ՀԵՐԹԱԿԱՆ ԱՅՑ
Զարինե ՄԱՅԻԼՅԱՆ
Մայիսի 15-16-ը Երևանի ՙԷրեբունի՚ բժշկական կենտրոնի տնօրեն, բժշկական գիտությունների դոկտոր, պրոֆեսոր Միքայել Մանուկյանի գլխավորությամբ մի խումբ բարձրակարգ մասնագետներ ԱՀ առողջապահության նախարարության հանրապետական բժշկական կենտրոնում (ՀԲԿ) անվճար հիմունքներով իրականացրել են հիվանդների հետազոտություններ, խորհրդատվություններ, տեղի մասնագետների հետ կատարել կոնքազդրային հոդի բարդ վիրահատություններ ու երիկամների ստենտավորում: ԱՀ առողջապահության նախարար Արայիկ Բաղրյանը ողջունեց հերթական ծրագիրը և Միքայել Մանուկյանի հետ ունեցած հանդիպման ընթացքում նախանշվեցին համագործակցության ընդլայնման հետագա անելիքները` փորձի փոխանակման, ժամանակակից մեթոդների կիրառմամբ դասընթացների կազմակերպման ուղղություններով:
Այցի շրջանակներում ՙԷրեբունի՚ ԲԿ-ի ալերգոլոգ Սաթենիկ Բախչինյանը, ընդունելով ամբուլատոր ալերգիկ հիվանդներին, նշեց, որ գարնանը, ալերգիայի սրացման շրջանն է, ուստի, ինչպես Երևանում, այնպես էլ Ստեփանակերտում հիվանդների դիմելիությունը բարձր է։ Բժիշկը, խորհրդատվություններից ու թեստավորված հետազոտություններից հետո, հիվանդներին նշանակեց հակաալերգիկ դեղորայքային բուժումներ։ Նրա պարզաբանմամբ՝ սեզոնային այս շրջանում հիմնականում լինում են ալերգիկ ռենիտներ, ատոպիկ դերմատիտներ և բրոնխիալ ասթմա, ինչպես նաև Կվինկեի այտուցներ, ալերգիկ այլ երևույթներ։ Ալերգոլոգը հավաստիացրեց, որ ալերգիկ հիվանդություններն անբուժելի չեն, պարզապես պետք է հետազոտվել, հետևել բժշկի նշանակումներին և համառորեն անցնել փուլային բուժումները, որի արդյունքում ապաքինումն ակներև կլինի։
Նույն կենտրոնի բժիշկ-ուրոլոգ Էդուարդ Վարդանյանը պարզաբանեց, որ հիվանդները հիմնականում դիմել են ստորին միզուղիների բորբոքային և ադենոմաների խնդիրներով։ Համապատասխան հետազոտություններից հետո կատարվել են դեղորայքային և վիրահատական միջամտություններ։ Սրտաբան-առիթմոլոգ Միհրան Մարտիրոսյանի խոսքով՝ ՙԷրեբունի՚ բժշկական կենտրոնը տարիներ ի վեր նմանատիպ ծրագրեր է իրականացնում ՀՀ-ում և ԱՀ-ում ու, մինչ տվյալ բուժհաստատություն այցելելը, մասնագետները նախապես քննարկում են տեղի առողջապահական ոլորտի կազմակերպիչների հետ իրականացվելիք բուժօգնության ծավալները, անհրաժեշտ բժիշկների ներգրավվածությունը, և նախանշված խմբով կազմակերպում ՙԲաց դռների օր՚, որի շրջանակներում էլ իրականացվում են տարբեր խորհրդատվություններ, հետազոտություններ և անհրաժեշտության դեպքում` վիրահատական միջամտություններ։ Իսկ եթե տեղի պայմանները և առկա սարքավորումները հնարավորություն չեն ընձեռում կատարել հրատապ վիրահատական միջամտություններ, ապա մասնագետները հիվանդի բուժօգնությունն արդեն կազմակերպում են Երևանում: Արդեն երկրորդ անգամ լինելով Արցախում` սրտաբան-առիթմոլոգը նշեց, որ առաջին այցի ընթացքում ՀԲԿ-ում հետազոտել է ավելի քան 100 հիվանդի, իսկ այս այցի շրջանակներում երկու օրվա ընթացքում բուժօգնություն է ցուցաբերել երկու խմբի հիվանդների։ Նրանց մի մասն արդեն վիրահատվել էր ՙԷրեբունի՚-ում, և ծրագրի շնորհիվ ենթարկվեցին հերթական ստուգումների՝ ստանալով ցուցումներ, իսկ հիվանդների մյուս մասը կարիք ունեին նեղ մասնագետների խորհրդատվության։ ՙԵս կարող եմ փաստել, որ Արցախի բոլոր սրտաբաններն ունեն բարձր որակավորում, պարզապես ոլորտում կա նաև նեղ մասնագետների կարիք, ինչպես օրինակ, առիթմոլոգիայի կամ փոքր միջամտությունների առումով, և անհրաժեշտություն է առաջանում նեղ մասնագետի խորհրդակցության ու բուժօգնության։ Նման ծրագրերի շնորհիվ էլ լրացվում է այս բացը՚,- նշեց Միհրան Մարտիրոսյանը։
Այցի շրջանակներում պրոֆեսոր Հարություն Քուշկյանի հանձնարարությամբ Արցախ են այցելել ՙԷրեբունի՚ ԲԿ-ի առիթմոլոգ, ուրոլոգ, հոդաբան, նյարդաբան, ալերգոլոգ, օրթոպեդ բարձրակարգ մասնագետները, որպեսզի տեղում ճիշտ ախտորոշելով նեղ մասնագիտության կարիք ունեցող հիվանդներին, ցուցաբերեն որակյալ բուժօգնություն։ Ընդհանուր առմամբ՝ Հանրապետական բժշկական կենտրոնում խորհրդատվություն է ստացել 164 մարդ, իրականացվել է լաբորատոր-գործիքային 72 հետազոտություն և վիրահատվել 6 հիվանդ:
;