ՈՒՍՈՒՄՆԱՄԵԹՈԴԱԿԱՆ ՆՈՐ ՁԵՌՆԱՐԿ
Սվետլանա ԽԱՉԱՏՐՅԱՆ
Արցախի մանկավարժի գրադարանը համալրվեց ևս մեկ ուսումնամեթոդական ձեռնարկով: ՙԳրական ստեղծագործության ուսուցման և որակի բարձրացման մի քանի հարցեր՚. այս վերտառությունն ունի գիրքը, որը հեղինակել է բանասիրական գիտությունների թեկնածու Ամալայա Գրիգորյանը: Ստեփանակերտի ՙԳրիգոր Նարեկացի՚ համալսարանում, որի գիտական և որակի ապահովման կենտրոնների տնօրենն է հեղինակը, տեղի ունեցավ գրքի շնորհանդեսը:
Բացման իր խոսքում համալսարանի ռեկտոր, բանասիրական գիտությունների դոկտոր, պրոֆեսոր Վարդան Հակոբյանը նշեց, որ ուսումնամեթոդական այս ձեռնարկն արդիական է առաջին հերթին իր արծարծած խնդիրներով: Դպրոցներում անցկացված ուսումնասիրությունների արդյունքների հիման վրա հեղինակը գրականության ուսուցմանն առնչվող մի շարք հարցեր է բարձրացրել` ուսուցման մեթոդի ընտրություն, ներառարկայական և միջառարկայական կապերի կարևորություն, գրական երկերի ուսուցման հիմնախնդիրներ, բուհ-դպրոց կապ և այլն:
Ռեկտորի խոսքով` գրքի հրատարակությունն առաջընթացի մեկ կարևոր քայլ է նաև բուհի համար: Ինչպես հայտնի է, Արցախում գործող բուհերը հավատարմագրման գործընթացում են, և վերջնաժամկետ է նշված մինչև ընթացիկ դեկտեմբերի վերջը: Հավատարմագրման չափանիշներից մեկն էլ համալսարանի դասախոսների հրատարակած գիտական աշխատանքներն են:
Միջոցառմանը Ամալյա Գրիգորյանին շնորհավորելու առիթները մի քանիսն էին: Հիշյալ գրքի համար նրան ԲՈԿ-ի կողմից շնորհվել է դոցենտի կոչում, իսկ ՙՆարեկացու՚ հանձնաժողովն արժանացրել է համալսարանի ՙՏարվա լավագույն գիտական աշխատանք՚ մրցանակին:
Շնորհանդեսին ելույթ ունեցավ գրքի գրախոս, մանկավարժական գիտությունների թեկնածու Էլլադա Բաղդասարյանը, որը նշեց, որ կրթության բարեփոխումների ոլորապտույտում առաջավոր ուսուցիչների փորձը վեր հանելն այդ բարեփոխումները կյանքի կոչելու քայլերից է:
Միջոցառմանը ներկա էր Ստեփանակերտի քաղաքապետարանի կրթության և սպորտի բաժնի վարիչ Թերեզա Կարախանյանը: Նրա խոսքով` հեղինակը շնորհակալ գործ է կատարել` մասնակցելով մանկավարժական փորձուսուցումներին և ի մի բերելով մայրաքաղաքի ուսուցիչների առաջավոր փորձը: Ուսուցիչները նման ձեռնարկի կարիք ունեն:
Շնորհանդեսին բոլոր ելույթ ունեցողները կարևորեցին ձեռնարկի դերը կրթական համակարգում` որպես օգնություն մանկավարժական փորձուսուցմանը մասնակցող ուսանողներին, երիտասարդ ուսուցիչներին: