Ավանդական համագործակցությունը` նոր թիմի հետ
Ճանաչողական այցով Ստեփանակերտում էր գտնվում ՀՀ էներգետիկ ենթակառուցվածքների ու բնական պաշարների նախարարության պաշտոնական պատվիրակությունը՝ նախարար Արթուր Գրիգորյանի գլխավորությամբ:
Հուլիսի 11-ին կայացել է պատվիրակության հանդիպումը ԱՀ էկոնոմիկայի և արտադրական ենթակառուցվածքների նախարար Լևոն Գրիգորյանի ու նրա ղեկավարած գերատեսչության ներկայացուցիչների հետ, քննարկվել են երկու նախարարությունների միջև առկա՝ արդեն երկարամյա, ավանդական համագործակցությունն ու հետագա շփումների հեռանկարները:
ԱՀ էկոնոմիկայի և արտադրական ենթակառուցվածքների նախարար Լևոն Գրիգորյանն ողջույնի իր խոսքում կարևորել է երկու գերատեսչությունների սերտ համագործակցությունը, հատկապես հաշվի առնելով այն հանգամանքը, որ հայկական երկու պետությունները նույն տնտեսական, էներգետիկ դաշտում են, իսկ էներգետիկայի ոլորտը գերակայություն է համարվում մեր հանրապետությունում: Կան մի շարք խնդիրներ, որոնք պետք է քննարկվեն եկու նախարարությունների թիմերի հանդիպումներում:
ՙՕրվա հանդիպումը ճանաչողական էր ՀՀ պատվիրակության համար, և հնարավորություն կա գնահատելու կատարված աշխատանքը, նախանշելու անելիքները, ընթացքավորելու երկու հայկական հանրապետությունների էներգետիկ համակարգերի առջև ծառացած խնդիրների լուծումը՚,-ասաց Լ. Գրիգորյանը, դրանց մեջ մասնավորապես առանձնացնելով բարձրավոլտ էներգացանցերի հուսալիության և անվտանգության ապահովումը, փոքր հէկերի գործարկմանն առնչվող մի շարք հարցեր:
ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանն էլ հայտնել է, որ սա իր առաջին պաշտոնական այցն է Արցախ, առաջին հանդիպումը արցախցի գործընկերների հետ, և վստահեցրել, որ այն կլինի շարունակական: Խնդիրներն ու ծրագրերը բազմաթիվ են, անհրաժեշտ է սահմանել առաջնահերթություններ և աշխատել դրանց ուղղությամբ: Այս պահին արդեն Արցախից Հայաստան էլեկտրաէներգիայի արտահանում կա:
Հանդիպման երկրորդ կեսից Արցախի պետական նախարար Գրիգորի Մարտիրոսյանը նույնպես մասնակցեց քննարկումներին: Նա նշեց, որ ԱՀ կառավարությունն էներգետիկան հայտարարել է տնտեսության գերակա ուղղություն, իսկ համագործակցությունն այդ ոլորտում հայաստանյան գործընկերների հետ միշտ եղել է բարձր մակարդակի վրա: Նա համոզմունք հայտնեց, որ առաջիկայում էլ կշարունակվի այն, կլինեն գործնական ծրագրեր, փոխօգնություն:
ՀՀ էներգետիկ ենթակառուցվածքների և բնական պաշարների նախարարության պատվիրակության հանդիպումը ԱՀ էկոնոմիկայի և արտադրական ենթակառուցվածքների նախարարության հետ եզրափակվեց երկու նախարարությունների միջև համագործակցության հուշագրի ստորագրմամբ, որն էլ հիմք կհանդիսանա ՀՀ և ԱՀ համապատասխան գերատեսչությունների կապերի ընդլայնման ու խորացման համար:
Հանդիպման մի մասն ընթացավ փակ՝ առանց ԶԼՄ-ների ներկայացուցիչների մասնակցության, որից հետո երկու նախարարները պատասխանեցին լրագրողների հարցերին:
Լ. Գրիգորյանը նշել է, որ հուշագրի ստորագրումը ֆորմալ բնույթ է կրում. նմանատիպ հուշագիր առաջին անգամ չէ ստորագրվում, եղել են պայմանավորվածություններ, աշխատանք ՀՀ գործընկերների հետ, որը շարունակվելու է, իսկ հուշագիրը հնարավորություն է տալիս կազմել նոր ծրագրեր, ձևակերպել նոր խնդիրներ և ընթացքավորել:
ՀՀ պատվիրակության ղեկավար Ա. Գրիգորյանը կարևոր ձեռքբերում է համարում, որ Արցախն այս պահին ինքնաբավ է էլեկտրաէներգիայի առումով, և համատեղ աշխատանքների հետագա արդյունքը բերելու է նրան, որպեսզի ավելացվեն արտահանման ծավալներն ու ձևավորվի միասնական համակարգ: Անհրաժեշտ կլինի Արցախում ևս ուսումնասիրել այլընտրանքային էներգակիրների մուտք ապահովելու հեռանկարները, քանի որ դրանց ներդրումը մի շարք առկա խնդիրների լուծում կտա:
Իսկ նոր փոխգործակցության շրջանակներում քննարկվել են բոլոր եզրույթները՝ սկսած օրենսդրական դաշտից, վերջացրած էներգետիկ նոր համակարգերի ներդրումով, և աշխատանքային նոր մթնոլորտի ձևավորման հնարավորություններով:
Սրբուհի ՎԱՆՅԱՆ