ԿԱՄՔ՝ ԿՅԱՆՔԸ ԳՅՈՒՂՈՒՄ ՇԱՐՈՒՆԱԿԵԼՈՒ
Առաջնագծամերձ Եղցահող գյուղ մեր այցելության ժամանակ համայնքապետարանում վերանորոգման աշխատանքներ էին ընթանում, ուստի համայնքի ղեկավար Արտակ Հակոբյանի հետ մեր զրույցը տեղի ունեցավ դպրոցում։
-Գյուղի տեղը եկեղեցապատկան տարածք է եղել։ Եկեղեցին կառուցելուց հետո մարդիկ տեղափոխվել են իրենց գյուղերից, բնակություն հաստատել չորսբոլորը։ Սուրբ Աստվածածին եկեղեցին թվագրված է 18-րդ դարի վերջով։ Մինչև 44-օրյա պատերազմը նախատեսված էր այն վերանորոգել, բայց չհասցրեցին ծրագիրը կյանքի կոչել։ Նախկին համագյուղացիների հովանավորությամբ 2003թ. գյուղում կառուցվել է նաև Սուրբ Սարգիս եկեղեցին։ Բայց աղոթելու համար գյուղացիները նախընտրում են հին, կիսավեր եկեղեցին,- պատմում է Արտակ Հակոբյանը։
Համայնքի տարածքում կան բազում պատմամշակութային հուշարձաններ։ Եղցահող գյուղում են գտնվում 18-19-րդ և 17-19-րդ դարերով թվագրված գերեզմանոցներ, 18-րդ դարի աղբյուր-հուշարձան, 17-19-րդ դարերի սրբատեղիներ, ինչպես և մ.թ.ա. 2-ից 1-ին հազարամյակների դամբարաններ, 12-ից 13-րդ դարերի թվագրված գյուղատեղիներ և այլն։ 15-19-րդ դարերում Եղցահողի տարածքը խիտ բնակեցված է եղել։ 1918-1920թթ. իրադարձությունների և Խորհրդային Ադրբեջանի իշխանությունների վարած հակահայ քաղաքականության հետևանքով Եղցահողի հարակից Մեծ Խերխան, Փոքր Խերխան, Դաշտահող, Կանաչ Թալա գյուղերը լիովին հայաթափվեցին։ Բայց մինչ այսօր էլ պահպանվում են Դաշտահողի, Կանաչ Թալայի, Փոքր Խերխանի, Մեծ Խերխանի փլատակները։ Համայնքի ղեկավարի տեղեկատվության համաձայն, Մարտունու շրջանի Խերխան և Մարտակերտի շրջանի Չափար գյուղերի բնակիչների մի մասը բնիկ խերխանցիներ են եղել։
-Խորհրդային տարիներին Եղցահողի բնակչության թիվը նվազել էր աշխատատեղերի բացակայության պատճառով։ 88-ի շարժումը խթան հանդիսացավ, որպեսզի գյուղացիները վերադառնան իրենց օջախները, և բնակչության թիվն աճեց մինչև 200,- ասում է համայնքի ղեկավարը։ -Այս պահի դրությամբ գյուղն ունի 153 բնակիչ։ Ունենք նաև վերաբնակեցված 7 ընտանիք, որոնցից 3-ը Հադրութի շրջանի Արևշատ գյուղից են, 3-ը՝ Շուշիի շրջանի Քիրսավանից և 1-ը՝ Բերձորից։
Առաջնագծամերձ Եղցահողի բնակչությունն այսօր չի կարողանում զբաղվել անասնապահությամբ և հողագործությամբ։ Ադրբեջանական դիրքերը գտնվում են գյուղի վերջին տնից ընդամենը 300 մետր հեռավորության վրա։ Համայնքապետի խոսքով՝ ադրբեջանցիները հաճախ գողանում են գյուղի անասունները, ձիերը, ինչի պատճառով մարդիկ նպատակահարմար չեն գտնում անասուն պահելը։ Գյուղում մեծ թափ է ստացել մեղվաբուծությունը։ Հարկ է նշել, որ պատերազմից հետո բարերարների կողմից գյուղացիներին մեղվաընտանիքներ են տրամադրվել, ինչպես նաև խոճկորներ, ոչխարներ, իսկ բազմազավակ ընտանիքներին՝ նաև խոշոր եղջերավոր անասուններ։ Համագյուղացի բարերարները մշտապես աջակցում են բազմազավակ ընտանիքներին։ Բարերար Գուրգեն Մելիքյանը բազմազավակ ընտանիքներին մշտապես օգնություն է ցուցաբերում՝ տրամադրելով սառնարաններ, լվացքի մեքենաներ։
Ի՞նչ խնդիրների առաջ է կանգնած եղցահողցին այսօր։ Համայնքի ղեկավարը մանրամասնում է.
-Իհարկե, առաջնայինը պիտի համարել անվտանգության խնդիրը, քանի որ գյուղը թշնամու ուղիղ նշանառության տակ է գտնվում, ինչի պատճառով տղամարդիկ մշտապես հերթապահություն են իրականացնում։ Կա կարևոր մի խնդիր ևս. գյուղն ամառային շրջանում զրկված էր ջրից, քանի որ ակունքը գտնվում է թշնամու հսկողության տակ։ Վերջերս ռուս խաղաղապահների միջնորդությամբ կարողացանք ջուր ստանալ, որը, սակայն, հարցի լուծում չէ։ Առաջարկություն ենք ներկայացրել կառավարությանը՝ այլընտրանքային միջոց գտնել և նոր ջրատար անցկացնել։ Մեծ խնդիր է նաև գազատարի վնասման հետևանքով երկնագույն վառելիքից զրկվելը,- ասում է Արտակ Հակոբյանը։
Դպրոցի ձեռքբերումներին ու խնդիրներին էլ անդրադարձավ հաստատության տնօրեն Լենա Իշխանյանը, ով ամենամեծ ձեռքբերումը համարում է ՙԵրկարօրյա դպրոց՚ ծրագրի ներդրումը, ինչի շնորհիվ թեթևացել է ծնողների ծանրաբեռնվածությունը։
-Պատերազմից հետո կարևոր ձեռքբերում է ՙԵրկարօրյա դպրոց՚ ծրագրի կյանքի կոչելը, ինչի շնորհիվ գյուղական բնակավայրերում լուծում են ստացել մի շարք կենսական խնդիրներ։ Երեխան սնվում է դպրոցում, սովորում դասերը, մասնակցում մի շարք արտադպրոցական և արտադասարանական միջոցառումների, ինչը, հատկապես, բազմազավակ և անապահով ընտանիքների համար մեծ աջակցություն է,- ասում է տնօրենը՝ հավելելով,- մանկավարժ-մասնագետների պակաս չունենք։ Դպրոցականների խնդրանքն էլ մեկն էր՝ սպորտդահլիճի ու խաղահրապարակի կառուցումը։
Ոգևորիչ էր երեխաների նման խնդրանքը, որը նշանակում էր, որ կա կյանքը գյուղում շարունակելու մեծ կամք։
Էմմա ԲԱԼԱՅԱՆ