ՊԻՏԻ ՊԵՏԱԿԱՆԱՄԵՏ ՍԵՐՈՒՆԴ ԴԱՍՏԻԱՐԱԿԵՆՔ
Ստեփանակերտի Աշոտ Ղուլյանի անվան համար 2 դպրոցում հնչում է զանգը։ Պատմության ուսուցչուհի Կարինե Դադայանն արդեն հաջորդ դասարանում հին աշխարհի ժամանակաշրջանից անցնում է նորագույն պատմությանը, աշակերտների հետ տեղափոխվում մեր օրեր, բացահայտում խնդիրներն ու լուծումներ առաջարկում։ Ամեն օր ուսուցչուհին առնչվում է մարդկության, այդ թվում՝ հայոց պատմության բոլոր դարաշրջաններին, զուգահեռներ անցկացնում արդի ժամանակների հետ, ու այսպես 30 տարի։
ԱրՊՀ պատմաիրավաբանության բաժինն ավարտելուց հետո աշխատանքային մկրտությունը ստանում է Մարտակերտի շրջանի Ղազանչի գյուղում։ Արցախի անկախության առաջին տարիներն էին։ «Ուսանողական տարիներս համընկել էին Արցախյան շարժման պայքարի մեկնարկին։ Մայր Հայաստանի հետ միացման պայքարը վերածվեց պատերազմի։ Մեծ զոհողությունների գնով մեր սերունդը հաղթեց»,- հիշում է Կ. Դադայանը։ 1992թ. ամուսնանում է Ղազանչի գյուղից մի հայրենասեր տղայի՝ Վոլոդյա Եսայանի հետ։ Վերջինս եղել է գյուղի կամավորական ջոկատի, այնուհետև Խաչենի գումարտակին միանալուց հետո՝ վաշտի հրամանատար։ Տիկին Կարինեն ամուսնուն մշտապես ռազմաճակատում է հիշում, իսկ գործած սխրանքների մասին ընկերներն են պատմել։ Սակայն… անմահացավ։ Հետմահու արժանացել է «Մարտական խաչ» առաջին աստիճանի շքանշանի։
Ղազանչիի ազատագրումից հետո՝ Կարինե Դադայանը գյուղ է տեղափոխվում և 22 տարեկանում նշանակվում դպրոցի տնօրեն։ «Դպրոցը դեռ կայացման փուլում էր, բայց բնակիչներն ու կոլեկտիվը միասնական ու կազմակերպված էին։ Իմ մասնագիտությունից բացի կամավոր հիմունքներով դասավանդում էի նաև այն առարկաները, որոնց մասնագետները չկային։ Այսպես երկու տարի»,- պատմում է փորձառու ուսուցչուհին։ Ամուսնու զոհվելուց հետո Ստեփանակերտ է տեղափոխվում։ Երեք տարի Ֆիզմաթ դպրոցում դասավանդելուց հետո, աշխատանքի անցավ է իր հարազատ հ. 2 դպրոցում։
Կարինե Դադայանը նշում է, որ կարող էր ցանկացած մասնագիտություն ընտրել, բայց իր ուսուցչի՝ Լենա Ալահվերդյանի ու նաև ընտանիքի ազդեցությամբ ընտրում է հենց պատմություն առարկան. ՙՀայտնի պատմաբան Շահեն Մկրտչյանն իմ քեռին է։ 2020թ. ապրիլին վախճանվեց։ Ուժեղ արցախագետ էր, միշտ հիշում եմ նրա խոսքը՝ «Արցախի պարագայում սխալվելու իրավունք չունենք՚։ Շատ էինք զրուցում, ինձ համար ինքը Ուսուցիչ էր»։
Իսկ իր դասավանդած առարկայի մասին Կարինե Դադայանը փայլող աչքերով է պատմում, չնայած նկատել է, որ զանգից հետո մյուս ուսուցիչների համեմատ ամենահոգնածը հենց պատմության ուսուցիչներն են լինում։ «Պատմությունն անընդհատ զարգացող գիտություն է։ Պետք է լրացուցիչ հետաքրքիր նյութերով համեմել թեման։ Իսկ յուրաքանչյուր ուսուցիչ առաջին հերթին մասնագետ պետք է լինի։ Ինձ համար ամենացավալին այն կլիներ, որ ասեին ընկեր Դադայանն իր մասնագիտությանը չի տիրապետում։ Ուսուցչի զենքն իր գիտելիքն է»,- կարծում է նա։
«Ուսուցիչը մեծ դեր ունի, բայց աշակերտների ընկալումը, նրանց գիտակցական կարգապահությունը, ընտանիքներից եկած քաղաքավարությունը մեզ շատ օգտակար է։ Շատ ավելի արդյունավետ կլիներ, եթե ուսուցիչը դասարանում միայն իր առարկայից խոսեր ու գիտելիք տար սերնդին, իսկ դաստիարակությամբ զբաղվեր ընտանիքը, մանկապարտեզը»,- ասում է ուսուցչուհին ու ավելացնում, որ աշակերտների հաջողություններն իրեն անչափ ոգևորում են։ «Ուսուցիչը մարմինն է, աշակերտները՝ թևերը։ Աշակերտների հաջողությամբ մեր թևերը բացվում են»։
Ներկա իրավիճակում էլ, ըստ նրա, նախ պիտի պարտվածի հոգեբանությունը հաղթահարել։ «Գերմանիան երկու անգամ պարտություն է կրել, բայց հաղթահարել է այդ հոգեբանությունը։ Հիմա մենք պետք է այս սերնդի մեջ այնպիսի ոգի դաստիարակենք, որ հասկանան, որ այս վիճակից պիտի դուրս գանք»։
Նա առաջ նայելու իր բանաձևն է առաջարկում՝ ազգային գաղափախոսություն (ինքնատիպություն), անվտանգություն և երկրի տնտեսական բարգավաճում։
Տպավորություն չկա՞, որ պատմությունը կրկնվում է և 100 տարի անց նույն իրավիճակում նույն սխալներն ենք անում։ «Դրա պատասխանը գիտեմ. պատմության դասերին նստում են, բայց դասը չեն սերտում»,- ասում է Կարինե Դադայանը։
Ելքն այն է, որ ամեն մարդ իր հնարավորությունների սահմանում պատասխանատվություն ստանձնի, պետությունը կադրային ճիշտ քաղաքականություն վարի, կրթական համակարգին ուշադրություն դարձնի, արժևորի ուսուցչին. «Պատերազմից հետո հիմնական առանցքը ազգային գաղափարախոսությունն եմ դարձրել։ Պիտի պետականամետ սերունդ դաստիարակենք, յուրաքանչյուր հայ զգա, որ պետություն պիտի ունենա։ Եթե այդ գործում հաջողենք, հնարավոր է կանխել գահավիժումը»։
Տաթևիկ ԱՂԱՋԱՆՅԱՆ