ԹՈՂ ԱՐՑԱԽԻ ԲՈԼՈՐ ՏԱՐԻՆԵՐԸ ԽԱՂԱՂ ԼԻՆԵՆ…
Սրբուհի ՎԱՆՅԱՆ
Ստեփանակերտի շախմատի կենտրոնական տունը մայրաքաղաքի տարեցների սիրելի հավաքատեղին է. այն ոչ միայն զուտ շախմատ խաղալու կամ շախմատի մրցաշարեր անցկացնելու, այլև իրար տեսնելու, քաղաքական վերջին անցուդարձը քննարկելու, նորություններին ծանոթանալու, իսկ շատերի համար պարզապես ժամանակն անցկացնելու միակ վայրն է:
Գործում է անցյալ դարի 60-ական թվականներից: Շախմատի տունն իր այցելուների առջև դռները չի փակում նույնիսկ հանգստյան ու տոն օրերին և Արթուր ԱՄԻՅԱՆԸ` ՙՍտեփանակերտի շախմատի կենտրոնական տուն՚ ՊՈԱԿ-ի երիտասարդ տնօրենը, ով այն ղեկավարում է 2013 թվականից, հազիվ է համոզում նրանց, որ գոնե Ամանորյա տոներին երեք օրով ՙհանգստի՚ գնան: Իհարկե, երիտասարդ տնօրենը կցանկանար Ամանորը որևէ ձևով նշել Շախմատի տան այցելուների համար, բայց, ինչպես ասում են` հնարավորությունների հարց է. կառույցի տարեկան բյուջեն կազմում է 6 միլիոն 800 հազար դրամ, որից 6 միլիոնը աշխատավարձ է, 500 հազարից ավելին՝ ջեռուցման ծախս:
ՙՇախմատի տան՚ միջոցառումներն էլ կազմակերպվում են հովանավորների կամ նույն շենքում տեղակայված` Շախմատի ֆեդերացիայի ֆինանսավորմամբ:
Շախմատի տան շենքային պայմանները բարելավման կարիք ունեն, և սիրելի հավաքատեղին բարեկարգ ու առավել հարմարավետ տեսնելը ինչպես տնօրենի ու աշխատակիցների, այնպես էլ այցելուների ամանորյա երազանքն է. օդափոխության համակարգը լավ չի աշխատում: Խնդրից ամաչում են հատկապես երբ օտարերկրյա զբոսաշրջիկներ են այցելում, հետաքրքրվում հայկական շախմատի պատմությամբ, ավանդույթներով: Մասնակի վերանորոգումներ շենքում կատարվել են քաղաքապետարանի հետ համատեղ` նվազագույն պայմաններ ստեղծելով միջոցառումների կազմակերպման ու այցելուների համար:
2013 թվականից այստեղ նաև կազմակերպվում են շաշկու և նարդու առաջնություններ:
Չնայած տարիքային սահմանափակում չկա, Շախմատի տան հիմնական այցելուները 50-ն անց տղամարդիկ են. մենք հաճելիորեն զարմացանք, երբ մեր այցելության պահին երկու սեղանիկի մոտ տեսանք նաև երիտասարդների` խորացած խաղի մեջ: ՙՄենք այստեղ գալիս ենք, իհարկե, շախմատ խաղալու, բայց մեծ հետաքրքրությամբ լսում ենք նաև տարեցների պատմությունները, ծանոթանում նրանց կյանքի փորձառությանը՚,-ասացին նրանք:
Շախմատի տան այցելուներին մի քանի խմբի կարելի է բաժանել. մարդիկ, ովքեր եկել են շախմատ խաղալու (նրանք թոշակառու մտավորականներ են կամ շախմատիստներ), նարդի խաղացողներ, որոնք առանձին խումբ են կազմում, և մարդիկ, ովքեր տաքուկ անկյուն են փնտրում կամ հետևում են խաղացողներին: Հետաքրքիր է, որ առաջին խմբի մարդկանց քիչ է հետաքրքրում, թե ով է տնօրենը կամ ովքեր աշխատակիցները, ովքեր են այցելուները, նրանք շախմատի աշխարհում են, իրար մեջ մրցումներ են անցկացնում` ժամանակ տրամադրելով սիրած մարզաձևին:
***
Ինչպե՞ս են դիմավորելու Նոր տարին Շախմատի կենտրոնական տան հիմնական այցելուները, ի՞նչ ակնկալիքներ ունեն, ի՞նչ բարեմաղթանքներ ու ցանկություններ:
Էդուարդ ՀԱՅՐԱՊԵՏՅԱՆ, 88 տարեկան. - Երկար տարիներ եղել եմ այս հիմնարկի տնօրենը։ 65 տարուց ավելի զբաղվել եմ շախմատով։ Մաթեմատիկայի թոշակառու ուսուցիչ եմ: Ինչ աշխատանք էլ կատարել եմ, դրան զուգահեռ մարզչական գործունեություն եմ ծավալել։ Այսօր էլ չեմ կարողանում կտրվել շախմատից։ Սովորաբար Նոր տարին դիմավորում եմ ընտանիքիս` զավակներիս, թոռներիս հետ։ Ցանկությունս այն է, որ մեր երկրում խաղաղություն լինի, իսկ մեր սերունդը լավ ապրի այս գեղեցիկ երկրում։ Հիմա ես հիշողություններով ապրող մարդ եմ, բայց, միևնույն է, Նոր տարուց ակնկալիքներ, հրաշքներ սպասում եմ՝ ինչպես բոլորը: Ամանորը հրաշքների տոն է և ցանկանում եմ, որ հրաշքներ լինեն բոլորիս կյանքում. կյանքն ավելի բարեկեցիկ լինի, մարդիկ` բարի, որպեսզի երջանկացնեն իրենց շրջապատողներին։
Հրանտ ԿԱՐԱՊԵՏՅԱՆ, 83 տարեկան.- Վատ չեմ ապրել: Տա Աստված, որ միշտ խաղաղություն լինի, մեր սեղանները՝ լիքը, աշխարհը՝ ծաղկած, և մենք նման պայմաններում դիմավորենք յուրաքանչյուր Նոր տարի։
Սովորաբար առաջին հերթին խմում ենք բոլորիս առողջության, հաջողության, խաղաղության կենացը։ Երկրորդ կենացը միշտ մեր զոհերի՝ այն մարդկանց հիշատակին է, ովքեր մեզ համար խաղաղ ապրելու և ուրախանալու պայմաններ են ստեղծել։ Աստված լուսավորի նրանց հոգին, և նրանց հիշատակը միշտ վառ լինի մեր սրտերում։
Ես լավատես եմ. հավատում եմ, որ հայ ազգի համար գալիք տարիները պիտի բարեհաջող լինեն։
Հրաչիկ ԱՎԱՆԵՍՅԱՆ, 84 տարեկան.- Երկար տարիներ ՙՊոլիգրաֆ՚ ձեռնարկության տնօրենն եմ եղել։ Շախմատի սիրահար եմ և միայն թոշակի անցնելուց հետո չէ, որ այս ակումբի այցելուն եմ։ Շախմատը և՜ գիտություն է ինձ համար, և՜ արվեստ, և՜ սիրած զբաղմունք։ Թող խաղաղ լինեն Արցախի բոլոր Նոր տարիները։ Ճիշտ է, շատերի ֆինանսական, սոցիալական վիճակն այն չէ, ինչ պետք է լինի, բայց ամեն դեպքում պետք է տրամադրվել տոնականորեն այս կարճ կյանքում և Նոր տարին դիմավորել պապերից եկած ավանդույթների համաձայն։ Նոր տարում կուզենայի, որ մարդիկ ավելի բարեկեցիկ ապրեն, թոշակն ու աշխատավարձն էլ հերիքի տոնական միջոցառումները նշելուն։
Ռադիկ ՀԱՅՐԻՅԱՆ, 72 տարեկան.-Շախմատի տունը Ստեփանակերտի միակ տեղն է, որտեղ տարեցները կարող են գալ ու անցկացնել իրենց ժամանակը։ Ես կցանկանայի, որ նման տեղերը Ստեփանակերտում և հանրապետությունում ավելի շատ լինեին և ոչ միայն շախմատի սիրահարների համար։
Կարևոր է Նոր տարին ուրախ սրտով դիմավորելը, այնպես որ՝ բոլորին ուրախ Նոր տարի եմ մաղթում:
Նոր տարում կուզենայի, որ պատմական արդարությունը վերականգնվի, Ցեղասպանությունը վերջապես ճանաչվի և փոխհատուցվեն մեր բոլոր կորուստները։ Առաջիկա ընտրությունների արդյունքում էլ կուզենայի ժողովրդին նվիրված մարդիկ ընտրվեն։ Այդ նվիրվածությունն է որոշում, թե ինչպես կապրի ժողովուրդը:
Հրաչիկ ՎԱՆՅԱՆ, 74 տարեկան.- Այստեղ գալիս ենք և՜ ընկերներ գտնելու, և՜ ներհանրապետական անցուդարձին հետևելու, և՜ մեր ժամանցը կազմակերպելու, և՜ առօրյա հոգսերից կտրվելու համար։ Ամանորն ամենագեղեցիկ տոներից է, թող բոլորիս ընտանիքներին այն միայն հաջողություն բերի: Պատերազմ տեսած մարդու առաջին կենացը տարվա ամենակարևոր տոնին, կարծում եմ, խաղաղության կենացն է։
ԲԵնիկ ՀԱՅՐԱՊԵՏՅԱՆ, 80 տարեկան.- Այստեղի հաճախորդն եմ վաղուց, երբ այն դեռ ոչ թե Շախմատի տուն էր, այլ սրճարան: 60-ական թվականներն էին: Հետո Էռնեստ Պետրոսյանի ջանքերով բացվեց Շախմատի տունը: Սովետական Միությունում այդ մարզաձևը շատ հարգի էր, Տիգրան Պետրոսյան էլ` աշխարհի չեմպիոն: Է. Պետրոսյանը հավաքեց առաջին շախմատասերներին և բացեց ակումբը։
Բարեմաղթանքս խաղաղությունն է: Ոնց ստացվում է, այնպես էլ դիմավորում ենք Ամանորը՝ տարվան համապատասխան, միայն թե խաղաղություն լինի։ Կենաց ասել չեմ սիրում՝ կարճ խոսող մարդ եմ։ Ամենաերկար կենացս է՝ լավ լինենք, առողջ ապրենք։