ՍՏԵՂԾԱԳՈՐԾԵԼՈՒ ՊԱՀԱՆՋ՝ ՈՂՋ ԿՅԱՆՔԻ ԸՆԹԱՑՔՈՒՄ
Էմմա ԲԱԼԱՅԱՆ
Օրերս Ստեփանակերտի պատկերասրահում Հադրութի շրջանի մանկապատանեկան ստեղծագործության կենտրոնը մշակութասեր ստեփանակերտցիներին ներկայացրեց իրենց սաների` տարվա կտրվածքով կատարած աշխատանքները: Ցուցադրությունը նվիրված էր Երեխաների պաշտպանության միջազգային օրվան:
ՄՊՍԿ-ի գործունեության, ձեռքբերումների, նպատակների մասին խոսք ասաց տնօրեն Իրինա Թամրազյանը: Նա ընդգծեց, որ Կենտրոնը, կարևորելով երեխաների ստեղծագործական ներուժի բացահայտումն ու զարգացումը, ձգտում է հնարավորինս շատ մասնաճյուղեր բացել շրջանի տարբեր գյուղերում. եթե որևէ գյուղում կա համապատասխան մասնագետ, պետական միջոցներով կամ բարերարների օգնությամբ մասնաճյուղը գործում է: Այսօրվա դրությամբ ՄՊՍԿ-ում գործում է 38 խմբակ` նկարչության, բրուտագործության,գորգագործության, ասեղնագործ գորգի, կարպետագործության, գոբելենի, ասեղնագործության, ուլունքագործության, մաքրամեի, պարի, դհոլի… Հաճախում է 466 երեխա: Տնօրենը, որպես վերջին տարվա կարևոր նվաճում, ընդգծեց սահմանապահ Մեխակավանում մասնաճյուղի բացումը, որտեղ արդեն գործում է 8 խմբակ` 110 երեխայի ընդգրկմամբ:
Իրինա Թամրազյանը գոհունակությամբ նշեց, որ իրենց նախաձեռնությունների համար միշտ գտնվում է հովանավոր` ընդգծելով, որ վերջին տարիներին գործին օգնում է նաև համացանցը: Նա մեծ երախտապարտությամբ նշեց Գրիգորի Գաբրիելյանցի ներդրումը, ում արագ արձագանքմամբ ու հովանավորությամբ Մեծ Թաղեր գյուղում հիմնվել է գորգագործական արհեստանոց, և սեպտեմբերի 1-ին նախատեսվում է նոր մասնաճյուղի բացումը, որտեղ կգործեն գորգագործության, կարպետագործության խմբակներ: Տնօրենի տեղեկատվությամբ` Մեծ Թաղերը հայտնի է եղել գորգագործության վարպետներով, որոնք այսօր էլ կան և կնպաստեն արվեստի այդ ճյուղի զարգացմանը: Նա մեծ խանդավառությամբ ցուցահանդեսին ներկա բարերար Գ. Գաբրիելյանցին նվիրեց երեխաների գործած ՙԿենաց ծառ՚ հուշանվեր գորգը, որը հանդիսանում է Կենտրոնի խորհրդանիշը: Ի. Թամրազյանը գոհունակությամբ նշեց նաև ՙԱրարիչ՚ բարեգործական հիմնադրամի ղեկավարության աջակցության մասին, ում վերաբերյալ տեղեկությունները գտել են համացանցում, առցանց դիմել են օգնության խնդրանքով, որպեսզի կարողանան մասնակցել ՙՎերածնունդ՚ միջազգային փառատոնին: Բոլոր խնդիրներն արագ լուծվել են, և ՄՊՍԿ-ի սաներից որոշները ՙՎերածնունդ՚ միջազգային փառատոնին գրավել են մրցանակային տեղեր:
Նա բոլորի ուշադրությունը սևեռեց Կենտրոնում գործող հագուստի մոդելավորման խմբակ հաճախող սաների վրա, որոնք ցուցադրեցին իրենց աշխատանքները` ազգային տարազի փոքր-ինչ արդիականացված տարբերակով:
Միջոցառման վերջում խնդրեցինք ԱՀ մշակույթի, երիտասարդության հարցերի և զբոսաշրջության փոխնախարար Մելանյա Բալայանին կիսվել տպավորություններով:
-Բարձր եմ գնահատում թե՜ միջոցառումը, թե՜ ցուցադրության հանած աշխատանքները, քանզի դրանցում տեսնում ենք երեխաների ներաշխարհը: Դա սերունդների դաստիարակման լավագույն է մեթոդներից է, որի արդյունքում կունենանք մշակութասեր երիտասարդություն: Դա հատկապես արդիական է այսօր, երբ գրեթե բոլորը մտել են քաղաքական մրցավազքի մեջ` մոռանալով այն պատասխանատվության մասին, որը պետք է կրենք երեխաների դաստիարակման հանդեպ: Մշակույթը սովորեցնում է ստեղծագործել, որի պահանջը զգացվում է ողջ կյանքի ընթացքում:
;