Նոր գիրք՝ Արցախյան ազատամարտի և հերոսամարտիկների մասին
Լույս է տեսել Արցախյան ազատամարտի վետերան Վերա Գասպարյանի «Ասկերան» հուշապատում-տարեգրությունը:
Արցախյան առաջին պատերազմից մինչև 44-օրյա պատերազմն ընկած ժամանակահատվածի հուշագրության տպագրությունն իրականություն է դարձել Արցախի ժուռնալիստների միության նախագահ Կիմ Գաբրիելյանի, «Պահեստազորի սպաների միություն» ՀԿ նախագահ Կարմեն Ասլանյանի և Ասկերանի քաղաքապետ Հայկ Շամիրյանի աջակցությամբ:
Նախօրեին Ասկերանի Էդմոն Բարսեղյանի անվան միջնակարգ դպրոցում կայացել է Վերա Գասպարյանի գրքի շնորհանդեսը՝ խմբագիր Անահիտ Պետրոսյանի նախաձեռնությամբ:
Ներկա էին Ասկերանի շրջվարչակազմի ղեկավար Համլետ Ապրեսյանը, վարչակազմի պատասխանատու աշխատողները, Արցախյան պատերազմի մասնակիցներ, հյուրեր, ովքեր նախ մեկ րոպե լռությամբ հարգեցին Արցախյան բոլոր պատերազմներում նահատակված հայորդիների հիշատակը:
Բացման խոսքում Անահիտ Պետրոսյանը նշեց, որ «Ասկերան» հուշապատում-գիրքը բովանդակում է մի ուրույն հատված արցախյան հերոսամարտից և, անշուշտ, հետագա ուսումնասիրողների համար կարևոր տվյալներ է պարունակում:
«Ստույգ օրինակներով պատմվում է դաժան պատերազմում ասկերանցի ազատամարտիկների սխրագործությունների մասին, և այն ուղերձն ունի, որ Հայրենիքի համար կյանքը գիտակցաբար զոհաբերելն իսկապես անմահություն է»,-ասաց գրքի խմբագիրը՝ հավելելով, որ հեղինակի ձեռագիր տետրերը գիրք դարձնելու գաղափարը հղացել էր Ասկերանի «Բերդ» թերթի խմբագիր երջանկահիշատակ Վալերի Պետրոսյանը:
Մինչ այդ Վերա Գասպարյանի օրագրային գրառումները ժամանակ առ ժամանակ տպագրվում էին թերթում՝ պատմելով Ասկերանի, նրա քաջամարտիկների, հաղթանակների, ապագայի տեսլականի մասին։
«Գիրք գրելն ինքնին պատասխանատու աշխատանք է, և հեղինակի հետ համատեղ աշխատել ենք հավասար անդրադառնալ բոլորին, դեպքերի զարգացումը ներկայացնել պարզ ու հակիրճ շարադրմամբ, առանց ավելորդ լիրիկական զեղումների։ Ամեն ինչ անցողիկ է այս կյանքում, ուստի նորօրյա պատմությունը վաղվա սերունդներին ճշմարտագույնս ներկայացնելը, հատկապես մեր պարագայում, համարում եմ կարևոր մարտահրավեր: Գրքում տեղ գտած իրադարձություններն իրական հենք ունեն, որոնցից շատերի ականատեսն եմ, ու նաև այդ պատճառով սիրով կցվեցի գրքի կազմմանը, խմբագրմանն ու հրատարակմանը»,-ասաց Ա. Պետրոսյանը՝ երախտագիտություն հայտնելով գրքի տպագրության բոլոր աջակիցներին:
Արցախի ժուռնալիստների միության նախագահ Կիմ Գաբրիելյանը շնորհավորելով Վերա Գասպարյանին, նշել է, որ գիրքը վկայում է Ասկերանի հերոս տղաների սխրանքների ու նվիրվածության մասին:
«Այս գիքրը մեծ խորհուրդ ունի, և նրանով սերունդներ կդաստիարակվեն: Այսօր առաջարկում եմ նաև Ասկերանի գնդի մասին հուշերի գիրք ստեղծել: Ոչ մի պատերազմ և այդ բովով անցած հերոսամարտիկ չպետք է ստվերում մնա: Ականատեսների օգնությամբ մենք կարող ենք հուշեր հավաքել և սերունդներին մեծ արժեք թողնել»,-ասաց Կ. Գաբրիելյանը՝ պատրաստակամություն հայտնելով աջակցել այդ գաղափարը իրականություն դարձնելու գործում:
Հեղինակի աշխատանքն արժևորեցին և բարձր գնահատեցին նաև Ասկերանի շրջվարչակազմի Կրթության և սպորտի բաժնի վարիչ Կառլեն Մայիլյանը,
Արցախյան շարժման նախաձեռնող խմբի ղեկավար Սլավիկ Առուշանյանը:
Գրքի հեղինակ Վերա Գասպարյանը նշեց, որ Արցախյան առաջին պատերազմի հուշերը երբեք չեն լքելու իրեն: Նա մեկ առ մեկ հիշում է տղաներին, նրանցից շատերի վերջին խոսքն ու ցանկությունը. նրանք ուզում էին ապրել ու արարել ազատ ու անկախ Արցախում:
«Այդ տարիներին մի առանձին միաբանություն ու ոգի կար: Ասես մի մոր զավակներ լինեինք, քանզի նպատակը մեկն էր՝ հայրենիքի ազատագրումը թշնամուց: Այսօր ես կցանկանայի իմ ժողովրդին միաբռունցք և համերաշխ տեսնել, իսկ Արցախիս երկնակամարը միշտ խաղաղ ու կապույտ»,-ասաց կին-ազատամարտիկը՝ շնորհակալություն հայտնելով Անահիտ Պետրոսյանին, գրքի հովանավորներին: Նա երախտագիտությամբ նշեց երջանկահիշատակ Վալերի Պետրոսյանի ներդրումը գրքի տպագրության գործում:
Շնորհանդեսին Ասկերանի քաղաքապետ Հայկ Շամիրյանը շնորհակալագիր և հուշանվեր հանձնեց Վերա Գասպարյանին՝ բարձր գնահատելով նրա աշխատանքն ու մատուցած ծառայությունը հարազատ քաղաքին:
Կարինե ԲԱԽՇԻՅԱՆ