[ARM]     [RUS]     [ENG]

ՄՇԱԿՈՒԹԱՅԻՆ ՕՋԱԽՆԵՐԻ ԳՈՐԾՈՒՆԵՈՒԹՅԱՆ ԲԱՐԵԼԱՎՄԱՆ ՀԱՄԱՐ

Օրերս  Հադրութի  վարչակազմի  նիստերի  դահլիճում  տեղի  ունեցավ  սեմինար-խորհրդակցություն՝    նվիրված  շրջանի  համայնքների մշակութային  օջախների  գործունեության  բարելավման  հիմնախնդիրներին:
Շրջվարչակազմի  աշխատակազմի  մշակույթի  և  երիտասարդության  հարցերի  բաժնի  վարիչ  Երմոնյա  Զաքարյանն  իր  ելույթում  ընդգծեց, որ  ԼՂՀ  մշակույթի  և  երիտասարդության  հարցերի  նախարարության  կողմից այդ ասպարեզում շրջադարձային փոփոխություններ են ծրագրվել 2010 թվականից։ Ըստ հաստատված ծրագրի՝ գործընթացն իրականացվում է  երեք  ուղղություններով:
 Մի  ուղղությունը  գյուղերում  արվեստի  դպրոցների  հիմնադրումն  ու  զարգացումն է, ինչի վառ օրինակը  ՙՏողի  արվեստի դպրոց՚ ՊՈԱԿ-ն է, որը դարձել է ենթաշրջանի  գյուղերի  մատաղ սերնդի գեղագիտական դաստիարակության հուսալի  օջախ: Կարևոր էր նաև կառուցվածքային  փոփոխությունների  գործընթացը, ինչի  արդյուքում  Հադրութի  մշակույթի  տունը  վերակազմավորվել է  ՙՄշակույթի  և  երիատասարդության  կենտրոն՚ ՊՈԱԿ-ի, որը  կոչված է  միավորելու  և  համատեղելու  շրջանում  գործող  գրեթե  բոլոր  մշակութային  կոլեկտիվների  գործունեությունը: Եվ երրորդ` նախարարությունը զանազան  միջոցառումներ է  նախատեսում անցկացնել։ Ապահովվել է շրջանի 10  համայնքների մասնակցությունը  շրջանային, իսկ  3  համայնքներինը` հանրապետական  մրցույթին: Հադրութի, Մեծ Թաղերի  և  Ուխտաձորի  համայնքների  մշակութային  օջախները հանրապետական  մրցույթում նվաճել են  մրցանակային տեղեր:
Առաջին հայ տպագիր  գրքի  500-ամյակին, Սայաթ-Նովայի  300-ամյակին, ինչպես  նաև  Ավ. Իսահակյանի  անվան  կենտրոնական  գրադարանի հիմնադրման  80-ամյակին նվիրված միջոցառումներ է կազմակերպել  գրադարանը: ՙՄշակույթի և երիտասարդության  կենտրոն՚ ՊՈԱԿ, ՙԴիզակ՚ ժողգործիքային համույթը համերգներով հանդես է  եկել  շրջանի գյուղերում, Պաշտպանության բանակի  զորամասերում, մասնակցել   Ստեփանակերտում  տեղի  ունեցած  մրցույթին՝   նվիրված  Սայաթ-Նովայի  ծննդյան  300-ամյակին:
Մշակույթի և  երիտասարդության  հարցերի  բաժնի առաջատար  մասնագետ  Լուսինե  Օհանյանը նշեց, որ ոլորտում  կատարվող  փոփոխությունները  վաղուց  անհրաժեշտ  էին։ Նա հիմնականում կանգ  առավ  երիտասարդության  հետ  տարվող  աշխատանքներին: ԼՂՀ  մշակույթի և երիտասարդության  հարցերի  նախարարության  կողմից  մշակվել է պետական  երիտասարդական քաղաքականության  2013-2017թթ.  ռազմավարությունը, որը  նպատակ է հետապնդում  ակտիվ  դիրքորոշում ունեցող  երիտասարդ  անձի  ձևավորումը, նրա իրավունքների ապահովումը, հետաքրքրությունների և նախաձեռնությունների  քաջալերումը,  գործող երիտասարդական հասարակական կառույցներին աջակցության և նոր կառույցների ստեղծման միջոցով քաղաքացիական հասարակության ձևավորումը։ Այսօր անհրաժեշտություն է գյուղերում ստեղծել  երիտասարդական  խորհուրդներ, որոնք պետք է համակարգեն գյուղի  երիտասարդության  հետ  տարվող աշխատանքները, նշեց  Լ. Օհանյանը: Նա ներկայացրեց նաև մեթոդական  առաջարկություններ  երիտասարդական խորհրդի ստեղծման և ծրագրերի մշակման վերաբերյալ:
Սեմինար-խորհրդակցությանը ներկայացվեց Ղարաբաղյան շարժման 25-ամյակի  տոնակատարությունների կազմակերպման և անցկացման  հետ  կապված  միջոցառումների ծրագիրը: Ե. Զաքարյանը սեմինարի մասնակիցներին հորդորեց  յուրաքանչյուր  գյուղում  մեծ  պատասխանատվությամբ  պատրաստվել և անցկացնել Ղարաբաղյան շարժման  25-ամյակի  տոնակատարությունը:
 
Էդիկ ԴԱՎԹՅԱՆ
ք. Հադրութ