ԿՐԹԱԿԱՆ ՀԱՄԱԳՈՐԾԱԿՑՈՒԹՅՈՒՆ՝ Ի ՆՊԱՍՏ ՀԱՅՐԵՆԻՔԻ ԲԱՐԳԱՎԱՃՄԱՆ ԵՎ ՀԶՈՐԱՑՄԱՆ
Լուսինե ԴԱՇՅԱՆ
ԱՀ ԿԳՄՍ նախարար Լուսինե Ղարախանյանը Մարտունու շրջվարչակազմի նիստերի դահլիճում նոյեմբերի 16-ին հանդիպել է շրջանի մի շարք դպրոցների և մանկապարտեզների տնօրենների հետ։ Հանդիպմանը ներկա էին ԱՀ նախագահի խորհրդական-հատուկ հանձնարարությունների գծով ներկայացուցիչ` Սփյուռքի հարցերով Ազատուհի Սիմոնյանը, շրջվարչակազմի աշխատակազմի կրթության և սպորտի բաժնի վարիչի պաշտոնակատար Աննա Ավանեսյանը։
Հանդիպման ընթացքում ԱՀ ԿԳՄՍ նախարարը ներկայացրել է Արցախի դպրոցների և Սփյուռքի հայկական վարժարանների ու դպրոցների միջև նախատեսվող համագործակցության` ՙ Քույր դպրոցներ՚ ծրագիրը։ Նպատակն է զարգացնել և բարձրացնել ԱՀ դպրոցների և Սփյուռքի հայկական վարժարանների կրթության որակը, ստեղծել ամուր կապ Սփյուռքի հայկական կրթօջախների և ԱՀ հանրակրթական դպրոցների միջև։
Արցախի և Սփյուռքի վարժարանների ու դպրոցների համատեղ դասերի, ուսուցիչների փորձի փոխանակման, կրթական ծրագրերի ուսումնասիրման, կրթամշակութային ծրագրերի փոխանակման, փոխադարձ այցելությունների, որոշ դեպքերում՝ առցանց հանդիպումների միջոցով նախատեսվում է բարձրացնել կրթության որակը, ընդլայնել աշակերտների աշխարհայացքը և հմտությունները, նրանց համար ստեղծել նոր՝ ժամանակակից կրթական միջավայր և ինչպես նաև` երկուստեք հայրենակից հասակակիցների հետ շփվելու, զբաղվածության և զարգացման հնարավորություններ։
Ծրագրում, որն իրականացվելու է 2021թ. դեկտեմբերից, ներառված են նաև Մարտունու շրջանի Մաճկալաշեն, Բերդաշեն, Թաղավարդ համայնքների և Մարտունու հ. 2 դպրոցները, ինչպես նաև վեց՝ Մարտունու հ. 1, Բերդաշենի, Մաճկալաշենի, Թաղավարդի, Քերթի և Ճարտարի հ. 1 մանկապարտեզները։
Նշվեց, որ նախատեսվում է ստեղծել ֆեյսբուքյան համատեղ էջ-խումբ, Zoom հարթակ, ընդգրկել տնօրեններին, ուսուցիչներին, աշակերտներին, միասին մշակել ժամանակացույց-դասացուցակ, առնվազն ամիսը մեկ անգամ իրականացնել համատեղ դասընթաց։ Այն հնարավորություն կտա մեր կրթության որակը բարձրացնել: Համագործակցությունն անընդհատ զարգանալու է և օնլայն կապից անցնելու է ուղղակի շփման, որպեսզի Արցախն ավելի շոշափելի ու ճանաչելի դառնա Սփյուռքի երեխաների համար և հակառակը՝ Արցախի երեխաները ծանոթանան և ընկերանան Սփյուռքի իրենց հայրենակիցների հետ։
ՙՍտեղծել ՙՔույր դպրոցներ՚՝ նշանակում է մեկտեղել ինտելեկտուալ ռեսուրսները, կիսել միասնական հայրենիքի տեսլականն ու գաղափարը, հմտություններ բերել Արցախ, փոխանակել կարողություններն ու փորձը։ Ես այն կարծիքին եմ, որ այս ծրագրի շնորհիվ մեր դպրոցները դառնալու են ավելի հզոր, ուժեղ, մեր աշակերտներն՝ ավելի հայրենասեր, խելացի, և դա նպաստելու է Սփյուռքը հայրենիք բերելուն՚,-հատկանշել է Լ. Ղարախանյանը։
ՙՍա ֆիզիկապես և հոգևոր, գաղափարային և ծրագրային առումով Սփյուռքը Արցախին կապելու մեր ծրագրերից ամենակարևորն է։ Սփյուռքը առաջին հերթին գաղափարախոսություն է, մարդկային և ինտելեկտուալ մեծ ռեսուրսներ, որոնք պետք է գան հայրենիք` Արցախ։ Առնվազն պետք է սկսել ճիշտ կետից, և մենք սկսում ենք դպրոց առ դպրոց կապել Սփյուռքի համայնքների հետ։ Սա նպաստելու է նրան, որ հայությունն, անկախ իր բնակության վայրից, կապվի Հայոց աշխարհի և Արցախի հետ և լավագույնս ճանաչի իր հայրենիքը։ Մեր առաքելությունն է՝ կանգնել Մարտունու շրջանի առաջնագծին մերձ համայնքների կողքին՝ պայքարելու, դիմադրելու համար, և ամեն կերպ պետք է նպաստենք, որ այս համայնքները չդատարկվեն, այլ գնալով ամրանան՚,-նշել է Ա. Սիմոնյանը։