ՍՏՈՐԱԳՐՎԵԼ Է ՓՈԽԸՄԲՌՆՄԱՆ ՀՈՒՇԱԳԻՐ
Լաուրա ԳՐԻԳՈՐՅԱՆ
Արցախի Հանրապետության կրթության, գիտության և սպորտի նախարարության և ՙԱնուշավան Աբրահամյան՚ բարեգործական կրթական հիմնադրամի միջև մայիսի 27-ին փոխըմբռնման հուշագիր է ստորագրվել։ Այդ նպատակով ԱՀ ԿԳՍ նախարարությունն իր հարկի տակ հյուրընկալել է Հիմնադրամի ներկայացուցիչներին` կառույցի ղեկավար ու հիմնադիր Անուշավան Աբրահամյանի գլխավորությամբ։
Հիմնադրամի կողմից իրականացվող ծրագրերն ուղղված են շրջանների երիտասարդության միջին մասնագիտական հմտությունների բարելավմանը, ինչը նրանց հնարավորություն կտա հետագայում պատշաճ աշխատանք ունենալ։
Հերթական ծրագիրը, որը պետք է իրականացվի Արցախում, վերաբերում է Բերձորում գյուղատնտեսական քոլեջ հիմնելուն։
Փոխըմբռնման հուշագիրը ստորագրեցին կողմերը՝ ԱՀ կրթության, գիտության և սպորտի նախարար Նարինե Աղաբալյանն ու կրթական հիմնադրամի նախագահ Անուշավան Աբրահամյանը:
Կարևորելով Հուշագրի ստորագրումը՝ Նարինե Աղաբալյանը շնորհակալություն է հայտնել բարերարին` նախնական (արհեստագործական) և միջին մասնագիտական կրթության ոլորտում տարիներ շարունակ ներդրած ավանդի համար։ Նախարարի հավաստմամբ՝ Արցախում արհեստավորների, գյուղատնտեսության ոլորտի բարձր ու միջին մասնագետների պահանջարկ կա։ Բերձորում հիմնադրվող քոլեջում հիմնականում գյուղատնտեսական և վերամշակող արտադրության մասնագիտություններ են ուսուցանվելու։ Հաշվի առնելով շրջանի աշխարհագրական դիրքը, ռեսուրսները, գյուղատնտեսական նշանակության հողերի առկայությունն ու զարգացման հեռանկարները` ակնկալվում է, որ ծրագիրը կհաջողվի կյանքի կոչել: ՙՍտեղծելով նման կրթական հաստատություն և պատրաստելով համապատասխան մասնագետներ` մենք կսկսենք ավելի արդյունավետ օգտագործել մեր ունեցած ռեսուրսները, որոնք կնպաստեն մեր երկրի զարգացմանը՚,- ասաց ԿԳՍ նախարարը։
Ծրագրի իրագործմանը կաջակցեն ՀՀ կրթության և գիտության և ԱՀ գյուղատնտեսության նախարարությունները։ Հանդիպմանը ներկա ՀՀ կրթության և գիտության նախարարության մասնագիտական կրթության վարչության պետ Արտակ Աղբալյանը, ով միաժամանակ ծրագրի միջնորդն է հանդիսանում, նշեց, որ Արցախի և Հայաստանի համասեռ կառույցները պարբերաբար հանդես են գալիս ծրագրերի, նոր չափորոշիչների, մասնագիտական փորձի փոխանակմամբ։ ՙԲերձորում գյուղատնտեսական քոլեջ հիմնելը հերթական ծրագիրն է, և նախարար Ն. Աղաբալյանի հետ պայմանավորվածության համաձայն՝ կտրամադրենք ներդրվող մասնագիտությունների համար անհրաժեշտ դասագրքերն ու ձեռնարկները, բոլոր չափորոշիչները, դասախոսների վերապատրաստում կկազմակերպենք, կվերանայենք Արցախում առկա տվյալ մասնագիտության ծրագրերը: Մենք կներդնենք նաև ձեռնարկատիրական մոդուլը, որը նորություն է. դեռ 2 տարի է, ինչ իրականացնում ենք այն Հայաստանում: Նորույթը նպատակ ունի շրջանավարտներին տալ ոչ միայն տեսական և գործնական գիտելիքներ, այլև ձեռնարկատիրական հմտություններ փոխանցել՚,- ասաց Ա. Աղբալյանը։ Նրա կարծիքով՝ ծրագիրը մեծ դեր կունենա արցախցիների, երկրի տնտեսության զարգացման գործում։
Խոսելով Հիմնադրամի գործունեության մասին՝ բարերար Անուշավան Աբրահամյանը նշեց, որ կառույցը, հավատարիմ մնալով իր առաքելությանը, ևս մեկ քայլ կատարեց Հայաստանի ու Արցախի շրջանների երիտասարդության ապագայի կերտման ճանապարհին։ Նրա համոզմամբ՝ նոր նախաձեռնության շնորհիվ արցախցի երիտասարդները հետաքրքիր մասնագիտություն և աշխատանք կունենան ապագայում ու չեն լքի իրենց բնակավայրերը: ՙՀայաստանի 9 մարզերում արհեստագործական ուսումնարաններ ենք բացել, որտեղ պատանիներին ուսուցանում են ռոբոտաշինություն, ծրագրավորում, գինեգործություն, ոսկերչություն, համակարգիչների վերանորոգում, կար ու ձև, դիզայն, փայտամշակում, վարսավիրական, հասարակական սննդի ու սպասարկման և այլ մասնագիտություններ,- ասաց Անուշավան Աբրահամյանը։- Խորհրդակցելով Արցախի կրթության, գիտության և սպորտի նախարարության ղեկավարության հետ՝ Հիմնադրամի անդամներս եկել ենք այն եզրակացության, որ այստեղ գյուղատնտեսության մեծ հնարավորություններ կան, սակայն մասնագետներն այս բնագավառում քիչ են։ Ուստի որոշեցինք մեր նպաստը բերել՝ Բերձորում հիմնելով գյուղատնտեսական քոլեջ՚:
Քաշաթաղի շրջվարչակազմի ղեկավար Ստեփան Սարգսյանը, ով նաև Հիմնադրամի հոգաբարձուների խորհրդի անդամ է, իր հերթին հավաստիացրեց, որ Բերձորում գյուղատնտեսական քոլեջի հիմնումը մեծ հեռանկարներ ու հնարավորությունների ասպարեզ է բացում շրջանավարտների և ուսանողների համար։ Նա միաժամանակ հաստատեց, որ նման ներուժ շրջանում առկա է։ ՙՈւնենալով նոր կրթական մոդելներ, գյուղատնտեսության ոլորտում նորամուծություններ` մենք կխթանենք ամբողջ գյուղատնտեսական ոլորտը: Քոլեջը նոր կրթական համալիր է լինելու, որտեղ հաճախելու են ոչ միայն Քաշաթաղի, այլև Արցախի մյուս բոլոր շրջանների և Սյունիքի մարզի դպրոցականները՚,- ասաց շրջվարչակազմի ղեկավարը։
Բերձորի գյուղատնտեսական քոլեջը, ինչպես հավաստիացրին Հուշագիրը վավերացնողները, նախատեսվում է ստեղծել մեկ տարվա ժամանակահատվածում։ Ապագա կրթական հաստատությանն արդեն իսկ տրամադրված շենքը կվերանորոգվի ժամանակակից պահանջներին համապատասխան։