ՙԲՈԼՈՐ ԽԱՂԱՑԱԾ ԴԵՐԵՐՍ ԻՄ ԶԱՎԱԿՆԵՐՆ ԵՆ...՚
Մելանյա ՄԻԼՈՆՅԱՆ
Հունվարի 21-ին հանրապետության վաստակավոր արտիստ Սամվել Վիրաբյանը կդառնար 70 տարեկան: Գրեթե 40 տարվա բեմական կյանքի` արցախյան թատրոնին նվիրած երեք տասնամյակը բարոյապես պարտավորեցնում է ապրողներիս` հիշելու և գնահատելու նրան:
Նա ցավալիորեն կարճ կյանք ապրեց` ընդամենը 56 տարի, և հեռացավ անժամանակ, երբ առնելիք-տալիքը դեռ այնքան շատ էր… ՙԻմ տարիքը հասունացման մի շրջան է, որը տարիների հետ հղկվել-զտվել է ավելորդ ու անկարևոր տարրերից` պարարտ հող ստեղծելով նորանոր մտահղացումների ու նվաճումների համար, երբ ավելի խորն ես տեսնում ու ավելի շատ բան ես տեսնում…՚,-իր վերջին հարցազրույցում ասել է արտիստը:
Թումանյանի չքնաղ Լոռին է նրա ծննդավայրը, իսկ տոհմածառի իրենց ճյուղը ձգվում է չարենցահամ Կարսից, երբ ցարական բանակի սպա Աղաջան Վիրաբյանի որդին` Միքայելը, 1915թ. եղեռնից մազապուրծ` հայտնվեց Գյումրիի որբանոցում: Ամուսնանալով, Միքայել Վիրաբյանը տեղափոխվում է Կիրովական (ներկայիս` Վանաձոր), որտեղ աչք են բացել նրանց ինը զավակները: Առաջնեկը Սամվելն էր, ով շինարար հորից ժառանգել էր ոչ միայն նրա բազուկների զորությունը, այլև` սերը արվեստի հանդեպ. ՙԳլխավոր ՙմեղավորը՚ հայրս էր, որ ինձ ճակատագրով ընդմիշտ կապեց թատրոնին…՚: Առաջին անգամ հայրն է որդու ձեռքից բռնած թատրոն տարել, նրա դեմ բացել հրաշքներով լեցուն բեմաշխարհը: Առաջին ներկայացումը, որ կանխորոշեց ապագա դերասանի կյանքի ուղին, ՙՆամուսն՚ էր: Այն ժամանակ երևի նրա մտքով չէր էլ անցնում, որ տարիներ անց Ստեփանակերտում ինքն այդ նույն ներկայացման մեջ միաժամանակ երկու դեր պիտի մարմնավորեր` Բարխուդարի և Ռուստամի:
1968 թվականին ընդունվել է Կիրովականի Հովհ. Աբելյանի անվան պետական դրամատիկական թատրոն, միաժամանակ սովորել թատրոնին կից նորաբաց ստուդիայում: Համոզված լինելով, որ կրթությունը հղկում է դերասանի շնորհքը, 1972-ին ընդունվել է Երևանի գեղարվեստաթատերական ինստիտուտի դերասանական ֆակուլտետը: 1976-ին ավարտական քննության ժամանակ Զիմզիմով խաղաց (ՙՊեպո՚): Ի դեպ, այս դերը մինչև կյանքի վերջը մնաց սիրելի ու պաշտելի: Հենց ավարտական քննության ժամանակ էլ անվանի մանկագիր Գուրգեն Գաբրիելյանը, որ Ստեփանակերտի դրամթատրոնի այն ժամանակվա տնօրենն էր և մտահոգ էր թատրոնի սերնդափոխության հարցով, տեսնելով երիտասարդ Վիրաբյանի փայլուն խաղը, նրան հրավիրում է Ստեփանակերտ: Մեր թատրոնի ծաղկուն շրջանն էր դեռ. ավագ սերնդի տաղանդավոր դեմքերի հետ ասպարեզը նվաճելու էին հերթափոխի կանգնած երիտասարդները` պատրաստ ընդունելու վարպետության էստաֆետը: Նա բեմ մտավ լավագույն աստղերի հետ` Թամարա Մելքումյան, Սուրեն Համզոյան, Մամիկոն Միքայելյան, Գուրգեն Գրիգորյան, Շուշիկ Գրիգորյան, Մարգո Բալասանյան, Բենիկ Օվչյան… Եվ աշխատել է միշտ սովորել նրանցից, հղկվել է նրանց միջավայրում` նրանց հետ մեկտեղ իր երիտասարդ ուսերին կրելով թատրոնի բեռը:
Ստեփանակերտում Վիրաբյան դերասանն ինքնահաստատման դժվարին ուղի անցավ` լեցուն անհանգիստ որոնումներով ու ոգորումներով, հոգու անմնացորդ նվիրումով ու ամենատարբեր խառնվածքի դերապատկերներ մշակելու անուրանալի ձիրքով: Այստեղ առաջին բեմելը ՙՍոֆիկի սխալը՚ ներկայացման մեջ էր. Սուրեն Համզոյանը հիվանդ էր, և նրան առաջարկեցին խաղալ: ՙԲոլոր խաղացած դերերս հոգեհարազատ են ինձ, դրանք հոգուս ներկապնակի միջից ծնված սրտիս լարերն են ասես, իմ զավակներն են: Թույլ թե ուժեղ խաղացած կերպար` դերասանի համար դրանք իր զավակներն են: Ես բացասական կերպարի միջոցով էլ աշխատել եմ մեր ժողովրդին շատ բան հասու դարձնել, դրական և բացասական կերպարներին այլ սկզբունքով եմ մոտեցել` չարի մեջ փնտրելով բարին, լավի մեջ` չարը՚:
Ասենք, որ հանդիսատեսը սիրել և գնահատել է նրա խաղը, իսկ երբ վրա հասան ծանր օրերը, ու արտիստը մաքառում էր անբուժելի հիվանդության դեմ, այցելեց հիվանդանոց ու հոգեպես սատար կանգնեց նրան. ՙԵս ընկերներիցս շնորհակալ եմ… հիվանդանոցում ժողովուրդը լալիս էր ինձ համար՚,-միամիտ ու տղայական հպարտությամբ ասում էր նա, և զգում էիր, որ գոհ է դրա համար:
Տարիների հետ ավելի ցայտուն էին դրսևորվում կերպարակերտման խնդիրների անսխալ բացահայտումը, խոսքի հուզական հարուստ ելևէջները, հումորի բնածին և նրբին զգացողությունը, արտահայտիչ դիմախաղը: Նա այն հազվագյուտ դերասաններից էր, որ իրենով լցնում էր բեմը: Բեմական հրաշալի ֆակտուրա, գրագետ խոսք, գեղեցիկ ձայն, դերարարման յուրահատուկ ձիրք. նրա ստեղծած բոլոր կերպարները` կնքված ՙսեփական ձեռագրի՚ դրոշմով, առանձնանում են ինքնատիպ խաղարկուն ոճով, որը միշտ մնաց անշփոթելի ու սիրվեց հանդիսատեսի կողմից: Ինքն էլ հանդիսատեսին սիրեց, որին շատ բարձր էր գնահատում. ՙՀայաստանի շատ վայրերում եմ ես խաղացել, բայց Արցախի ժողովրդի պես հանդիսատես երևի մեկ էլ ֆրանսիացիներն են: Ճիշտ է, վերջին տարիներին ժողովուրդն օտարվել է թատրոնից, բայց եկեք հասկանանք, որ թատրոնը պետության գոյության ամենազորեղ կռվանն է: Իմ սիրելի ժողովրդին ուղղակի խնդրում եմ` երեխաներին մանկուց կապեք թատրոնի հետ, բացեք նրանց դեմ թատրոնի կախարդական հեքիաթը՚:
Նա սովորական դերասան չէր, այլ արտիստ էր ոտից գլուխ, որ բեմի վրա գերում էր իր անմիջականությամբ, բարդ ու հակասական կերպարներ ՙբացելու՚ շնորհքով: Նա անկանխատեսելի էր ինչպես բեմում, այնպես էլ կյանքում. պատճառը պոռթկուն էությունն էր և բանաստեղծական խառնվածքը: Նրա խաղը միշտ նոր էր ու վարակիչ, խաղում էր հախուռն ու կրքով, ասես հրաբուխ լիներ` պատրաստ ժայթքելու խորքում պահած հուրն ու մոխիրը: Ես այնքան էլ չզարմացա, երբ տնեցիներն ասացին, որ նա բանաստեղծություններ ու պատմվածքներ էր գրում, թեպետ երբեք տպագրության չէր տալիս: Զարմացա` երբ կարդացի դրանք… 50-ն անց արտիստը պատանեկան սրտի թրթիռով ու ավյունով էր գրում առաջին համբույրի ու սիրո մասին, նրա զորեղ արտաքինի տակ նուրբ ու փխրուն սիրտ էր տրոփում, որն այդպես էլ անճանաչ մնաց շատերին… Վիրաբյան-մարդուց ավելի նա սիրում էր Վիրաբյան-դերասանին, որովհետև զգում էր, որ ՙարտիստ Վիրաբյանն ավելի ուժեղ է, քան մարդ Վիրաբյանը՚:
Սամվել Վիրաբյանի ստեղծագործական կյանքի հունձքը բեղուն էր` 120-ից ավելի դեր է մարմնավորել արցախյան բեմում` Գիժ Դանիել, Բարխուդար, Ռուստամ, Ծմակի մարդ, կապիտան Չորնի, ուսուցիչ Մամյան, բազազ Արտեմ, Վարդան Ադամյան, Նիլ, Վյուգին, Կուլիկով, Նինոս, Գոգի և շատ այլ մեծ ու փոքր դերեր: Ինքն իր խաղացած դերերը յուրովի էր գնահատում. ՙԻմ խաղացած դերերից բացի ունեմ հինգ գլխավորից ավելի գլխավոր դերեր, որ աշխարհում ամեն մարդ խաղում է յուրովի` Միքայել, Վարդուհի, Վարդան, Նարինե, Աշխեն` զավակներս են՚: Որդին` Վարդանը, մի տուփի մեջ ի մի է բերել հոր հիշատակն ամփոփող մասունքներ, որոնք պահպանում է որպես ընտանեկան սրբություն` հին ժամացույցներ, հոր փաստաթղթերն ու անձնական իրերը, պապից ժառանգություն մնացած չիբուխն ու երկար շղթայով գրպանի ժամացույցը…Ուշադրությունս գրավեց ինքնաշեն մի դանակ` վրան գրված ՙԺաբո՚: Պարզվեց, որ ընկերներից շատերը նրան դիմում էին այդ մականունով, և դա նրան դուր էր գալիս: Իսկ Ժաբո էին կոչում անցյալ դարի խորհրդային լեգենդար ծանրորդ Լեոնիդ Ժաբոտինսկու պատվին, քանի որ երիտասարդ Վիրաբյանն էլ արտակարգ ուժի տեր էր և ձեռքը գցում ու քարը խաղացնելով պատից հանում էր…
Արցախյան պատերազմը հիմնիվեր շրջեց մեր կյանքը` բազում հաղթանակների հետ բերելով նաև հազարավոր թանկ զոհեր: Միքայել և Վարդան Վիրաբյանները նույնպես զինվորագրվեցին, իսկ արտիստ Վիրաբյանը, ինչպես Վարդանն է ասում, խոսքը զենք դարձրած` կատարեց ՙզամպալիտի՚ երիցս կարևոր պարտականությունը: Թվում է` նա միշտ քայլել է` չակնկալելով կոչումներ ու տիտղոսներ, և կարծես շատ ուշացան դրանք` և՜ Եղիշեի անվան պետական մրցանակը, և՜ 2004-ին տարվա լավագույն դերասան ճանաչվելը, և՜ վաստակավոր արտիստի կոչումը. ծանր ու անբուժելի հիվանդությունն ավելի վաղ էր վրա հասել և խարխլել կաղնին…
Երևի թե այսքանը բավարար հնարավորություն ընձեռեց վերհիշելու և խոնարհվելու արտիստի հիշատակի առջև, բայց ևս մի կարևոր շտրիխ` դիմանկարի ամբողջացման համար: 2006-ի ապրիլին` իր վերջին հարցազրույցում, հավերժի ճամփան բռնելուց մի քանի օր առաջ նա իրեն այսպես էր հուսադրում. ՙԵս ապրելու եմ 16 տարի և վեց ամիս…72 տարեկանի մեջ, որը մոտավորապես կլինի 2020 թվականի հոկտեմբերի 19-ին (հետո իմացա, որ 72-ը հոր ապրած տարիքն էր, իսկ հոկտեմբերի 19-ը` մահվան օրը), առավոտյան ժամը 5-6-ին մոտ արթնանալու եմ, վրաս-գլուխս մաքրելու եմ` Աստծո զավակ եմ, հավատացյալ… Լողանալով կմաքրվեմ, սպիտակեղենս կփոխեմ, տեղաշոր-բան հավաքեմ, մաքրեմ, դասավորեմ, մի կում ջուր խմեմ… Ճանապարհից առաջ մի 3-5 րոպե կնստեմ, իմ հավաքած տեղաշորում կպառկեմ սիրուն հագնված, ձեռքերս խաչելու եմ ու ասեմ` փառքդ շատ լինի, Աստված ջան, հիմա կարող ես հոգիս վերցնել…Շատ հետաքրքիր մահ է, չէ՞…՚: