ՙՀՈՒՄՈՐԻ ԼԻԳԱ՚-Ն ԾԱՌԱՅՈՒՄ Է ՆՊԱՏԱԿԻՆ
Արմինե ԴԱՆԻԵԼՅԱՆ
ք. Մարտունի
Օրերս Մարտունու մշակույթի և երիտասարդության կենտրոնում շրջկենտրոնի հումորասերների համար ֆանտաստիկ շոու ներկայացրեցին ՙՀումորի լիգա՚ նախագծի լավագույն և սիրված ՙԱրցախի բուհերի հավաքական՚, ՙԳոլֆ 3՚, ՙՀետ-թրիկ՚, ՙԶվերապոլիս՚ թիմերը։
Մեր հանդիսատեսին, իրավամբ, հնարավորություն ընձեռվեց մեկ ժամից ավել լիաթոք զգալ ծիծաղի համն ու բույրը։ Այն մեր հասարակության մեջ վերաարթնացրեց հումորի զգացումը։
-ՙՀումորի լիգա՚ նախագիծը, եթե կարելի է նաև այլ կերպ կոչել, Հայաստանի հումորի բաց առաջնությունը, ստեղծվել է հեռուստատեսային ոլորտում երիտասարդներին նոր ժամանցով ապահովելու և ինքնադրսևորվելու հնարավորություն տալու նպատակով։ Հաշվի առնելով երկու եթերաշրջանների բարձր վարկանիշը, հանդիսատեսի հետաքրքրությունն ու սերը, կարելի է ասել` ծրագիրը ծառայել է իր նպատակին։ Այս եթերաշրջանում ԱՀ-ն ներկայացնող թիմը համալրված էր Արցախի բուհերի ուսանողներով և, հավաքական թիմով ներկայանալով ծրագրին, կարողացել է սիրվել և՜ հանդիսատեսի, և՜ ժյուրիի կողմից։ ՙՄենք հասել ենք եզրափակիչ խաղին և գրավել 4-րդ հորիզոնականը։ Իսկ ընդհանուր մրցանակաբաշխության ընթացքում ես արժանացել եմ ՙԼավագույն կերպար՚ մրցանակին։ Եթերաշրջանի ավարտից հետո համերգային շոու-ծրագրով ՙՀումորի լիգայի՚ բոլոր թիմերը հանդես եկան Երևանում։ Կարծում եմ` նման ծրագրերը պահանջված են նաև Արցախում։ Ստեփանակերտի համերգներից զատ առաջարկեցի ևս մեկ համերգ անցկացնել մեր քաղաքում: Հանդիսատեսի մեծ մասը երիտասարդներ և պատանիներ էին, ինչն ինքնին ստիպում էր համապատասխան լսարանի համար ներկայանալ համապատասխան սցենարով: Լսում ենք նաև քննադատություններ, ստանում հակասական մեկնաբանություններ, բայց, ընդհանուր առմամբ, շատ հաճելի հանդիսատես ունենք՚,- մեզ հետ ունեցած զրույցի ժամանակ ասաց ՙԱրցախի բուհերի հավաքական՚ թիմի անդամ Հովիկ Հովսեփյանը: