ՓՈՂՈՑՆԵՐԻ ՍԱԼԱՊԱՏՄԱՆ ԱԿՏԻՎ ԱՇԽԱՏԱՆՔՆԵՐ ՄԱՐՏՈՒՆԻՈԻՄ
Սերգեյ ՍԱՖԱՐՅԱՆ
Արցախի Մարտունի քաղաքում, կենտրոնական փողոցների ասֆալտապատումից հետո, այժմ ընթանում են սալապատման աշխատանքներ։ Մարտունիում տարիների ընթացքում իրականացված աշխատանքների շնորհիվ այժմ քիչ չեն սալապատման եղանակով բարեկարգված փողոցները` հատկապես ծայրամասային թաղամասերում։
Ներկա պահին սալապատման աշխատանքներ են ընթանում Մարտունի քաղաքի Կոմիտաս Ավանեսյան փողոցում, որը շարունակվում է կենտրոնական` Գարեգին Նժդեհ փողոցից։
Կատարվող աշխատանքների ընթացքին ՙԱզատ Արցախ՚-ը ծանոթացել է տեղում։
Մեզ հետ զրույցում շինարարներից մեկն ասաց.
–Չնայած աշխատուժի խնդիր կա, բայց մենք փորձում ենք անել հնարավոր ամեն բան այս փողոցի սալապատումն արագ ավարտելու համար, որպեսզի բնակիչներն առաջիկայում սպասվող տեղումների հետևանքով խոչընդոտների չհանդիպեն։
Սալապատման աշխատանքներն իրականացնում է ՙՎԱՐԱՆԴԱՇԻՆ՚ ՓԲ ընկերությունը, պատվիրատուն՝ Մարտունու շրջվարչակազմն է։
Աշխատանքներ իրականացնում են այն փողոցներում, որտեղ գոյություն ունեն ջրահեռացման համակարգեր: Եթե փողոցը, որը ենթակա է սալապատման, փոքր է, ապա կառուցում են նաև կոյուղագծեր` հետագայում բարեկարգ այդ փողոցները չքանդելու համար։