[ARM]     [RUS]     [ENG]

ՙԹՈՒՖԵՆԿՅԱՆ՚ ՀԻՄՆԱԴՐԱՄԸ ՇԱՐՈՒՆԱԿՈՒՄ Է ԾՐԱԳՐԵՐԸ

Թուֆենկյան՚ հիմնադրամն Արցախում հայտնի է հատկապես իր ՙԲնակարանային աջակցություն վիրավոր զինծառայողներին՚ ծրագրով: Եվ ահա օրերս լուծում ստացավ հերթական ընտանիքի բնակարանային խնդիրը:

Մարտի 13-ին Ասկերանի շրջանի Պատարա գյուղում բնակարանամուտ էր: Արցախյան գոյամարտի ժամանակ վիրավորված  ազատամարտիկ, երկրորդ կարգի  հաշմանդամ Արարատ Ավանեսյանի ընտանիքն ունեցավ սեփական տանիքը: Առանձնատունը գնվել եւ վերանորոգվել է ՙԹուֆենկյան՚ հիմնադրամի կողմից, ՙՎիվաՍել-ՄՏՍ՚-ի եւ ՙԶարուկյան՚ հիմնադրամի համաֆինանսավորմամբ:   

ՙԲնակարանային աջակցություն վիրավոր զինծառայողներին՚ ծրագիրը ՙԹուֆենկյան՚ հիմնադրամի համեմատաբար նոր նախաձեռնություններից է: Սկսել է կյանքի կոչվել 2016-ից՝ ապրիլյան պատերազմից հետո:  Նպատակը սոցիալապես դժվարին պայմաններում հայտնված զինծառայողների ընտանիքներին աջակցելն է: Թիրախային խմբում տարբեր ժամանակներում վիրավորված զինծառայողներն են: ՙՎիրավոր զինծառայողների կարիքները հոգալն ենք առաջնահերթ համարում, քանի որ գտնում ենք, որ ամենից առաջ հենց նրանց ընտանիքները պետք է հարմարավետ բնակարանային պայմաններ ունենան՚,- ընդգծում է ՙԹուֆենկյան՚ հիմնադրամի գործադիր տնօրեն Րաֆֆի Դուդակլյանը: Առ այսօր ՙԲնակարանային աջակցություն վիրավոր զինվորներին՚ ծրագրով  8  բնակարան է կառուցվել, վերանորոգվել կամ գնվել Արցախի վիրավոր զինվորականների համար: ՙՄարտակերտի շրջանում ենք բնակարաններ հանձնել, Հադրութի շրջանում, Մարտունու շրջանում՚,- թվարկում է կառույցի պատասխանատուն:

Պատարա գյուղի բնակիչ Արարատ Ավանեսյանն այս ծրագրի շահառուների շարքում 9-րդն է: Արցախյան պատերազմի մասնակից է, վիրավորվել է  22 տարեկանում: ՙՎիրավորվել եմ Քարագլխի բարձունքում, 1993թ.,՚,- պատմում է նա: Սեփական բնակարան չուներ: Կնոջ եւ 3  դստրերի  հետ ժամանակավոր  բնակվել է տարբեր տներում` հաշմանդամություն ունեցող մարդու համար ոչ հարմարավետ պայմաններում: Հենց այս ամենի հաշվարկով ՙԹուֆենկյան՚ հիմնադրամում որոշեցին Արարատ Ավանեսյանին եւս ընդգրկել բնակարանային ծրագրում: Հիմնադրամն առանձնատունը գնել է եւ հինանորոգել: ՙՏան վերանորոգումն ամբողջությամբ ավարտել ենք: Կարծում ենք՝ սա անհամեմատ հարմարավետ կլինի այս ընտանիքի համար՚,- ասում է հիմնադրամի տնօրենը: Գնված առանձնատանը նաեւ կցակառույցներ ենք ավելացրել՝ խոհանոց ու սանհանգույց ունենալու համար: Դրա հետ մեկտեղ՝ աշխատել ենք տան ավանդական տեսքն էլ պահպանել: Տեսնում եք՝ ավանդական, արցախյան ճարտարապետությունն է: Շինարարական, վերականգնողական միջամտություններն արել ենք այնպես, որ նախնական տեսքը չտուժի՚:     

Ընտանիքի  բոլոր անդամները   գոհ   են    արդյունքից: Առանձնատունը հարմարեցվել է   երկրորդ կարգի հաշմանդամի տեղաշարժման կարիքներին: Շինարարության ընթացքում հաշվի են  առնվել նաև տանտիրուհու   ցանկությունները: Կարինեն գնահատում է՝ ամեն ինչ արվել  է սրտացավությամբ: 

Հենակների օգնությամբ  տեղաշարժվող  47-ամյա Արարատը նեղվում է, որ   ի վիճակի չէ ֆիզիկական աշխատանք  կատարել: Ընտանիքի ապրուստի միջոցը 84 հազար դրամ թոշակն է: Հավատում է, որ նոր առանձնատունը ընտանիքին հաջողություն կբերի: ՙԲարերարներին շատ շնորհակալություն: Մաղթում եմ, որ Արցախում խաղաղություն լինի, եւ որ կարիքավոր ամեն ընտանիք էլ նման ուրախ առիթ ունենա՚,- հուզմունքը չի թաքցում Արարատ Ավանեսյանը:

Ծրագիրը շարունակվում է: Մինչեւ տարեվերջ   շահագործման կհանձնվի  եւս 2  բնակարան  Հադրութի շրջանի  Մեծ Թաղեր եւ Մարտունու շրջանի Կարմիր շուկա գյուղերում: