ԳԻՏԱՃԱՄԲԱՐ ՇՆՈՐՀԱԼԻ ԴՊՐՈՑԱԿԱՆՆԵՐԻ ՀԱՄԱՐ
Լաուրա ԳՐԻԳՈՐՅԱՆ
Հոկտեմբերի 24-30-ը Բյուրականի աստղադիտարանը (ԲԱ) և Հայկական աստղագիտական ընկերությունը (ՀԱԸ) կազմակերպել են Բյուրականյան յոթերորդ գիտաճամբարը` շնորհալի դպրոցականների համար։ Համաձայն Արցախի գիտական կենտրոնի և Բյուրականի աստղադիտարանի միջև բոլորովին վերջերս ստորագրված համագործակցության հուշագրի` Արցախի գիտական կենտրոնի նախաձեռնությամբ գիտաճամբարին մասնակցել են նաև արցախցի մի խումբ դպրոցականներ։
ՙԸնտրել ենք աստղաֆիզիկայի նկատմամբ հետաքրքրություն դրսևորողներին։ Համագործակցության շրջանակներում բավականին աշխատանքներ են նախատեսվում։ Դրանցից մեկն էլ արցախցի ուսանողների և դպրոցականների պարբերական այցերի կազմակերպումն է, որի նպատակը նրանց մոտ գիտության հանդեպ սեր առաջացնելն է։ Համաձայն հուշագրի՝ նախատեսվում է նաև այլ համատեղ գիտական, կրթական, հանրային ծրագրերի իրականացում։ Սա դեռ սկիզբն է և, ըստ իս, մեր համագործակցությունը կլինի երկարատև ու արդյունավետ՚,- ասաց ԱՀ գիտական կառույցի ղեկավար Անյուտա Սարգսյանը։
Գիտաճամբարի օրերին դպրոցականները հանդիպումներ են ունեցել հայտնի աստղագետների հետ, մասնակցել աստղագիտական հանրամատչելի ինտերակտիվ դասախոսությունների, ինտելեկտուալ խաղերի, այցելել են աստղադիտարանի խոշորագույն 2.6մ. դիտակ, Վիկտոր Համբարձումյանի տուն-թանգարան և այլն։ Նրանց համար կազմակերպվել են արշավներ Բյուրականի շրջակայքում, էքսկուրսիաներ` Ամբերդ, Տեղերի վանք, Օշական, կազմակերպվել են գիշերային դիտումներ՝ փոքր աստղադիտակներով, մարզական խաղեր և մրցույթներ։
Արցախցի դպրոցականները ակտիվություն են ցուցաբերել բոլոր միջոցառումներում` արժանանալով համապատասխան մրցանակների։