ԼՐԱԳՐՈՂԸ, ՈՎ ՄԻՇՏ ՇՈՇԱՓՈՒՄ է ԵՐԿՐԻ ԶԱՐԿԵՐԱԿԸ
Նվարդ ՍՈՂՈՄՈՆՅԱՆ
Վահրամ Աթանեսյանը 60 տարեկան է։ Ճանաչված լրագրող, հրապարակախոս, քաղաքական վերլուծաբան, շրջանային (ՙՋրաբերդ՚) և զինվորական (ՙՄարտիկ՚)թերթերի նախկին խմբագիր, գրքերի խմբագիր, Հայաստանի Գերագույն խորհրդի պատգամավոր (1990-1995թթ.), Արցախի Հանրապետության 3-րդ, 4-րդ, 5-րդ գումարումների Ազգային ժողովի պատգամավոր, արտաքին հարաբերությունների հանձնաժողովի նախագահ:
Ներկայացնում ենք մեր հարցազրույցը Վ. Աթանեսյանի հետ:
-Դու` ժամանակի մեջ, և ժամանակը` քո մեջ, ժամանակի քո ընկալումը։
-Նախ` շնորհակալ եմ հանրապետական թերթին այս անհիշեցում հիշելու համար։ Շոյված եմ։ Շեքսպիրի հերոսն ասում էր` ժամանակն իր շավղից դուրս է սայթաքել, իսկ ռուս բանաստեղծն` օրհնյալ համարում նրան, ով աշխարհ է եկել ճակատագրական ժամի։ Իմ ժամանակը, երեւի, գորբաչովյան ՙպերստրոյկայինն՚ էր լինելու։ Ես ինձ տեսնում էի նորացող Լիտերատուրնայա գազետայի, Նովի միր, Դրուժբա նարոդով, Ինոստրաննայա լիտերատուրա հանդեսների հավատավոր ընթերցող, երբ տպագրվում էին Սոլժենիցինի ՙԿարմիր անիվը՚ կամ Անատոլի Ռիբակովի ՙ33 թվականը եւ մյուս տարիները՚, թարգմանվում էին Ֆոլկները, Վուլֆը, համաշխարհային գրականության մյուս հսկաները, եւ այդ նշագրումներով իրականությունը գնահատող մարդուս առջեւ բացվում էր սքանչելի մի հորիզոն։ Այնպես որ նոր հայացք էի ուզում ձգել հայրենի գրականության դասականների գործին` Տերյանի, Չարենցի, բայց այդ փայփայած հեռանկարի վրայով ահռելիորեն անցավ 88 թվականը, եւ ամեն ինչ առարկայացավ. կամ տրվում ես ասպիրանտուրայի, թեկնածուականի պաշտպանության խոստումնալի ապահովությանը, կամ կանգնում քո ՙխելագարված ամբոխների՚ հետ` նույն գծի եւ սկզբունքների վրա, որոնց ստույգությունը գործնականում չնչին, հուզականորեն, մինչդեռ, թվում էր պատմական էպոխայի միակ ճշգրիտ ձեւակերպում։ Ես երկրորդն ընտրեցի։
Եվ իմ ժամանակը ցավալիորեն կիսվեց եւ դեռ չի ամբողջանում։
Չի էլ ամբողջանա։
-Որ ոլորտում աշխատել ես, ստեղծագործել ես, նվիրվել ես։ Կիսատ-պռատության զգացում չկա։ Ստեփանակերտի մանկավարժական ինստիտուտն ավարտելուց հետո աշխատում էիր քո ծննդավայրում` որպես հայոց լեզվի և գրականության ուսուցիչ։ Այդ տարիներին մամուլում հայտնված քո հոդվածները գրական-գրականագիտական շրջանակներում թարմ խոսք էին։ Բայց ինչ-որ տեղ կարծես թե քո ճանապարհները մինչև վերջ տեղ չեն հասնում։ Գուցե ՙմեղքը՚ քո՞նն է կամ ժամանակների՞նը։
-Ասված է` մարս մտադրվում է, աստված` տնօրինում։ Իմ դեպքում տնօրինողը Մաքսիմ Հովհաննիսյանը եղավ։ Չգիտեմ` հորս հետ ունեցած մտերմության շնորհի՞վ, թե՞ մամուլում տպագրված հոդվածներիս, նա ինձ հրավիրեց ՙԽորհրդային Ղարաբաղի՚ սեփական թղթակցի աշխատանքի։ Եւ ինձ համար ճանապարհ հարթեց, որ դեռ շարունակվում է։ Գլխավորը դա է, մյուսներն արահետներ են, որ ինձ դարձյալ բերել-բերում են ելակետին։
Ու չէի ասի, թե բոլոր ասպարեզներին նույն նվիրումը տվել եմ։ Մանավանդ` մանկավարժությանը, որ չեմ սիրել։
Ուսուցանողի հավակնոտությունն իմ էությանը հարիր չէ։ Ես ավելի շատ սովորող եմ։
Մեր ժամանակը, ցավոք, հավակնոտության է, նույնիսկ` ամբարտավանության։ Եւ դրանից է, երեւի, որ ինձ լավ չեմ զգում։
-Դու կարծես թե մշտապես վերադառնում ես այն կետին, որտեղից սկսվել է քո լրագրողական գործունեությունը, որի 30 տարին լրացել է վերջերս։ Ֆեյսբուքյան քո էջի գրառումներում անդրադառնում ես քո սկզբին, երբ աշխատանքի ընդունվեցիր ՙԽորհրդային Ղարաբաղ՚ թերթում` որպես թղթակից։ Քո ... անընդհատ վերադարձների մեջ կա հետաքրքիր փաստ. դու միշտ հայտնվում ես այնտեղ, որտեղ քո կարիքը խիստ զգացվում է. այս դեպքերում լրագրողական միջավայրը կարիք էր զգում թարմ մտածողության, թարմ խոսքի. իսկ քո խոսքը կշիռ ունի։
-Որքանով իմ խոսքը կշիռ ունի` ընթերցողի իմանալիքն է։ Ես իմ խոսքը սիրում եմ։ Եւ ամեն տողի հանդեպ վերաբերմունքս նույն գուրգուրոտն է, ինչպես` երբ դեռ նոր էի սկսում։ Հիմա կարծես այդ ջերմությունը պակասել է կամ չկա։
Հիմա գրում են` ինչ պահն է թելադրում։ Տպագիր մամուլի համար դժվար ժամանակներ են։ Մեղքը, գուցե թե, նաեւ իմ սերնդինն է, որ եսասեր գտնվեց, նորեր չփնտրեց, չփոխանցեց այն, ինչ ստացել էր ավագներից։ Խզման, Տերյանի ասած` ՙկրիզիսի՚ ժամանակներ են։ Մի կողմում տրաֆարետային հայրենասիրությունն է, մյուսում` մոդեռնիզմը` ֆեյսբուքյան բացերախությամբ։
Չգիտեմ, գուցե պահպանողական եմ, ուշացած։ Բայց եթե մարդ բառի վրա չի դողում, վրիպած է։ Քո գործը պիտի փայփայես` ինչպես երեխայիդ եւ նրա վրա դողաս։ Այդժամ նա գեղեցիկ կլինի, ամբողջական։ Ինչպես որ անընդմեջ վերադառնում ես մանկությանդ, ուզում ես քո զավակի մեջ տեսնել քեզ` ահա դրանից է, երեւի, քո ասած… իմ անվերջ վերադարձը։ Ստույգ չեմ կարող ձեւակերպել։
-Քո գրական առաջին փորձերի և հրատարակած առաջին գործի` ՙԵրկրի ժամանակը՚ վեպի միջև գրեթե դար է ձգվում։ Դու սպասում էիր քո ժամանակի՞ն։
-Դու ասացիր` վե՞պ։ Ես այդքան հավակնոտ չեմ, որ ինձ վիպասան համարեմ։
-Ե՜ս չեմ ասում։ Լևոն Խեչոյանն անվանել է` Էսսե-վավերագրություն-վեպ…
-Լեւոն Խեչոյանի հետ ծանոթությանս համար պարտական եմ Կիմ Գաբրիելյանին։ Իմ գործի մասին, այո, նրանից այդ բնութագրումն արվել է, բայց ես այնքան թերուս չեմ, որ չհասկանամ? Լեւոնն Արցախի խոսքն է գնահատել, երեւույթը, որովհետեւ կուզենար ռազմաքաղաքական կայացածությանը զուգահեռ, գուցե՞ դրանից առաջ ու մի փոքր էլ՝ վեր, գրական-իմացաբանական ինքնություն հայտնագործեր այստեղ? որպես ազգային վերագտնումի նշագրում։ Չգիտեմ, ես նրան այդպես եմ հասկացել, իսկ գեղարվեստական վեպը գրական ճարտարապետության իմացություն է պահանջում։ Դա բարդ կոնստրուկցիա է։ Իմը քրոնիկոն է, ժամանակագրություն, որտեղ գեղարվեստական կտորներ եթե կան էլ, ապա` միայն որպես բուն ասելիքի աբստրահում, երբ իրական ճշմարտության դեմ անզոր եմ եղել։ Դա իմ ժամանակը չէ։ Այդ հյուսվածքի էպոխան սինթետիկ է։ Այնտեղ եւ Ստալին կա, եւ Գորբաչով ու Լեւոն Տեր-Պետրոսյան։ Փորձել եմ երկրի ընթացքը տեսնել այդ առաջնորդների եւ իրականության մեջ նրանց ՙառաքյալների՚ վարքով։ Եւ եթե կարողացել եմ ինձ էլ ինչ-որ բանի կոչված հասկանալ ու ներկայացնել, եթե ընթերցողն այնտեղ ճանաչում է ինչ-որ հավաքականություն, ուրեմն ստացված աշխատանք է։
-Ինչպե՞ս ես հաղթահարում դժվարությունները, երբ հայտնվում ես դրանց մեջ։
-Իսկ ոչ դժվարություն լինու՞մ է։ Կյանքը գեղեցիկ տառապանք է։ Լինում է այն, ինչ լինելու է։ Պիտի կարողանաս հաշտ լինել։ Ես վաղուց չեմ զարմանում, չեմ զայրանում, չեմ հիասթափվում, չեմ հուսավառվում։ Եւ փրկություն եմ համարում գիրը, խոսքը։ Փրկություն՝ այս ապերասան ազգայնականությունից, անճաշակությունից, անկրթվածությունից, ինքնամեծարումներից եւ զառանցական ֆուտուրիզմից։
-Կա՞ ինչ-որ բան, որ կիսատ ես թողել քո գրական-հասարակական գործունեության ճանապարհին, որին այսօր ափսոսանքով ես վերաբերվում։
-Ոչ։ Ես ապագայի հավատավորն եմ եւ անցյալը չեմ փայփայում, թեեւ այնտեղ շատ գեղեցիկ, սիրելի բաներ կան։ Անցյալն` անցյալին։ Դա իմ սկզբունքն է, անհիշաչարության աղբյուրը, որ մղում է նորի։
-Վահրամ Աթանեսյանն այսօր զբաղվում է ինտենսիվ լրագրությամբ։
-Ոչ միայն։ Մտադիր եմ իսկական, կառուցիկ, ամբողջական վեպ գրել, նույնիսկ վերնագիրն եմ ընտրել` ՙ93 թվականը՚։ Մի քանի էջ սեւագրել եմ։ Տեսնենք։
-Շնորհավորենք քո հոբելյանը, ցանկանանք հաջողություն քո ստեղծագործական ընթացքին։