տարատեսակ կարողությունների և ազգային մշակութային արժեքների ուսուցմամբ ամառային ճամբարներ դպրոցականների համար:
Նույն օրը Մարտունու շրջանի Նորշենի միջնակարգ դպրոցում տեղի ունեցավ Արցախում թվով 9-րդ, իսկ ամբողջ Հայաստանում` 221-րդ ՙԱրմաթ՚ ինժեներական լաբորատորիայի հանդիսավոր բացման արարողությունը: Ն. Աղաբալյանն ազդարարեց, որ հաջորդը լինելու է Մատաղիսում` ՙԲեյզ Մեթըլս՚ ընկերության հովանավորությամբ:
Այդ մասին հանգամանալից` թերթի հաջորդ համարում:
ՙԱԱ՚