ՙԱՐՑԱԽՅԱՆ ԲԵՄԻՆ ՀԱՆԴԵՍ ԳԱԼԸ ՄԵԾ ՊԱՏԻՎ Է՚
Սուսաննա ԲԱԼԱՅԱՆ
Օրերս Ստեփանակերտի Սայաթ-Նովայի անվան երաժշտական քոլեջում տեղի ունեցավ Կոմիտասի անվան ազգային քառյակի համերգը` նվիրված Կոմիտասի ծննդյան 150-ամյակին: Սիրված կոլեկտիվին ունկնդրելու էին եկել մայրաքաղաքի երաժշտասերներ, քոլեջի դասատուներ ու ուսանողներ: Ներկա էր ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը:
Համերգի սկզբում հնչեց Դ. Շոստակովիչի Կվարտետը` լարային քառյակի համար, ապա ծրագիրն ամբողջությամբ նվիրվեց Կոմիտասին: Մեծ սիրով ու վարպետությամբ երաժիշտները նվագեցին Սարգիս Ասլամազյանի` լարային քառյակի համար մշակված Կոմիտասի երգերը` ՙԿռունկ՚, ՙԳարուն ա՚, ՙՔելեր, ցոլեր՚, ՙԱլ այլուխս՚, ՙՎաղարշապատի պար՚, ՙՀաբրբան՚, ՙՔելե, քելե՚, ՙՉինար ես՚, ՙԵրկինքն ամպել է՚ և այլ գոհարներ: Դահլիճը պարզապես կախարդված էր մեծ վարպետների անկրկնելի կատարումներից: Բուռն ծափահարություններն ու ՙԲրավո՚, ՙԲիս՚ վանկարկումներն էին հնչում ի պատասխան ամեն մի ելույթի: Յուրաքանչյուր հանդիպում սիրված կոլեկտիվի հետ մեծ պարգև է ստեփանակերտցիների համար, խոստովանում են հանդիսատեսները և խորին երախտագիտություն հայտնում երաժիշտներին:
Խմբի գեղարվեստական ղեկավար Էդուարդ Թադևոսյանը շնորհակալություն հայտնեց ջերմ ընդունելության համար ու խոստովանեց, որ Արցախից հրավերը մշտապես ընդունում են մեծ ոգևորությամբ: ՙԱրցախյան բեմին հանդես գալը պատիվ է մեզ համար,- անկեղծորեն ասաց նա:- Մենք այստեղ գալիս ենք ոչ պարտքի զգացումով: Մենք գալիս ենք մեծ սիրով, քանի որ այստեղ ապրում են հերոսական մարդիկ: Մենք Երևանում հանգիստ ապրում ենք` քաջ գիտակցելով, որ Հայաստանի սահմաններն այստեղ պահում են անսասան: Մարդիկ սիրում են իրենց քաղաքը, այնքան շատ են սիրում, որ պահում են մաքուր, ինչպես իրենց տունը: Այստեղ ապրում են մարդիկ, ովքեր շատ են սիրում ունկնդրել լավ երաժշտություն, ապրում են երաժշտությամբ: Մեծ սիրով ենք գալիս և պատրաստ ենք ավելի հաճախ գալ՚:
Ի դեպ, օր առաջ Կոմիտասի անվան ազգային քառյակը ելույթ ունեցավ Տաթևի վանական համալիրում` Կոմիտասի 150-ամյակին նվիրված միջոցառմանը, որը կազմակերպել էին ՙԱվրորա՚ ֆորումի հիմնադիրները: Հաջորդ օրվա առավոտյան Քառյակի երաժիշտները` Էդուարդ Թադևոսյանի ղեկավարությամբ, հանդիպում ունեցան ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանի հետ: Հանդիպման ընթացքում քննարկվեցին համագործակցության ծրագրեր: Ըստ խմբի ղեկավարի, նշված ծրագրի ընթացքում Քառյակի անվանի երաժիշտների կողմից կանցկացվեն վարպետաց դասեր, կիրականացվեն այցեր Արցախի շրջաններ, կտրվեն համերգներ:
Հետագա ծրագրերի մասին խոսելով, մաեստրո Թադևոսյանը նշեց, որ խմբի հաջորդ համերգը կկայանա նոյեմբերի 9-ին Երևանում: Իսկ նոյեմբերի 16-ին Երևանի Արամ Խաչատրյանի անվան ֆիլհարմոնիկ մեծ դահլիճում շուքով կնշվի Կոմիտասի անվան քառյակի հիմնադրման 95-ամյակը: Այս կարևոր տարեդարձի հետ միասին կնշվեն ևս երկու հոբելյաններ` Էդվարդ Թադևոսյանի 50-ամյա և Ալեքսանդր Կոսեմյանի 30-ամյա գործունեությունը քառյակում: Երևանում կայանալիք այս երկու համերգներից հետո աշխարհահռչակ խումբը համերգաշարով կմեկնի Բեյրութ` ավարտելով այս տարվա համերգների շարքը: